Nnyam 21 - Uwumbɔr aagbaŋ

Baah ga joo baanaagbiib pu na

¹ “Di ikaal yee ki di tii Israel yaab:

² Ni yaa daa Hiibru aanaagbiinii kan, u ga tun lituln tii udindaan ŋibin ŋiloob la. Libilolole ni, udindaan cha u li cha ki taa gaa u chee tipar tibaa.

³ Ni yaa ye ke waa nan kpa upii le ki ŋa saanaagbiija, le aa ban upii tii u kan, aa yaa di u lii u cha kan, u taa li joo upuu ngbaan; u yaa nan joo upii le aa daa u kan, cha upuu li dii u cha.

⁴ Ni yaa ye ke udindaan ngbaan le tii u upii le u ma mbim kan, udindaan le yeh upii na, ni waabim, le uja ma ga ŋmaa li cha ubaa.

⁵ Tɔ, ni yaa ye ke unaagbiija ngbaan mɔk ke u gee udindaan, ni upuu, ni waabim, ki yaa ban ke u li bi udindaan chee kan,

⁶ nima na udindaan di unaagbiija ngbaan dan Uwumbɔr aanimbiin ni, ki cha u sil kidiik aabisamɔb chee aan bi saa chir utafal. Le n‑yoonn ngbaan ki joo cha u ga li ye waanaagbiija ki ti saa waamɔfal aadoon.

⁷ “Nibaakan, unii yaa di ubisal kooh ŋa unaagbiipii kan, udindaan taa cha u buen dafir ke unaagbiija aah ga buen pu na.

⁸ Nibaakan, u yaa di u kooh tii unii aan udaan di u ŋa upuu, le kaa ki gee u kan, u di u giin kooh tii ute; waan ŋmaa di u kooh tii uwɔwɔnii, ba pu? waah yii u pu na, naa ŋan.

⁹ Nibaakan, uja yaa daa unaagbiipii ke u tii ujapɔɔn u di ŋa upuu kan, u li joo u ke ubisal na.

¹⁰ Nibaakan, uja ngbaan yaa ki yoor upii leler ke u li ye upuu kan, see u beenin tii upiipol tijikaar, ni tiwanpeenkaan, ki kii ke u doon u mu chee.

¹¹ U yaa kaa tii u kina kan, see u di u lii, u li bi ubaa pu, ki taa gaa u chee tipar tibaa.

Bakaa aaŋam aakaal

¹² “Unii yaa faa uŋeen aatɔ ki ku u kan, bi ku u mu.

¹³ Tɔ, u yaa kaa nyi ubɔr le ki faa ku u kan, u ga ŋmaa san ŋmar ki buen nin chee m ga nyan ki mɔk nimi na; u yaa san fuu nima chee kan, u ŋmar a.

¹⁴ Tɔ, unii aaŋuul yaa fii, le u nyi ki ku uŋeen aatɔ kan, bi ku u mu, hali u yaa san buen maatork aabimbiln chee ke u ŋmar kan, ni ku u.

¹⁵ “Unii yaa faa ute bee una kan, ni ku u.

¹⁶ “Unii yaa sun uŋeen aatɔ u ti kooh u, bee u di ŋa waanaagbiija kan, ni ku u.

¹⁷ “Unii yaa len tibɔbir lii ute bee una pu kan, ni ku u.

^18-19 “Binib bilee yaa jaa le ubaa yaa di litakpal yun, bee u di uŋaal faa, kaa faa ku u kan, ni taa daa utafal. Waah faa unii u na yaa buŋ ki yaa nan ŋmaa fii ki joo kijaangbeek chuun kan, unii u faa u na pa waah dɔ tibunbunn ngbaan ni pu na, ki li lik u aan u ti pɔɔk doo.

²⁰ “Unii yaa di lidabil faa waanaagbiinii, uja bee upii kan, le u kpo libuul ni kan, ni daa udindaan ngbaan aatafal.

²¹ Tɔ, waanaagbiinii ngbaan yaa kaa kpo nwiin mubaa, bee ilee daal kan, ni taa daa udindaan ngbaan aatafal. Waah kaa ki kpa waanaagbiinii pu na ŋeer kina.

²² “Nibaakan, bi yaa peln faa upiipudaan binib aajaak ponn ni aan u ker lii, le nibaa aa ŋa uma upii ngbaan kan, unii u faa upii ngbaan na ga pa uchal waah ban pu na. Bi yaa len tibɔr ni ŋeer ke u pa pu na kan, see u pan kina.

²³ Tɔ, upii ngbaan yaa kan iween kan, unii u faa u na aatafadaan le ye ke, upii ngbaan yaa kpo kan, bi ku u mu,

²⁴ unimbil le yaa chur, bee unyiln le yaa fenn, bee uŋaal le yaa koo, bee utaafaak le yaa koo,

²⁵ bee mmii le yaa see u, bee u yaa kan mbuun, bee nwon le yaa fab kan, bi ŋa udaan ngbaan mu kina.

²⁶ “Unii yaa faa waanaagbiinii, uja bee upii aanimbil, aan li bii kan, u cha unaagbiinii ngbaan li cha dafir; ba pu? unimbil na le ye tipar ki leŋ waah ba ga tun lituln tii u pu na.

²⁷ U yaa faa nyan unyiln kan, u cha u li cha dafir; ba pu? unyiln na le ye tipar ki leŋ waah ba ga tun lituln tii u pu na.

Biwandam aatuln aa ye pu na

²⁸ “Unii ubaa aanaaja yaa saa ku unii kan, bi mae ŋitakpal ki ku unaaja ngbaan; ni taa ŋmɔ waanann; unaadaan mu taa li kpa ntafadaan.

²⁹ Tɔ, unaaja ngbaan yaa chuun saar binib, le bi tuk uwandaan, le u yii kaa chuu u, aan u yaa saa ku unii kan, bi yur ŋitakpal ki ku u, ki ku unaadaan mu kpee.

³⁰ Ni yaa ti ki ye ke ni ban unaadaan pa tipar ki gaa ubaa lii kan, u pa tipar ngbaan ki taa gur tibaa.

³¹ Unaaja ngbaan yaa saa ku unachipɔnbo bee usapɔnbo kan, ni di ntafadaan mu chachaan ngbaan tii u.

³² Unaaja ngbaan yaa saa ku unaagbiinii kan, ni ye unaadaan aatuln le ke u pa unii u yeh unaagbiinii ngbaan na tikunabr aamombil piitaa, le ni yur ŋitakpal ki ku unaaja ngbaan.

³³ “Unii yaa chuu biir mbuu pu, bee u yaa gbii mbuu, kaa ki biin mu pu, le unii uken aawakork ti lir mu ponn ni ki kpo kan,

³⁴ see unii u gbii mu na pan ŋimombil tii uwakodaan, le unii u pan na ga ŋmaa yoor liwankpol na aanann.

³⁵ Ubaa aanaaja yaa saa ku uken aanaaja kan, binib bilee ngbaan ga di unaaja u fu na di kooh ki di ŋimombil na yakr tii tɔb; bi ki yakr linaakpol aanann mu tii tɔb.

³⁶ Tɔ, bi yaa bee ke unaaja ngbaan chuun saar tiwankor, le bi tuk unaadaan, le u yii kaa chuu u, le u saa ku unii ubaa aanaaja kan, see u di unaaja u fu ki kpa laafee na teen unii u yoo kpo na, le ki tee li joo linaakpol na.