Nnyam 22 - Uwumbɔr aagbaŋ

Baah ga li teeni ŋipɔɔn pu na aakaal

¹ “Unii yaa sun uken aanaa bee upiih ki ku u, bee ki kooh u aan bi yaa chuu u kan, u ga pa inaa iŋmu le unaabaan pu, ki pa ipiih inaa upihbaan pu.

^2-4 Waah sun tiwan ni na, u pan ni pu. Unaayuk ngbaan yaa kaa kpa nibaa kan, bi di u kooh ki di teen waah sun tiwan ni na pu. Nibaakan, waah sun kiwakork ki na, ni yaa ye unaa, bee ubon, bee upiih, le bi chuu unaayuk ngbaan u joo kiwakork ngbaan ki beenin fu kan, u ga pa tiwakor tilee kibaa ngbaan pu. “Bi yaa pii unaayuk kinyeek u bi su tiwan ubaa aadichal ni aan bi ku u kan, unii u ku unaayuk ngbaan na aa kpa taani ke u ku unii. Ni yaa ye nwiin pu le u pii u ki ku u kan, u kpa taani ke u ku unii.

⁵ “Unii ubaa yaa cha waawakor ŋman uken aajikaar, bee waasubil aasui kan, u di waasaak aajikaar bee waasubil aasui teen udaan ngbaan.

⁶ “Unii ubaa yaa tuur mmii waasaak ni aan mu gaa timoor ki ti koo uken aasaak ni ki gaa waajikaar kan, umiiseer ngbaan teen tijikaar ti bii na pu.

⁷ “Unii ubaa yaa kii ke u ga gaa uken aamombil, bee tiwanyaan nibaa, ki di bil ubaa chee aan bi sun ni waadichal ni kan, bi yaa chuu unaayuk ngbaan kan, u ga pa ŋimombil bee tiwanyaan ngbaan nfum mulee le ki teen.

⁸ Bi yaa kaa chuu unaayuk ngbaan kan, bi di unii u joo ŋimombil, bee tiwanyaan ngbaan na, di dan min Uwumbɔr aanimbiin ni, aan ki cha u puu tipuur ke waa jin tiwan ngbaan ubaa.

⁹ “Binib bilee yaa kpak tiwan pu, ni yaa ye inaa, bee ibon, bee ipiih, bee tiwanpeenkaan, bee tiwan ni wɔŋ na pu kan, ni di bimɔk bilee dan min Uwumbɔr aanimbiin ni. Min Uwumbɔr yaa ti nyan unii u ke uma le lir na, u ga pa tiwan ngbaan nfum mulee ki teen unii u ji mbamɔn na.

¹⁰ “Unii yaa kii ke u ga gaa uken aawakor ki li lik ki, ni yaa ye ubon, bee unaa, bee upiih, bee kiwakork kiken, aan kiwakork ngbaan yaa kpo, bee ki kan iween, bee bi yaa peer ki buen le waa kpa seeraadaan kan,

¹¹ bi di unii u lik kiwakork ngbaan na di dan min Uwumbɔr aanimbiin ni, aan u nan puu tipuur ke waa sun kiwakork ngbaan. U yaa kaa sun kiwakork ngbaan kan, waan teen uwakodaan, le u mu ga kii kina.

¹² Tɔ, unii u lik kiwakork ngbaan na yaa sun ki kan, see u teen uwakodaan.

¹³ Nibaakan timoor ni aapeel le yaa chuu kiwakork ngbaan kan, unii u lik ki na li joo ni tinann ti upeel na ŋman gur na ki nan di mɔk; ni yaa sil ye ke upeel le chuu kiwakork ngbaan kan, unii u lik ki na taa pa nibaa.

¹⁴ “Unii yaa pinn kiwakork uken chee aan ki kan iween, bee ki kpo, aan uwakodaan aa kan kan, unii u pinn ki na ga pa ki pu.

¹⁵ Tɔ, ni yaa ŋa kina uwakodaan aanimbil ni kan, unii u pinn na aan pa nibaa; ba pu? unii yaa joo uken aawakork tun lituln, ki pa ki pu, aan ki yaa kpo kan, waah pa pu na ŋeer la, u taa ki pa nibaa ki pu.

Mbimbinyaan aakaal

¹⁶ “Uja yaa chuu usapɔɔn u kaa nyi uja kaa kpa chal na mpɔɔn, ki doon u chee kan, see u pan tichoowan tii upiibo ngbaan aate le ki nin yoor u.

¹⁷ Tɔ, ni yaa ye ke upiibo ngbaan aate aa kii ke uja ngbaan yoor ubisal kan, see u pan upiibo ngbaan aate tichoowan ti ŋeer usapɔɔn u kaa nyi uja na aapal.

¹⁸ “Ni ku upii u jin nnyɔk ki joo ŋani iwaan aawan na.

¹⁹ “Ni ku uja u doon kiwakork chee na.

²⁰ “Ni ku unii u toor kitork tii liwaal na.

²¹ “Ni taa ŋa uwɔwɔnja mbiin, ki teer ke ni mu nan ye biwɔwɔm le Ijipt aatiŋ ni.

²² Ni taa ŋa ukpopii, bee ukpobo ubaa mbiin.

²³ Ni yaa ŋa bi mbiin, aan bi yaa wii ki yin mi ke m ter bi kan, min Uwumbɔr ga ŋun tii bi,

²⁴ ki ga gee liŋuul ki ku nimi butɔb ni, le nimi aapuutiib ni nimi aabim mu ga ŋa bikpopiib ni nkpobim.

²⁵ “Ni yaa pinn ŋimombil tii maanib ngbaan ponn ni u ye ugiin na kan, ni taa li bi ke binib bi pinni ŋimombil ki ban tinyoor na.

²⁶ Aa yaa gaa saapɔndaan aawanpeenkaan kan, see aa giin ni tii u waahr aan nwiin nin lir,

²⁷ ba pu? nibaakan, nima baanja le u kpa ki ga di biin ubaa pu aan ni lee u tiwoor. Aa yaa kaa giin ni tii uwandaan kan, u ga di ba biin ubaa pu ki doon? Aa yaa kaa giin ni tii uwandaan kan, n‑yoonn mu u wii yin mi ke m ter u na kan, m ga kii u ki ter u, ba pu? m ye unimbaasaln daan la.

²⁸ “Ni taa len Uwumbɔr tibɔbir, ki taa puun lii nimi aaninkpel ubaa pu.

²⁹ “Ni li tii mi ipiin i nyan ni nimi aajikaabim, ni ŋisubil aadaan, ni olif aakpan, ni mɔmɔk aayoonn. “Ni di nimi aajan aabijabim mɔmɔk tii mi.

³⁰ Ni di nimi aawakor aajan aabim mu tii mi. Ni cha i li bi inatiib chee ki ti saa iwiin ilole, le winiin daal kan, ni di i nan tii mi.

³¹ “Naah ye maanib pu na, ni taa ji kiwakork ki aanann upeel chuu ki ŋman gur na; ni di tinann ngbaan aaboln tii ibɔ.