Nnyam 24 - Uwumbɔr aagbaŋ

Uwumbɔr aah ki gir sakl waah puu tipuur ti na

¹ Uwumbɔr nan bui Moses ke, “Dan m chee lijool paab, aa ni Aaronn, ni Nadab, ni Abihu, ni Israel yaab aaninkpiib imonko itaa ni kipiik. Ni yaa laa bi dandar kan, ni gbaan kitiŋ ki doon mi.

² Sin baanja le ga fuu ni m chee, ubaa taa ki kpee aa pu. Israel yaab bi gur na ma taa duun ni lijool ngbaan chee.”

³ Moses nan buen ti tuk binib ngbaan Uwumbɔr aah bui u pu ki siin waakaal pu na mɔmɔk, le binib ngbaan mɔmɔk kpaan ki kii, ki bui ke, “Ti ga ŋa Uwumbɔr aah len pu na mɔmɔk.”

⁴ Le Moses ŋmee Uwumbɔr aakaal ngbaan mɔmɔk bil. Naah woln na, le u pue kichakpiik ni ki maa kitork aabimbiln lijool ngbaan aataab, le ki di ŋitakpal kipiik ni ŋilee mu ki di chɔɔn chɔɔn, le ŋitakpal ngbaan si Israel yaab aanaakɔsamɔi kipiik ni ilee na.

⁵ U nan tun binachipɔm le bi ti see kitork aapiin tii Uwumbɔr, le ki di inaja toor kimɔbaan aatork mu.

⁶ Moses nan teŋ tiwakor ngbaan aasin ngem ki di ŋa ŋisambil ni, le ki di mu gur na di kpir kitork aabimbiln na pu.

⁷ U nan yoor tipuur aagbaŋ, ki ponn ni bi ŋmee Uwumbɔr aakaal ŋa na, le ki karn ki mpɔɔn pu ki tii binib ngbaan. Le bi bui ke, “Ti ga kii Uwumbɔr aamɔbon ki ŋa waakaal aah len pu na mɔmɔk.”

⁸ Moses nan yoor nsin mu bi ŋisambil ni na di mee yaa binib ngbaan pu, le ki bui ke, “Nsin mue le mɔk nimi Uwumbɔr aah nan puu tipuur ti buyoonn u nan tii timi ikaal yee na.”

⁹ Moses, ni Aaronn, ni Nadab, ni Abihu, ni Israel yaab aaninkpiib imonko itaa ni kipiik na nan buen lijool paab,

¹⁰ ki ti kan Israel yaab Aawumbɔr. Tiwan nibaa nan bi utaa aataab ki naahn litakpanyaan li bi yin li ke safir na, ki bɔn timm ke kitaapaak na.

¹¹ Uwumbɔr aa nan ŋa Israel yaab aaninkpiib ngbaan nibaa; bi nan kan Uwumbɔr, le ki jin ki nyun.

Moses aah bi Sainai Aajool paab pu na

¹² Uwumbɔr nan ki bui Moses ke, “Dan m chee lijool ngbaan paab. Buyoonn aa bi do na, m ga di ŋitakpal ŋilee ŋi m ŋmee ikaal ŋi pu na tii si, aa ti di mɔk binib ngbaan.”

¹³ Le Moses ni waateter Josua gor bibaa, le Moses piin ki bi joi Uwumbɔr aajool ngbaan paab.

¹⁴ Moses nan bui bininkpiib ngbaan ke, “Li bi linampal ki kii timi aan ti buen ki gir ni. Aaronn ni Hur ga li bi ni chee, nima pu na, ni yaa kpak kinikpakpak kan, ni di buen bi chee.”

¹⁵ Moses nan buen Sainai Aajool ngbaan paab, le ntaalangbam biin lijool ngbaan pu.

^16-17 Uwumbɔr aawiihn nan moor ki sunn ni lijool ngbaan pu. Israel yaab ma aah nan kan nwiihn ngbaan na, mu nan naahn ke mmii le aah gaal lijool ngbaan pu na. Le ntaalangbam ngbaan nan biin lijool ngbaan pu ki ti saa iwiin iloob; winlole daal le Uwumbɔr yin Moses ntaalangbam ni.

¹⁸ Moses nan jon lijool ngbaan aapaacham ki koo ntaalangbam ni. U nan ti bi nima chee iwiin imonko ilee ni tinyer imonko ilee la.