Nnyam 12 - Uwumbɔr aagbaŋ

Lakr‑jer aajim

¹ Uwumbɔr nan bui Moses ni Aaronn, Ijipt aatiŋ ni ke,

² “Uŋmal wee le ga li ye njan aaŋmal libiln ni, ki tii nimi.

³ Di tibɔr tee tuk Israel yaab mɔmɔk: Njan aaŋmal ngbaan ponn ni, iwiin kipiik daal, udichajoor mɔmɔk chuu upiih, bee uŋoob, waawakor ponn ni, ki ŋeer waadichal.

⁴ Waadichal yaa kaa wiir, kaan ŋmaa ŋmɔ kiwakork ngbaan aanann doo kan, bi ni lidichal waatiir liken yaab ga ŋmaa kpaan kiwakork, aan bi yakr tinann ti ŋeer unii mɔk aah ga ŋmaa ŋmɔ pu na.

⁵ Ni ga ŋmaa nyan upihjabo, bee uŋojabo; kiwakork ngbaan mu li ye libiln libaa aawakork, ki taa li kpa iween ibaa.

⁶ Uŋmal ngbaan aawiin kipiik ni inaa daal aajoobɔŋ kan, Israel yaab mɔmɔk kpaan ki kɔr baawakor ngbaan.

⁷ Binib ngbaan ga teŋ tiwakor ngbaan aasin ki di gbaa baadir ti ponn ni bi mɔmɔk ga kal baadichal ni ki ŋmɔ tinann ngbaan na aabisamɔi.

⁸ Kinyeek ngbaan le bi ga pu tinann ngbaan mɔmɔk, ki kpaan di ti ni tifar ti cho na, ni boroboro u kaa kpa boroboro aanyɔk na, ki ŋmɔ ni mɔmɔk ŋmal tɔb ni.

⁹ Bi taa ŋmɔ ti tikaab, ki taa ŋaan ti mu, bi pu ti, ki kpee ŋiyil, ni ŋitaa, ni ponn ni aawan mɔmɔk.

¹⁰ Ni taa gur ti ki woln kitaak; tibaa yaa gur, baa ŋmaa ŋmɔ ti doo kan, bi see ti mmii.

¹¹ Ni li ŋmɔ ti mala mala, ki pee nimi aawan, ki gor lisachuln, ki tak nimi aanaatak, ki li joo nimi aadabil niŋaal ponn ni. Lakr‑jer aajim mue ponn ni, le ni ga nyuŋ mi Uwumbɔr.

¹² “Kinyeek ngbaan le m ga chuun Ijipt aatiŋ ni, ki ku njan aabijabim mɔmɔk, binib ni tiwakor mɔmɔk, ki daa Ijipt yaab aawaa aatafal. Min le ye Uwumbɔr.

¹³ Nsin mu ni di boon ibisamɔi na le ga li ye limɔkl ke nimi Israel yaab aadichal le na. N‑yoonn mu m kan nsin ngbaan na kan, m ga lakr jer ni pu, kaan kpaan ni ni Ijipt yaab ki daa ni mu aatafal.

¹⁴ N‑yoonn mɔmɔk kan, ni pɔɔn nibaa ki li ji njim mue, aan ki li teer min Uwumbɔr aah ŋa pu na pu. Ni li ŋani kina n‑yoonn mu mɔmɔk choo na ni.”

Boroboro u kaa kpa nnyɔk na aajim

¹⁵ Uwumbɔr nan bui ke, “Iwiin ilole aakaasisik ni, ubaa taa ŋmɔ boroboro u kpa boroboro aanyɔk na, ni li ŋmɔ boroboro u kaa kpa nnyɔk na ŋmeen. Njan aawiin daal, see ni nyan boroboro aanyɔk mu bi nimi aadichal ponn ni na mɔmɔk; iwiin ilole ngbaan aasisik ni, ni ponn ni ubaa yaa ŋman boroboro u kpa boroboro aanyɔk na kan, maan ki yin u maanii.

¹⁶ Njan aawiin, ni winlole daal, ni kuun ni tɔb ki nan doon mi. Ubaa taa tun lituln libaa iwiin ngbaan ni; ni mu tee ga ŋmaa ŋa tijikaar ki ji.

¹⁷ Ni li teer njim ngbaan aabɔr ki li joo mu, ba pu? nwiin ngbaan daal le m nyan nimi aanibol Ijipt aatiŋ ponn ni. N‑yoonn mu choo na, ni li teer njim ngbaan aawiin daal, ki li nyuŋni mu.

¹⁸ Njan aaŋmal aawiin kipiik ni inaa daal aajook ki ti saa iwiin moninko ni mubaa daal aajook na, ni ponn ni ubaa taa ŋmɔ boroboro u kpa boroboro aanyɔk na.

^19-20 Iwiin ilole ngbaan aakaasisik ni, ubaa taa li kpa boroboro aanyɔk udo lichiln ni, nimi ntimbim, bee uchaan, yaa ŋman boroboro u kpa boroboro aanyɔk na kan, waan ki li ye maanii kpala.”

