Nnyam 13 - Uwumbɔr aagbaŋ

Israel yaab aah di baajan aabijabim di tii Uwumbɔr pu na

¹ Uwumbɔr nan bui Moses ke,

² “Ni di njan aabijabim tii mi; Israel yaab aah ma njan aabijabim bi na, ni baawakor aajan aabim mɔmɔk ye min yaan la.”

Boroboro u kaa kpa nnyɔk na aajim

³ Moses nan bui binib ngbaan ke, “Teer nwiin mue daal man, nwiin mundaal ni nyan Ijipt aatiŋ ni, nin chee ni nan ye binaagbiib na. Nwiin mue daal le Uwumbɔr di waapɔɔn nyan ni nimi. Ni taa ji boroboro u kpa boroboro aanyɔk na.

⁴ Ni ga nya Ijipt aatiŋ ni, nwiin mue daal la, njan aaŋmal u bi yin u ke Abib na.

⁵ Uwumbɔr nan puu tipuur tii niyaajatiib ke u ga di kitiŋ ki ye Kanaann yaab, ni Hef yaab, ni Amor yaab, ni Hif yaab, ni Jebus yaab aatiŋ na ki di tii nimi la. U yaa nyan nimi ki joo nimi ti fuu kitiŋ ngbaan ki kpa tiwakor aamoŋmɔpaan ni ŋisubil sakpen na ni na kan, ni pɔɔ nibaa ki li toor Lakr‑jer aajim ngbaan, njan aaŋmal libiln mɔk ni.

⁶ Iwiin ilole, ni li ŋmɔ boroboro u kaa kpa nnyɔk na, le winlole daal, ni ŋa njim ki nyuŋ Uwumbɔr.

⁷ Iwiin ilole, ni taa ŋmɔ boroboro u kpa boroboro aanyɔk na; boroboro aanyɔk, bee boroboro u kpa nnyɔk na taa li bi ubaa do, nimi aatiŋ ni.

⁸ Ni yaa piin Lakr‑jer aajim ngbaan kan, ni kpiir tuk nimi aabijabim ke ti ŋani kina ki teer Uwumbɔr aah nan ŋa pu tii timi, buyoonn ti nan nyan Ijipt aatiŋ ni na la.

⁹ Ni yaa ti ŋa kina kan, le ni ga teer nimi; ni ga li naahn ke naah di tiwan nibaa le gbin niŋaal pu, bee ni di tam niyigbeer na la, ni ga teer nimi, le ni ga li len ki bae Uwumbɔr aakaal, ba pu? Uwumbɔr le di waapɔɔn nyan ni nimi Ijipt aatiŋ ni.

¹⁰ Njim ngbaan aawiin yaa ti fuu ni libiln mɔk ni kan, ni ji njim ngbaan.

Njan aabo aabɔr

¹¹ “Uwumbɔr ga di nimi buen Kanaann aatiŋ ki u nan puu tii nimi ni niyaajatiib na ni. Ni yaa bi nima chee kan,

¹² see ni di njan aabijabo mɔk ki di tii Uwumbɔr. Le tiwakor mu aajan aabo ni ye uja na mu ye Uwumbɔr yaan la,

¹³ tɔ, see ni ki gir di upihjabo kpeln njan aabonbo u ye uja na Uwumbɔr chee. Ni yaa kaa gee ke ni daa ubonbo u na kan, ni nyii koo usil. Nimi aabijabim ma kan, see ni ki gir daa bi Uwumbɔr chee.

¹⁴ N‑yoonn mu choo na, saabijabo yaa baa si naatataa kan, aa bui u ke, ‘Uwumbɔr nan di waapɔɔn le nyan ni timi Ijipt aatiŋ ni, nin chee ti nan ye binaagbiib na.

¹⁵ Buyoonn Ijipt aabɔr nan pɔɔk usui, kaa kii ke ti nya waatiŋ ni na, le Uwumbɔr nan ku Ijipt yaab aajan aabijabim mɔmɔk, binib ni tiwakor mu. Nima pu le ti joo kiwakork aajan aabo u ye uja na toor kitork tii Uwumbɔr, le ki tee gir daa timi aajan aabijabim ma.

¹⁶ Ti ŋani kina le ki teer, le ni naahn ke taah di tiwan nibaa le gbin tiŋaal, bee ti di tam tiyigbeer na; ni cha ti teer ke Uwumbɔr le di waapɔɔn sakpiin na nyan ni timi Ijipt aatiŋ ni.’”

Uwumbɔr aah nan lolni Israel yaab pu nsan pu na

¹⁷ N‑yoonn mu Ijipt aabɔr ngbaan nan tii nsan ke binib ngbaan nya ki li cha na, Uwumbɔr aa nan cha bi dii Filistia aasan, nsan ngbaan mu le nan geei kaa daa. Uwumbɔr nan dakl ke, “Maa ban binib ngbaan kpeln baalandak ki gir buen Ijipt aatiŋ ni buyoonn bi kan ke bi ga to butɔb nsan ni na.”

¹⁸ Nima pu na, u nan di bi mann dii nteersakpiin pu ki toŋ Limɔɔkal Aanyusakpem wɔb. Israel yaab nan gor bi to butɔb.

¹⁹ Moses nan cha bi yoor Josef aakpab ki di buen; ba pu? Josef aah nan ban u kpo na, u nan cha Israel yaab puu tipuur kina. Josef nan bui ke, “N‑yoonn mu Uwumbɔr nan gaa nimi lii aan ni ban ni nya na kan, ni yoor maakpab nya do ki di buen.”

²⁰ Israel yaab nan nyan Sukof le ki sil Etam aapepel, nteersakpiin aagbaan.

²¹ Nwiin pu kan, Uwumbɔr nan bi ntaalangbam ni, le ki loln binib ngbaan pu nsan, le kinyeek kan, u bi mmii ni, ki wiin bi pu, nima kan, bi ga ŋmaa li chuun nwiin pu ni kinyeek.

²² Ntaalangbam ngbaan le nan loln bi pu nsan nwiin pu, le mmii mu loln bi pu nsan kinyeek.