Nnyam 16 - Uwumbɔr aagbaŋ

Uwumbɔr aah tii Israel yaab tijikaar ni tinann pu na

¹ Israel yaab mɔmɔk nan nyan Elim ni, ki ti fuu Sinn aateersakpiin mu bi Elim ni Sainai aakaasisik ni na, lelee aaŋmal aawiin kipiik ni iŋmu daal, baah nan nyan ni Ijipt aatiŋ ni na aapuwɔb.

² Nima chee, nteersakpiin ngbaan ni, le bi mɔmɔk len tibɔbir ti kaa ŋan na Moses ni Aaronn pu,

³ le ki bui bi ke, “Uwumbɔr yaa ba ku timi Ijipt aatiŋ ni kan, ti ba ga li gee kina. Ti ba ga li kani tinann ni tijikaar timɔk ti gee na ki ji, le ni joo ni timi nteersakpiin mumina ponn ni ti nan kpo nkon.”

⁴ Le Uwumbɔr bui Moses ke, “Dandana wee, m ga cha tijikaar nyan ni paacham ki lir ni kitiŋ, ki tii ni mɔmɔk. Tɔ, binib ngbaan ga ban tijikaar ngbaan iwiin mɔmɔk ki ti ŋeer nwiin mubaa aajim. Nimina le ga cha m bee ke binib ngbaan ga joo maakaal aan baan joo.

⁵ Winloob daal kan, bi ban tijikaar ngbaan ki ŋa ti ŋeer iwiin ilee aajim.”

⁶ Le Moses ni Aaronn nan bui Israel yaab tibɔr ngbaan ke, “Kijook kee le ni ga bee ke Uwumbɔr le nyan ni nimi Ijipt aatiŋ ponn ni ki joo nimi.

⁷ Kichakpiik ni, ni ga kan Uwumbɔr aajinjiir aawiihn. U ŋun naah len tibɔbir u pu pu na. Mbamɔn, ni len uma la, naa ye timi; tima joo waamɔbon le tuk nimi.”

⁸ Le Moses ki bui bi ke, “Ni ye Uwumbɔr ubaa le ga tii nimi tinann kijook kee, le kichakpiik ni u ga tii nimi tijikaar naah ban pu na, ba pu? u ŋun naah len tibɔbir u pu sakpen pu na; n‑yoonn mu ni len tibɔbir ti pu na, ni ye mbamɔn ke ni len Uwumbɔr la.”

⁹ Moses nan bui Aaronn ke, “Tuk binib ngbaan mɔmɔk ke bi dan nan sil Uwumbɔr aanimbiin ni, ba pu? u ŋun baah len tibɔbir u pu pu na.”

¹⁰ Aaronn aah bui bi kina na, le bi mɔmɔk fenn binimbil toŋ nteersakpiin wɔb, le libuul ngbaan ni Uwumbɔr aajinjiir aawiihn na nyan bi chee ntaalangbam ni.

¹¹ Le Uwumbɔr bui Moses ke,

¹² “Israel yaab aah len tibɔbir m pu pu na, m ŋun. Tuk bi ke kijook kee bi ga kan tinann ki ŋmɔ, le fen kichakpiik ni bi ga fe kan tijikaar timɔk bi ban na, le ki ga bee ke min, Uwumbɔr, le ye Bidindaan.”

¹³ Kijook ngbaan le kichakpeepaak fii nan lir ki gbiin linampal, le ni woln kichakpiik ni, le limaln lir goln linampal.

¹⁴ N‑yoonn mu limaln baal na, le bi kan tijikaar tibaa aaboln nteersakpiin ngbaan ni. Ti nan diin ki soon ki naahn ŋitaatakpal la.

¹⁵ N‑yoonn mu Israel yaab kan tijikaar ngbaan na, baa nan bee ti, le ki baa tɔb ke, “Ni ye ba?” Le Moses bui bi ke, “Tijikaar ti Uwumbɔr bui ke u ga tii nimi, ni ji na, le na.

¹⁶ Uwumbɔr bui ke lidichal mɔmɔk ban tijikaar ngbaan ki ŋeer nwiin mubaa, naah ga ŋmaa ji pu na, kuruwaa ubaa ŋeer unii ubaa.”

¹⁷ Israel yaab nan ŋa kina la, ngem nan ban tijikaar ngbaan ki jer bibaa, le biken mu nan ban taa fuu bi.

