Nnyam 25 - Uwumbɔr aagbaŋ

Uwumbɔr Aabool aapiin

¹ Uwumbɔr nan bui Moses ke,

² “Tuk Israel yaab ke bi tii mi ipiin, uja mɔk aah kpa pu u tii na, u li joo ni.

³ Ipiin ngbaan ga li ye salmaa, ni tikunabr, ni tikumann,

⁴ ni ŋitanyaan, ni ŋitambɔn, ni ŋitaman, ni tiŋokur aakekeln,

⁵ ni ipihja aagbaman, ni igbanyaan, ni lisiijal aadɔ,

⁶ ni nkpan mu bi joo seer karyaa tiib na, ni tulalee u bi joo ŋmalni Uwumbɔr aakpan ni na, ni tulalee aayon mu nu mɔ na,

⁷ ni ŋitakpanyaan ŋi bi ga di ŋa Utotoorninkpel aabɔkul li kaa kpa iŋaal na, ni liwapapaln li bi ubiŋ pu na.

⁸ Cha binib ngbaan ŋa Libool tii mi, nima kan, m ga li bi gbɔk bi.

⁹ Maah ga mɔk nimi pu aan ni ŋa Libool ngbaan, ni tiwan nimɔk ga li bi li ponn ni na, ni piin kina ki ti saa naadoon.

Baah ga kpaa Uwumbɔr Aakaal Aadakaa pu na

¹⁰ “Ni di lisiijal aadɔ, ki kpaa dakaa. Waah ga li fɔk kitiŋ pu na li ye ŋisaŋ ŋilole ni ligeln, waah ga li waa pu na li ye ŋisaŋ ŋinaa ni ligeln, waah ga li fɔk paacham pu na mu li ye ŋisaŋ ŋinaa ni ligeln.

¹¹ Ni di salmaa ŋmeen donn biin u ponn ni, ni lipaal mɔmɔk, aan ki di salmaa aakur ŋa ikuul mann gonn u paacham aamɔgben.

¹² Ni di salmaa aakur mɔɔ ibuen inaa ki di dab ŋipepel ŋinaa ngbaan aataa.

¹³ Ni di lisiijal aadɔ ŋa ŋidabil ŋilee ŋi ni ga li joo yoor dakaa ngbaan na, ki di salmaa donn biin ŋi pu.

¹⁴ Ni di ŋidabil ŋilee ngbaan bɔ ŋa ibuen inaa i dab baa dakaa ngbaan pu na.

¹⁵ Ni cha ŋidabil ŋilee na li bi ibuen ngbaan ni, ki taa nyan ŋi,

¹⁶ aan ki di ŋitakpapapan ŋilee ŋi ikaal kipiik i m ŋmee paan ŋi pu na di ŋa dakaa ngbaan ni.

¹⁷ “Ni ŋa salmaa aakur ŋmeen aabiil, laah ga li fɔk pu na li ye ŋisaŋ ŋilole ni ligeln, laah ga li pee pu na li ye ŋisaŋ ŋinaa ni ligeln.

¹⁸ Ni di ligagaar gbaa salmaa ki ŋa tiwan ni kpa ifeen na nilee,

¹⁹ ki di ni siin toŋ tɔb. Ni di tiwan ngbaan dab libiil aan ni kpaan liwanbaal.

²⁰ Tiwan ni kpa ifeen na li si tok tɔb aan tiwan ngbaan aafeen biin dakaa aabiil pu.

²¹ Ni di ikaal aatakpal ŋilee na ki di ŋa dakaa ngbaan ni, aan ki di libiil ngbaan biin.

²² M ga dan nima ni chee, tiwan ni kpa ifeen na aakaasisik ni aapaacham, le m ga di maakaal mɔk si, aa di tii maanib Israel yaab.

Uwumbɔr aaboroboro aateebul aabɔr

²³ “Ni di lisiijal aadɔ ki di ŋa teebul aan waah ga li fɔk pu na li ye ŋisaŋ ŋiloob, waah ga li waa pu na li ye ŋisaŋ ŋitaa, waah ga li fɔk paacham pu na li ye ŋisaŋ ŋinaa ni ligeln.

²⁴ Ni di salmaa aakur ŋmeen donn biin uwon mɔmɔk pu, ki ŋa salmaa aakur aakuul mann gonn u paacham.

²⁵ Ni ŋa nkuul mu pee ke kiŋaalfaak na mann gonn teebul ngbaan aamɔgben, ki di salmaa aakur donn biin nkuul ngbaan pu.

²⁶ Ni mɔɔ salmaa aakur aabuen inaa dab teebul ngbaan aamɔgben ŋinaa ngbaan, nin chee ŋitaa ŋinaa baa na.

²⁷ Ibuen i ni ga di ŋidabil ngbaan bɔ i ponn ni na, ga li baa teebul ngbaan aamɔgben chee la.

²⁸ Ni di lisiijal aadɔ kpii ŋidabil ŋilee ngbaan, ki di salmaa aakur donn biin ŋi pu.

²⁹ Ni ŋa nsambim, ni mbobim, ni ŋisambijal, ki li joo ŋani ŋisubil aadaan aapiin. Ni di salmaa ŋmeen ŋa tiwan nee mɔmɔk.

³⁰ Ni di teebul ngbaan siin Uwumbɔr Aakaal Aadakaa ngbaan chee, ki li joo boroboro u ni joo tii mi na paani u pu.

Karyaa tiib aah ga chɔŋ tiwan ni pu na aabɔr

³¹ “Ni di salmaa aakur ŋmeen, ki di ŋa tiwan ni ni ga di karyaa tiib chɔŋ ni pu na. Ni di ligagaar gbaa salmaa ki ŋa tiwan ngbaan, ki naan nsupuun ki di dab ni pu, aan ni ŋa tiwanbaan.

³² Ni ŋa ŋipan ŋitaa ŋŋangii, ŋitaa mu ŋŋangan, aan ni kpaan ŋipan ŋiloob.

³³ Ni naan nsupuun mutataa, ki di dab ŋipan ŋiloob ngbaan mɔmɔk pu.

³⁴ Ni naan nsupuun munaa, ki di dab kaasisik ni aapachachaal na pu.

³⁵ Ni naan nsupuun aah laa bi ŋeeni pu na, ki di dab ŋipan ŋiloob ngbaan mɔmɔk pu.

³⁶ Tiwan ngbaan mɔmɔk li ye baah di ligagaar gbaa salmaa u na ŋmeen.

³⁷ Ni ŋa karyaa tiib bilole ki ŋeer ŋipan ŋilole ngbaan, aan bi yaa chɔŋ ŋi pu kan, mmii ngbaan ga li wiin nimbiin ni.

³⁸ Ni di salmaa ŋmeen mɔɔ naajubababr, ni ŋipen.

³⁹ Ni di salmaa aakur ŋmeen, ti aanyunyuun ga pii ndibim kuruwaa piitaa na, mɔɔ tiwan ngbaan mɔmɔk.

⁴⁰ Ni pɔɔ nibaa ki ŋa tiwan ngbaan mɔmɔk, maah mɔk nimi lijool ngbaan paab pu na.