Nnyam 17 - Uwumbɔr aagbaŋ

Nnyun mu nyan ni litakpasakpeln ni na

¹ Israel yaab mɔmɔk nan nyan Sinn aateersakpiin ngbaan ni, le ki chuun ki gonni ke Uwumbɔr aah siin pu na. Bi nan kal Refidim aatiŋ ni, le nnyun aa nan bi nima bi nyu.

² Le bi ŋulni Moses pu ki bui ke, “Tiin timi nnyun ti nyu.” Le Moses giin kii bi ke, “Ba ŋa ni bi ŋulni? Ba ŋa ni bi tɔŋni Uwumbɔr?”

³ Tɔ, nnyunyuu nan joo binib ngbaan pam, le bi nan ŋulni Moses pu. Bi nan bui ke, “Ba ŋa aa nyan ni timi Ijipt aatiŋ ni, ki cha nnyunyuu ban mu ku timi, ni timi aabim, ni timi aawakor?”

⁴ Le Moses mee Uwumbɔr mbamɔm le ki bui u ke, “M ga ŋa binib bee kinye? Bi gor ke bi mae mi ŋitakpal la.”

⁵ Le Uwumbɔr bui Moses ke, “Nyan Israel yaab ponn ni aaninkpiib bibaa bi dii si, aan ni buen ti loln kinipaak ngbaan pu nsan. Li joo saajaangbeek ki aa nan di faa Nail aamɔɔl aanyun na.

⁶ M ga loln nsan ki ti sil litakpasakpeln libaa pu, Sainai Aajool na chee. Faa litakpasakpeln ngbaan, le nnyun ga nyan ni li ponn ni aan binib ngbaan nyu.” Moses nan ŋa kina Israel yaab aaninkpiib ngbaan aanimbil ni.

⁷ Bi nan yin nima chee ke Masa, ki ki yin ni ke Meriba; ba pu? Israel yaab nan ŋulni Uwumbɔr pu ki tɔŋ u, ki baa ke, “Uwumbɔr bi ti chee aan waa bi?”

Israel yaab aah to Amalek yaab butɔb pu na

⁸ Amalek yaab nan dan ki nan tak Israel yaab, Refidim aatiŋ ni.

⁹ Le Moses tuk Josua ke, “Nyan bijab ngbaan bibaa aan ni fe ti to Amalek yaab butɔb. M ga fe ti sil toŋ ligongoln pu, ki li joo kijaangbeek ki Uwumbɔr tuk mi ke m li joo na.”

¹⁰ Josua nan ŋa Moses aah tuk u pu na, le bi buen bi ti to Amalek yaab butɔb, le Moses, ni Aaronn, ni Hur buen ligongoln paab ki ti si nima.

¹¹ N‑yoonn mu Moses yoor uŋaal paacham na, le Israel yaab nyaŋni, n‑yoonn mu uŋaal ti jɔnn taab na kan, le Amalek yaab mu nyaŋni Israel yaab.

¹² N‑yoonn mu Moses aaŋaal yɔr na, le Aaronn ni Hur yoor ni litakpal nan tii u ke u kal, le bima bilee ngbaan sil gbaŋ u, le ubaa joo uŋangii, uken mu joo uŋangan ki yoor i paacham. Bi nan si joo i paacham kina le nwiin ti lir.

¹³ Kina le Josua nan nyaŋ Amalek yaab.

¹⁴ Uwumbɔr nan bui Moses ke, “Ŋmee butɔb ngbaan aabɔr mɔmɔk bil, aan ti li ye nteerm n‑yoonn mɔmɔk. Tuk Josua ke m ga bii Amalek yaab mɔmɔk.”

¹⁵ Moses nan maa kitork aabimbiln nima chee le ki yin li ke, “Uwumbɔr le ye Maatuutaa.”

¹⁶ U nan ki bui ke, “Yoor Uwumbɔr Aatuutaa paacham. Uwumbɔr le ga li to Amalek yaab butɔb tii timi, ki cha n‑yoonn mu kaa kpa ndoon na.”