¹⁸ N‑yoonn mu bi ti ŋaŋ ti na, bi ba ban ki jer biken na, baajikaar aa ki wiir, le bi ba ban siib na aajikaar ti ki ŋeer bi, bi ji. Bi mɔmɔk nan ban ŋeer bibaa la.

¹⁹ Le Moses bui bi ke, “Ubaa taa gur tijikaar ngbaan ti woln kitaak.”

²⁰ Ngem aa nan ŋun tii Moses, le ki gur tijikaar ngbaan. Naah woln na le tijikaar ngbaan kpaln ŋikpaambil le ki bur ki nu, le Moses gee liŋuul bi pu.

²¹ Kichakpiik mɔmɔk ni, bi mɔmɔk nan ban tijikaar ngbaan ŋeer bibaa la; le nwiin yaa toŋ kan, le tijikaar ti gur dɔ kitiŋ na donn.

²² Winloob daal kan, le bi mɔmɔk ban ti nfum mulee pu, ki ŋeer nwiin ngbaan daal ni kitaak ki ga woln na mu, kuruwaa bilee ŋeer unii ubaa. Le binib ngbaan aaninkpiib dan ki nan tuk Moses baah ŋani pu na,

²³ le u bui bi ke, “Uwumbɔr siin nkaal ke fen fe ye lifuur aawiin la, le ki tii u. Din wee, ni ken naah ban ni ken tijikaar ti na, ki ŋaan naah ban ni ŋaan ti na mu. Ti gur na kan, ni di siin kiir fen.”

²⁴ Le Moses aah siin bi pu na, bi nan di tijikaar ti gur na siin, le ni woln kitaak, le taa bii, ŋikpaambil mu aa koo ti ponn ni.

²⁵ Moses nan bui bi ke, “Din wee, ni li ji tijikaar ti ni kpa na man, ba pu? din ye likpaakool daal, nwiin mu ye lifuur daal ki tii Uwumbɔr na, naan kan tijikaar ngbaan kitiŋ din wee.

²⁶ Ni ban tijikaar ngbaan ki ti saa winloob daal, winlole daal ye lifuur daal la, tijikaar tibaa aan li bi, ni ban ti.”

²⁷ Winlole daal le binib ngbaan bibaa buen bi ti ban tijikaar ngbaan, le kaa kan nibaa.

²⁸ Le Uwumbɔr bui Moses ke, “Ni ga yunn ki ti saa bayoonn aan nimi maanib ga nin kii tii mi ki joo maakaal?

²⁹ Ni teer ke min Uwumbɔr le tii nimi lifuur aawiin, nima pu le winloob daal kan, m tii nimi tijikaar ti ŋeer iwiin ilee aajim na. Ni mɔmɔk ga li bi nimi aadichal ponn ni, winlole daal, ki taa nya buen nibaa chee.”

³⁰ Kina pu na, binib ngbaan aa nan tun lituln winlole daal.

³¹ Israel yaab ngbaan nan yin tijikaar ngbaan ke mana. Ti nan bi ke njikaabim waatiir na, le ki piin, ki mɔ ke maab u bi di tisiir ŋa u na.

³² Le Moses bui bi ke, “Uwumbɔr siin nkaal ke ti siin mana aajikaar ngbaan siib, ti li si aan tiyaabitiib mu nan kan ti, nima kan, bi ga nan kan tijikaar ti aaboln u nan tii timi aan ti jin nteersakpiin ni, waah nan nyan ni timi Ijipt aatiŋ ponn ni buyoonn na.”

³³ Moses nan bui Aaronn ke, “Ban kichichibik, ki lee mana aajikaar ti ga gbiin kuruwaa ubaa na aan ki di ŋa ki ponn ni, ki di ti siin Uwumbɔr aanimbiin ni, aan tiyaabitiib mu nan kan ti.”

³⁴ Uwumbɔr aah nan bui Moses pu na, le Aaronn di ti ŋa Uwumbɔr Aakaal Aadakaa chee, ke ti li bi.

³⁵ Israel yaab nan jin mana aajikaar ŋibin imonko ilee, le ki ti nin fuu Kanaann aatiŋ ni, le ki kal nima.

³⁶ Baah nan joo tiwan ni ŋaŋni n‑yoonn ngbaan na, ni naahn dandana aakuruwaa kipiik la.