Nnyam 2 - Uwumbɔr aagbaŋ

Baah nan ma Moses pu na

¹ N‑yoonn mue le uja ubaa, u nan ye Liifai yaab aanibol na yoor upii u mu ye waanibol na,

² le ki ma u chee ubijabo. N‑yoonn ngbaan upii ngbaan aah kan ke ubijabo ngbaan ye ubo nyaan na le u di u bɔr iŋmal itaa.

³ Buyoonn u ti bee ke waan ki ŋmaa bɔr u na, le u ban kibɔɔkuuk, le ki ban tiwan teŋ ki ponn ni aan nnyun taa koo u chee, ki nan di ubo ngbaan ŋa kibɔɔkuuk ngbaan ponn ni, le ki di u ti bɔr tikal ni, limɔɔl aagbaan.

⁴ Ubo ngbaan aaninkpan nan si dandar ki pekr lik tiwan ni ga ŋa ubo ngbaan na.

⁵ Le ubɔr aabisal dan limɔɔl ngbaan ni u nan fu nnyun, le waatutum chuun kpak limɔɔl aagbaan. Ubɔr aabisal aah bi fu nnyun na, le u kan kibɔɔkuuk si tikal ponn ni, le u tun usapɔɔn ubaa, u ye waatutunn na, le u ti yoor ni kibɔɔkuuk ngbaan.

⁶ Ubɔr aabisal ngbaan nan chuu piir kibɔɔkuuk ngbaan le ki kan ubijabo waatiir ngbaan. Ubo ngbaan nan bi wii, le kinimbaak chuu u, le u bui ke, “Hiibru yaab aabijabo ubaa le na.”

⁷ Le ubo ngbaan aaninkpan dan le ki nan baa ubɔr aabisal ngbaan ke, “M buen ti yin ni Hiibru yaab aapii ubaa aan u nan li ŋaani ubo ngbaan aa?”

⁸ Le ubɔr aabisal ngbaan bui u ke, “Ti yin ni upii ubaa.” Nima pu na, ubo ngbaan aaninkpan nan buen ti yin ni ubo ngbaan aana.

⁹ Le ubɔr aabisal ngbaan bui upii ngbaan ke, “Gaa ubo umina ki li ŋaani u tii mi, aan m pa si.” Nima le u nan gaa ubo ngbaan, le ki kpiin u.

¹⁰ Ubo ngbaan aah lii libiil buyoonn na, le upii ngbaan di u buen ti di u tii ubɔr aabisal ngbaan, le u gaa u ki di ŋa ujapɔɔn. Le ubɔr aabisal bui usui ni ke, “M daa nyan u nnyun ni la, nima pu na, m ga yin u ke Moses.”

Moses aah san ŋmar ki buen Midiann aatiŋ ni pu na

¹¹ Buyoonn Moses muun ki ŋa uja na, le u nyan ubɔr aabisal do ki buen u ti mann waanib Israel yaab, le ki ti kan waanib aah kpa falaa pu na. Hali u nan si nibaa chee ki kan Ijipt aanii aah ku Hiibru aanii ubaa pu na, u nan ye Moses aado yoo la.

¹² Le Moses fenn lik ni mɔmɔk, ki kan ke unii ubaa aa lik u wɔb, le u ku Ijipt aaja ngbaan ki di u sub litambol ni.

¹³ Naah ki woln kitaak na, le u ki buen bi chee, le ki ti kan Hiibru yaab bilee bi jaa kijaak. Le u bui uja u ŋa uken bakaa na ke, “Ba ŋa aa joo aado yoo gbaa?”

¹⁴ Le uja ngbaan giin bui u ke, “Ŋma ŋa si timi aayidaan ni ubɔjir? Aa ban ke aa ku mi ke saah fe ku Ijipt aaja na pu na la aa?” Nima chee le ijawaan chuu Moses, le u dakl usui ni ke, “Binib bee maah ŋa pu na a.”

^15-16 Buyoonn ubɔr ngbaan ŋun Moses aah ŋa pu na, le u nan ban bi ku u, le Moses san buen ti bi Midiann aatiŋ ni. Daalbaadaal, le Moses nan ka nnyunbun mubaa chee, le Jetro, u nan ye Midiann aatotoor na aabisatiib bilole nan dan nnyunbun ngbaan chee, ke bi nan lu nnyun tii bite aapiih ni iŋoob i nyu.

¹⁷ Le bipihkpaab bibaa mu dan nima ki nan san jenn mpiibim ngbaan. Le Moses buen ti ter bi ki lun nnyun tii baawakor ngbaan.

¹⁸ Baah gir kun buyoonn na, le bite baa bi ke, “Ba ŋa ni gir ni din mala kina?”

¹⁹ Le bi bui u ke, “Ijipt aaja ubaa le gaa timi lii bipihkpaab ngbaan chee, le ki lun nnyun tii timi aawakor mu.”

²⁰ Le u baa ubisatiib ke, “Uja ngbaan bi la chee? Ba ŋa ni cha u ka nima chee? Ti chɔi ni u man, aan u nan ji tijikaar ti chee.”

²¹ Nima pu na, Moses nan kii ke u ga li bi Jetro do, le u di ubisal Sipora tii Moses u di ŋa upuu,

²² le u ma ubijabo tii u. Le Moses bui usui ni ke, “M ye uwɔwɔnja le kitiŋ kee ni, nima pu na, m ga yin ubo ngbaan ke Gesom.”

²³ Ŋibin pam aah jer cha na, le Ijipt aabɔr u nan dii Moses u ku u na nan kpo, le Israel yaab nan beenin bi tinaagbiir ni, le ki wii ki ban nterm. Uwumbɔr nan ŋun baah wii pu na,

²⁴ le ni nan chuu u kinimbaak, le u teer tipuur ti u nan puu tii Abraham, ni Aisak, ni Jakob na.

²⁵ U kan Israel yaab aah ji falaa pu na, le naa mɔr u, le utafal nan bi bi ni.