Nnyam 14 - Uwumbɔr aagbaŋ

Israel yaab aah nan puur Nnyusakpem Mamam pu na

¹ Uwumbɔr nan bui Moses ke,

² “Tuk Israel yaab ke bi fenn ki ti kal Pi Hahirof, ni bi Migdol ni Nnyusakpem Mamam aakaasisik ni na, ki gbɔk Baal Sefonn chee na.

³ Ubɔr ngbaan ga li dak ke Israel yaab yenn le ki chuun kitiŋ ngbaan ni, ki bi nteersakpiin ni, kaa ŋmaa nya.

⁴ M ga cha usui pɔɔk, le u ga fii paan ni ni pu, le maah ga nyaŋ ubɔr ngbaan pu na, m ga kan kipak kina pu. Le Ijipt yaab ga bee ke min le ye Uwumbɔr.” Israel yaab nan ŋa Moses aah tuk bi pu na.

⁵ Buyoonn ubɔr ngbaan ŋun ke binib na san ŋmar na, le u ni waaninkpiib kpeln bisui le ki kpokl ki bui ke, “Ti ŋa ba kina? Ti cha Israel yaab san ŋmar a, le taa ki kpa binaagbiib.”

⁶ Le ubɔr ngbaan yin waajab, le ki ban waatɔb aatɔroku, le ki gor ubaa pu.

⁷ Le u ni waajab, ni baaninkpiib, ni waatɔroku tiib, ki kpee waatɔroku ikui iloob bi pɔɔ sakpen na, siir buen.

⁸ Uwumbɔr nan cha ubɔr ngbaan aasui pɔɔk, le u di paan Israel yaab bi nan nyan buen linyaŋ ni na aapuwɔb.

⁹ Le Ijipt yaab aajab, ni baataan, ni baatɔroku tiib, ni binib bi ŋaal tɔroku tiib na di paan bi pu, le ki ti pii bi, baah nan kal nin chee, Nnyusakpem Mamam mu bi gbɔk Pi Hahirof ni Baal Sefonn chee na.

¹⁰ N‑yoonn mu Israel yaab kan ubɔr ngbaan ni waajab paa ni bi pu na, le ijawaan chuu bi, le bi wii yin Uwumbɔr ke u ter bi,

¹¹ le ki bui Moses ke, “Ŋikaakul aa bi Ijipt aatiŋ ponn ni la aa? Aa nyan ni timi ke ti nan kpo nteersakpiin mue ni la aa? Lik saah ŋa pu na, ki nyan ni timi Ijipt aatiŋ ni.

¹² Taah nan ban ti nya na, taa nan tuk si ke kina ga ŋa aa? Ti nan tuk si ke aa cha ti li bi Ijipt yaab chee ki li ye baanaagbiib. Ti yaa ba ye binaagbiib kan, ni ba ga li soor ti pu ni taah ga kpo nteersakpiin mue ni fam pu na.”

¹³ Moses nan giin bui bi ke, “Taa san ijawaan man. Sil chob man, ni ga kan Uwumbɔr aah ga ŋa pu ki gaa nimi lii din wee na. Naan ki kan Ijipt yaab bee daalbaadaal.

¹⁴ Uwumbɔr le ga to butɔb ngbaan tii nimi, naan li kpa nibaa ni ŋa butɔb ngbaan ni.”

¹⁵ Uwumbɔr nan bui Moses ke, “Ba ŋa ni wii ki ban nterm? Tuk binib ngbaan ke bi li chuun.

¹⁶ Yoor saajaangbeek paacham ki di mɔk nnyusakpem ngbaan. Nnyun ngbaan ga yakr, le Israel yaab ga ŋmaa chuun kitikuun pu ki jer nnyusakpem ngbaan aasisik ni.

¹⁷ M ga pɔɔk Ijipt yaab aajab ngbaan aasui, le bi ga paan ni pu, le m ga nyaŋ ubɔr ngbaan, ni waajab, ni waatɔroku tiib, ni bijab bi ŋaal bi na mɔmɔk, ki kan kipak bi pu.

¹⁸ N‑yoonn mu m nyaŋ bi na, le Ijipt yaab ga bee ke min le ye Uwumbɔr.”

¹⁹ Uwumbɔr aatuun, u ba loln Israel yaab pu nsan na gir buen bipuwɔb. Le ntaalangbam na mu buen ki ti sil Ijipt yaab ni Israel yaab aakaasisik ni.

²⁰ Ntaalangbam ngbaan nan cha ni bɔnn Ijipt yaab chee, le ki tee ye nwiihn Israel yaab wɔb, nima pu na, kinyeek ngbaan, ŋitimbol ŋilee ngbaan aa nan ŋmaa ŋɔŋ tɔb pu le kitaak ti woln.

²¹ Moses nan yoor uŋaal paacham ki mɔk nnyusakpem ngbaan, le Uwumbɔr cha libuln nyan ni liwipuul wɔb ki daa nnyusakpem ngbaan pu, le ki kiir mu, le mu yakr tɔb chee. Libuln ngbaan nan daa kinyeek ki ti woln kitaak, le ni kuur. Nnyun ngbaan nan yakr tɔb chee,

²² le Israel yaab chuun nnyusakpem ngbaan ni, kitikuun pu, le nnyun ngbaan kpaln ŋigon ki sil ŋipepel mɔmɔk ŋilee.

²³ Le Ijipt yaab aajab, ni baataan, ni baatɔroku tiib, ni bijab bi ŋaal bi na, di paan bi pu nnyusakpem ngbaan aakaasisik ni.

²⁴ Naah ti chaa woln ni na, le Uwumbɔr bi ntaalangbam ni, mmii ponn ni, le ki lik waa Ijipt yaab aajab, le ki cha ijawaan chuu bi.

²⁵ U nan cha baatɔroku tiib aataa chɔi kitiŋ, le baa ki ŋmaa chuun mala mala. Le Ijipt yaab bui ke, “Uwumbɔr le bi to butɔb ngbaan tii Israel yaab. Cha ti gir nya do chee na man.”

²⁶ Uwumbɔr nan ki bui Moses ke, “Yoor aaŋaal paacham ki mɔk nnyusakpem ngbaan, nnyun ngbaan ga gir kpaan tɔb ni, ki biin Ijipt yaab, ni baatɔroku tiib, ni bijab bi ŋaal bi na pu.”

²⁷ Nima pu le Moses nan yoor uŋaal ki di mɔk nnyusakpem na, le lichakpitaawoln wɔb, nnyun ngbaan ki gir kpaan tɔb ponn ni, ki naa tɔb ke mu aah ba bi pu na. Le Ijipt yaab nan ban bi san ŋmar, le Uwumbɔr moo di bi mee lii nnyun ngbaan ni.

²⁸ Le nnyun gir biin baatɔroku tiib, ni bijab bi ŋaal bi na, ni Ijipt yaab aajab bi nan paan Israel yaab na pu, ubaa aa nan ki gur.

²⁹ Israel yaab ma nan chuun kitikuun pu le nnyusakpem ngbaan ni, le mu kpaln ŋigon ki si ŋipepel mɔmɔk ŋilee.

³⁰ Liyaadaal ngbaan le Uwumbɔr nan gaa Israel yaab Ijipt yaab chee lii, le Israel yaab kan baah kpoi ki dɔ nnyun ngbaan aagbaan pu na.

³¹ N‑yoonn mu Israel yaab kan Uwumbɔr aah di waapɔɔn nyaŋ Ijipt yaab na, le ni ŋa bi tifaan Uwumbɔr aah ŋa pu na, le bi gaa Uwumbɔr ni waatutunn Moses ki kii.