Nnyam 23 - Uwumbɔr aagbaŋ

Ibamɔn ni mbimbinyaan aabɔr

¹ “Ni taa di inyamɔn aabɔr ki moon lipaal, ki taa gii inyamɔn ke aa di gaa mbiindaan lii.

² Ni taa kpaan kinipaak chee n‑yoonn mu bi ti ŋa mbiin na, ki taa kpaan bi chee ki kii inyamɔn aaseeraa.

³ Ni yaa ji ugiin tibɔr kan, ni tii taa li kpa imaagann.

⁴ “Aa yaa ti kan saadin aanaa, bee waabon gbinn ki san cha kan, chuu u ki giin ti tii u.

⁵ Nibaakan waabon yaa lir aan lituln nyiŋ u pu kan, ter u aan u fiin waabon ngbaan, aa taa jer cha u.

⁶ “Ugiin yaa kpa tibɔr, ni ban ni ji waabɔr kan, ni taa biin waabamɔn pu.

⁷ Ni taa gii inyamɔn ki paan unii ki galn u, ki taa ku unii u kaa kpa taani na; ni yaa ŋa kina kan, m mu ga bii unii u ŋa mbiin ngbaan aaboln na.

⁸ Ni taa li gaal igaŋgaŋlik, ni yaa ŋani binib kina kan, ni ga cha ni taa ki li nyi ibamɔn, ki bii binib bi kaa kpa taani na.

⁹ “Ni taa li ŋani biwɔwɔm mbiin, ba pu? ni mu nan ye biwɔwɔm le Ijipt aatiŋ ni, ki nyi naah nan kpa falaa pu na.

Libilolole ni winlole aabɔr

¹⁰ “Ŋibin ŋiloob ni, ni li ko nimi aasar ki chee naah kan pu na.

¹¹ Libilolole ni kan, ni taa ko tisar, ki cha kitiŋ ngbaan doon ki gir nkpaatan, ki taa chee ŋidileen ni tijikaar ti mɔmɔk punn ti ponn ni na. Bigiim mu ga ŋmaa chee ti ki ji, le ipeel mu ŋmɔ ti gur na. Ni ŋa nimi aasubil aasar, ni olif aakpan aasui aasar mu kina.

¹² “Ni li tun lituln iwiin iloob likpaakool ni, ni taa tun lituln libaa winlole daal, nima kan, nimi aanaagbiib, ni biwɔwɔm bi tun tii nimi na, ni nimi aawakor mu ga fuur liyaadaal ngbaan.

¹³ “Tibɔr timɔk m len na, ni ŋun tii min Uwumbɔr. Ni taa dooni liwaal libaa; hali ni taa yin ŋaayimbil.

Njim mutaa mu ye mukpaan na aabɔr

¹⁴ “Libiln ni kan, ni li ji njim mutaa ki nyuŋni mi.

¹⁵ Uŋmal u bi yin u ke Abib na, uŋmal u ponn ni ni nan nyan Ijipt aatiŋ ni na, ni ji boroboro u kaa kpa boroboro aanyɔk na aajim, maah nan mɔk nimi ni li ji mu pu na. Ni taa ŋmɔ boroboro u kpa nnyɔk na njim ngbaan aawiin ilole ngbaan ponn ni. Ni yaa choo ni nan doon mi kan, ni li joo ni ipiin, ni taa choo ni iŋaalkuun.

¹⁶ “Ni yaa ti chee tijikaapɔnn kan, ni ŋa Tijikaapɔnn aajim. “Ni yaa ti ker nimi aadaan aasubil, ni ŋisubil ŋiken, nimi aasar ni kan, ni ŋa Tikakar Aajim n‑yoonn ngbaan.

¹⁷ Ŋibin mɔmɔk ni, ni yaa ti saa njim mutaa mue aayoonn kan, nimi aajab mɔmɔk dan ki nan doon min Nidindaan Uwumbɔr.

¹⁸ “Ni yaa ban ni di kiwakork toor kitork tii mi kan, ni taa di boroboro u kpa boroboro aanyɔk na tii mi. Le tiwakor ti ni di toor kitork tii mi njim mutaa mue ni na aakpan taa sil ki woln kitaak.

¹⁹ “Ni li joo ni njan aajikaar ti pue biir nimi aasar ni na ki di dan min Nidindaan Uwumbɔr Aadichal ni, ki nan di tii mi. “Ni taa di upiih, bee uŋoob aabiin ŋaa waabo.

Tipuur ni mmɔkm aabɔr

²⁰ “M ga cha maatuun loln ni pu nsan ki li kii nimi, naah ga li chuun cha nin chee m gor kiir nimi na.

²¹ Ni ŋun tii u, ki kii waamɔbon. Ni taa ŋa tafalaaŋun u chee; ba pu? min le tun ni u, le waan di cha pinn tafalaaŋundaan aatunwanbir.

²² Tɔ, ni yaa kii waamɔbon ki ŋa maah ban pu na kan, m ga to nimi aadim butɔb tii nimi.

²³ Maatuun le ga loln ni pu nsan ki di nimi buen kitiŋ ki ye Amor yaab, ni Hef yaab, ni Peris yaab, ni Kanaann yaab, ni Hif yaab, ni Jebus yaab aatiŋ na, le m ga kuln bi mɔmɔk.

²⁴ Ni taa gbaan ki doon baawaa, ki taa gaa baah dii baawaa pu na. Ni gbaa wiil baawaa, ni ŋitakpal ŋi bi dooni na.

²⁵ Ni yaa dooni min Nidindaan Uwumbɔr kan, m ga ŋa tinyoor ŋa ni pu, le ni kan tijikaar ni nnyun, le m ga nyan iween ni chee.

²⁶ Le nimi aatiŋ ni, upii ubaa kina aan ber lipuul lii, bi mɔmɔk ga li kpa mbim. Le m ga tii nimi limɔfal li fɔk na.

²⁷ “M ga cha binib bi kpak nimi na san mi ijawaan. M ga cha naah ga to binib bi butɔb na aalan ŋmal, le bi fenn ki san cha nimi.

²⁸ Ijawaan ga chuu bi, le biwon li gbaa; le naah tur koo bi ponn ni na, m ga cha ni jenn nyan Hif yaab, ni Kanaann yaab, ni Hef yaab.

²⁹ Maan di libiln libaa jenn nyan bi; m yaa ŋa kina kan, kitiŋ ngbaan ga doon nkuun, le timoor ni aapeel ga wiir ki nyaŋ nimi.

³⁰ Kina pu na, m ga li nyani bi siisii, le ni yaa ti wiir ŋeer kitiŋ ngbaan kan, ni gaa ki mɔmɔk.

³¹ M ga siin nimi aatiŋ aanaanmɔk ki yoor ni Limɔɔkal Aanyusakpem ki ti saa Yufrates aamɔɔl mɔk, ki yoor nima ki ti saa Kaasisik ni Aanyusakpem, ki ki yoor nima ki ti saa nteersakpiin ni. M ga tii nimi mpɔɔn, ni di nyaŋ binib bimɔk bi kitiŋ ngbaan ni na, le naah tur koo bi ponn ni na, ni ga li nyaŋni bi.

³² Ni taa kpaan bi chee ki ŋa kimɔbaan, ki taa kpaan bi chee ki dii baawaa mu.

³³ Ni taa cha binib ngbaan li bi nimi aatiŋ ngbaan ni; ni yaa ŋa kina kan, bi ga cha ni tun titunwanbir m chee. Ni yaa kpaan bi chee ki dooni baawaa kan, nima le ga kpaln nkun aagaawɔb le ki kuln nimi.”