Nnyam 19 - Uwumbɔr aagbaŋ

Israel yaab aah bi Sainai Aajool chee pu na

^1-2 Israel yaab ngbaan nan nyan ni Refidim aatiŋ ni, njan aawiin daal, uŋmal tatar ponn ni, baah nan nyan Ijipt aatiŋ ni buyoonn na, le ki fuu Sainai Aajool chee, nteersakpiin ni. Nima chee le bi kal Sainai Aajool ngbaan taab,

³ le Moses buen lijool ngbaan aapaacham, u ti doon Uwumbɔr. Uwumbɔr nan bi lijool ngbaan paab le ki yin u, le ki tuk u ke u bui Jakob aayaabitiib, Israel yaab ke:

⁴ “Ni kan min Uwumbɔr na aah nan ŋa Ijipt yaab pu, ki kii nimi ke likaagiil aah kii laabo pu, ki yoor u ufeen pu pu na, le ki joo ni nimi mbaa chee.

⁵ Dandana wee, ni yaa ga kii maaliin aan ki joo maah puu tipuur ti na kan, ni ga li ye maanib. Min le yeh dulnyaa wee mɔmɔk, nimi le ga li ye bininyaam

⁶ ki tii min baanja, le ki ga li ye bitotoorb ki tun maatuln.”

⁷ Moses nan sunn ni taab, le ki kuun binib ngbaan aaninkpiib tɔb chee, le ki tuk bi tibɔr ti mɔmɔk Uwumbɔr bui u ke u ŋa na.

⁸ Le binib ngbaan mɔmɔk kpaan kii ke, “Ti ga ŋa tiwan nimɔk Uwumbɔr bui ke ti ŋa na.” Le Moses gir ki ti tuk Uwumbɔr kina.

⁹ Uwumbɔr nan ki bui Moses ke, “M ga dan ni chee ntaalangbam mu bɔɔn na ni, nima kan, binib ngbaan ga ŋun maah bi len aa chee tibɔr pu na, aan dandana wee ki joo cha bi ga gaa kii saah len pu na.” Moses nan tuk Uwumbɔr binib ngbaan aah kii pu na,

¹⁰ le Uwumbɔr bui u ke, “Li cha binib ngbaan chee, ki ti tuk bi ke bi di din ni fen, aan ki toor ki ŋaŋ bibaa ki nan doon mi. Bi finn baakeken,

¹¹ aan ki gor bibaa daalpu. Liyaadaal ngbaan, m ga nyan ni paacham, ki sunn ni Sainai Aajool pu, nin chee binib ngbaan mɔmɔk ga kan mi na.

¹² Lur nkuul mann gonn lijool ngbaan, aan binib ngbaan taa lakr mu jer, ki tuk bi ke bi taa jon lijool ngbaan paab, ki taa duun nima chee. Unii ubaa yaa taa nima chee kan, ni ku u,

¹³ ni mae u ŋitakpal, bee ni too ipiin yur u ki ku u, ubaa mu taa meeh u. Ni yaa ye unii, bee kiwakork kan, ni ku u. Tɔ, n‑yoonn mu bi pii kakaan na kan, binib ngbaan foor duun lijool ngbaan.”

¹⁴ Moses nan sunn ni lijool ngbaan taab, ki dan binib ngbaan chee, ki tuk bi ke bi gor bibaa ki doon Uwumbɔr. Nima pu na, bi nan finn baakeken,

¹⁵ le Moses bui bi ke, “Gor nibaa man, ubaa taa doon upuu chee ki ti saa daalpu.”

¹⁶ Nwiin tatar daal ngbaan aachakpiik ni, le utaal tar ki moor, le ntaalangbam mu bɔn chin chin na jɔnn lijool ngbaan pu, le bi ŋun kakaan aah wii sakpen pu na. Le binib ngbaan mɔmɔk aawon gbaa ki jii ijawaan pu.

¹⁷ Le Moses loln bi pu nsan, le bi nyan linampal ki buen Uwumbɔr chee, ti sil lijool ngbaan aataab.

¹⁸ Le Sainai Aajool paab kpaln iŋmanyuu ŋmeen, ba pu? Uwumbɔr nan nyan ni paacham ki sunn ni li pu mmii ponn ni la. Le iŋmanyuu fii jon paacham ke mmii sakpiin aaŋmanyuu na, le binib mɔmɔk aawon gbaa sakpen.

¹⁹ Le kakaan ngbaan moo wii mpɔɔn pu. Le Moses len tibɔr, le Uwumbɔr aaneel kii u ke utaal aah tar pu na.

²⁰ Le Uwumbɔr nyan ni paacham ki sunn ni Sainai Aajool ngbaan paab, ki yin Moses ke u dan u chee lijool ngbaan paab. Moses nan jon u chee paacham,

²¹ le Uwumbɔr ti bui u ke, “Sunn ki tuk binib ngbaan ke bi taa lakr nkuul na pu jer ke bi nan lik mi; bi yaa ŋa kina kan, pam le ga kpo.

²² Hali, utotoor u ga dan m chee na yaa kaa toor ki ŋaŋ ubaa kan, m ga daa utafal.”

²³ Moses nan bui Uwumbɔr ke, “Binib ngbaan aan jon ni paacham do, ba pu? aa tuk bi ke lijool ngbaan ye chain la, le ti lur nkuul kiir li.”

²⁴ Le Uwumbɔr giin bui u ke, “Sunn ki ti cha Aaronn dii ni si. Bitotoorb ni binib ngbaan ma taa puur nkuul ngbaan ke bi dan m chee, bi yaa yii kan, m ga daa bitafal.”

²⁵ Le Moses sunn ni binib ngbaan chee, le ki nan tuk bi Uwumbɔr aah len pu na.