Nnyam 18 - Uwumbɔr aagbaŋ

Jetro aah mann Moses pu na

¹ Moses aachool uja Jetro, u ye Midiann aatiŋ aatotoor na, nan ŋun Uwumbɔr aah di Moses tun pu na mɔmɔk, aan ki cha u nyan ni Israel yaab Ijipt aatiŋ ponn ni pu na.

² Kina pu le u dan Moses chee, ki joo ni Moses aapuu Sipora, u nan bee puwɔb na,

³ ni waabijabim Gesom ni Elieser. Moses nan bui ke, “M ye uwɔwɔnja le kitiyayaŋ ponn ni.” Kina pu le u nan yin ubaa ke Gesom.

⁴ U nan ki bui ke, “Nte Aawumbɔr le ter mi le ki gaa mi lii Ijipt yaab aabɔr u ban u ku mi na chee,” kina pu na, u nan yin uken na ke Elieser.

⁵ Le Jetro dan Moses chee nteersakpiin ni, Uwumbɔr aajool li bi nan ka gbɔk li na, le ki joo ni Moses aapuu ni waabim bilee na.

⁶ U nan naŋ Moses chee ke bi choo.

⁷ Nima pu na, Moses nan tooh u nsan pu, le ki ti gbaan unimbiin ni, ki moor utakpiln. Bi nan doon tɔb, le ki koo Moses aabool ni.

⁸ Moses nan tuk Jetro, Uwumbɔr aah ŋa Ijipt yaab aabɔr, ni waanib pu, aan ki gaa Israel yaab lii na. U nan ki tuk u ŋimuk ŋi bi kan nsan ni aan Uwumbɔr gaa bi lii na mɔmɔk.

⁹ N‑yoonn mu Jetro ŋun kina na, le u usui piir,

¹⁰ le u bui ke, “M pak Uwumbɔr u gaa nimi Ijipt yaab aabɔr ni waanib chee lii na. M pak Uwumbɔr, u nyan waanib tinaagbiir ni na.

¹¹ Dandana wee, m bee ke Uwumbɔr le jer ŋiwaa mɔmɔk, ba pu? Ijipt yaab aah nan lik seen Israel yaab pu na, le u daa bitafal kina.”

¹² Jetro nan joo ni kiwakork ki bi ga di ki mɔmɔk see mmii ni na, ni tiwakor tiken, le ki nan toor kitork tii Uwumbɔr; le Aaronn ni Israel yaab aaninkpiib dii u buen, le bi ti jin kitork ngbaan, Uwumbɔr aanimbiin ni.

Baah lee bibɔjirb pu na

¹³ Naah woln kitaak na, le Moses nan bi toor Israel yaab aajaak aabɔr kina ki ti saa kinyeek.

¹⁴ N‑yoonn mu Jetro kan Moses aah tun pu aan ni ti mue u na, le u baa u ke, “Ba le aa bi ŋani saanib ngbaan chee, ni ti saa kinyeek kina? Ba ŋa aa bi ŋani nimina mɔmɔk aabaa, aan binib ngbaan si ke bi kan si, kichakpiik ni, ki ti saa kinyeek?”

¹⁵ Le Moses giin bui u ke, “See m ŋa kina, ba pu? binib ngbaan choo m chee ke m nan tuk bi Uwumbɔr aah ban pu na la.

¹⁶ N‑yoonn mu binib bilee kpa kinikpakpak na, bi ga dan m chee, le m bee u aabɔr ŋan na, le ki tuk bi Uwumbɔr aakaal, ni waah ban pu na.”

¹⁷ Le Jetro bui u ke, “Saah ŋani pu na aa ye nsan mu ŋan na.

¹⁸ Ni ga ŋun aa ni binib ngbaan mɔmɔk. Ni ga nyaŋ si.

¹⁹ Dandana wee, cha m sur si, aan Uwumbɔr ga li bi aa chee. Ni ŋan ke aa li si binib ngbaan aasisii, Uwumbɔr aanimbiin ni, ki li joo ni baabɔr u chee.

²⁰ Aa ga mɔk bi Uwumbɔr aakaal, ki kpiir mɔk bi baah ga li bi pu, ni baah ga ŋa pu na.

²¹ Tɔ, tiwan ni kpee na sɔ, pɔɔn aabaa ki nyan bijab bi ga ŋmaa joo biken na, ki tii bi nsaloln aatuln bi li joo biken: bisalolm ngbaan bibaa li lik lichur lichur, bibaa mu li lik nkub nkub, bibaa mu li lik piiŋmu piiŋmu, bibaa mu li lik kipiik kipiik aanib. Cha binib ngbaan li ye binib bi san Uwumbɔr ijawaan ki tun lituln mbamɔm, kaan li gaal igaŋgaŋlik na.

²² Cha binib ngbaan aaboln le ye bibɔjirb biken pu n‑yoonn mɔmɔk. Tibɔr ti pɔɔ nyaŋ bi na kan, cha bi li joo ni ti aa chee, le tibɔr ti kaa kpaln na kan, bi ga ŋmaa toor ti bibaa. Bi yaa ter si kan, aa mu ga kan lifuur.

²³ Aa yaa ŋa kina, Uwumbɔr aah siin pu na kan, tibɔr aan nyaŋ si, le binib ngbaan aabɔr mɔmɔk ga toor, le bi gir kun bido.”

²⁴ Moses nan gaa Jetro aah sur u pu na,

²⁵ le ki nyan Israel yaab ponn ni bijab bi ga ŋmaa toor biken aabɔr na. U nan di binib lichur lichur, ni nkub nkub, ni piiŋmu piiŋmu, ni kipiik kipiik, ki tii bisalolm ngbaan, bi mɔmɔk aah ga ŋman pu na.

²⁶ Bi nan tun libɔjil aatuln binib ngbaan chee n‑yoonn mɔmɔk, le ki tee joo ni tibɔr ti pɔɔ na Moses chee, le ki toor tibɔr ti kaa pɔɔ na bibaa.

²⁷ Moses nan chɔi Jetro, le u gir kun udo aatiŋ ni.