Njan Aalakr‑jer aajim

²¹ Moses nan yin Israel yaab aaninkpiib mɔmɔk le ki bui bi ke, “Ni mɔmɔk bi ye bidichadam na ga chuu upihjabo, bee uŋojabo, waawakor ponn ni, ki kɔr u, aan ni ni nimi aamaal kpaan ji Lakr‑jer aajim.

²² Ni ban tifar, ki di bɔ nsin mu ni teŋ na ponn ni, aan ki di mu boon nimi aadir aabisamɔi. Ni ni nimi aabim ponn ni ubaa taa nya lipaal kinyeek kee, see kichakpiik ni.

²³ N‑yoonn mu Uwumbɔr yaa nan dan ke u chuun Ijipt aatiŋ ni ki ku bi na kan, u yaa nan kan nsin ngbaan nimi aadichal aabisamɔi pu kan, waan cha nkun aatuun koo nimi aadichal ni ki ku nimi.

²⁴ Ni ni nimi aabim li joo nkaal ngbaan tiŋann ki cha n‑yoonn mu kaa kpa ndoon na.

²⁵ N‑yoonn mu ni ti koo kitiŋ ki Uwumbɔr puu ke u ga di tii nimi na ni kan, ni li toor kitork ngbaan tiŋann,

²⁶ aan nimi aabim yaa baa nimi ke, ‘Kitork ngbaan aatataa ye kinye?’ kan,

²⁷ ni bui bi ke, ‘Ni ye Lakr‑jer aatork ki ti ŋani ki nyuŋni Uwumbɔr na la, ba pu? njan aatork ngbaan daal le u nan lakr jer timi Israel yaab aadichal pu, Ijipt aatiŋ ponn ni. U nan ku Ijipt yaab, le ki di cha timi.’” Moses aah len kina doo na, le Israel yaab nan gbaan kitiŋ le ki doon Uwumbɔr.

²⁸ Le bi siir buen le ki ti ŋa Uwumbɔr aah bui Moses ni Aaronn ke bi ŋa pu na.

Njan aabim aakun

²⁹ Kinyetaasiik le Uwumbɔr ku njan aabim mɔmɔk Ijipt aatiŋ ponn ni, ubɔr aajapɔpol u ga nan ji nnaan na hali ki ti saa biyom bi bi tiyondir ni na aajan aabim, ki kpee tiwakor mu aajan aabim.

³⁰ Kinyeek ngbaan, le ubɔr ni waaninkpiib, ni Ijipt yaab mɔmɔk nan fii ngeen pu. Le Ijipt yaab aadichal mɔmɔk ni binib nan kaani ki wii, ni kookoo, ba pu? lidichal le aa nan gur unii aa kpo li ponn ni.

³¹ Kinyeek ngbaan le ubɔr nan tun yin ni Moses ni Aaronn ki bui bi ke, “Li chaa nya man, ni ni Israel yaab. Nya man maatiŋ ni, li cha ki ti doon Uwumbɔr naah ban pu na.

³² Li joo nimi aawakor cha man, ki ti mee ke Uwumbɔr ŋa m pu tinyoor.”

³³ Ijipt yaab nan muk bi ke bi ŋa mala mala ki nya baatiŋ ponn ni. Bi nan bui ke, “Ni yaa kaa nyan timi aatiŋ ni kan, ti ga kpoi doo.”

³⁴ Nima pu na, Israel yaab nan ban n‑yon mu kaa kpa nnyɔk na ki gbiin tiwan ponn ni, ki di ŋikeken poo le ki di buŋ bibɔgbin pu.

³⁵ Bi nan ŋa Moses aah bui bi ke bi ŋa pu na, le ki mee Ijipt yaab salmaa, ni tikunabr aatakpanyaan, ni ŋikeken.

³⁶ Uwumbɔr nan cha Ijipt yaab pak binib ngbaan le ki tii bi baah ban tiwan nimɔk na. Kina pu na, Israel yaab nan gaa Ijipt yaab aawankpal le ki di buen.

Israel yaab aah nyan Ijipt aatiŋ ni pu na

³⁷ Israel yaab nan nyan Rameses aatiŋ ki chuun bitaa pu ki cha Sukof. Bi nan ye bijab ŋichur ikui iloob, baa nan kahn bipiib ni mbim kpaan bi ponn ni.

³⁸ Kinipaak kiken, ni tiwakor pam mu nan dii bi buen.

³⁹ Bi nan di boroboro aayon mu kaa kpa nnyɔk na le ki ŋa boroboro, ba pu? bi nan jenn nyan bi Ijipt aatiŋ ni mala sakpen, nima pu le baa nan ŋmaa gor ki ŋa tijikaar waahr le ki nin nyan Ijipt aatiŋ ni.

⁴⁰ Israel yaab nan bi Ijipt aatiŋ ponn ni ŋibin ikui inaa ni piitaa la.

⁴¹ Nwiin mundaal ŋibin ikui inaa ni piitaa doo na, le Uwumbɔr aanibol aanib ngbaan nan nyan Ijipt aatiŋ ponn ni.

⁴² Kinyeek ngbaan le Uwumbɔr nan lik bi le ki nyan ni bi Ijipt aatiŋ ni. N‑yoonn mɔmɔk, kinyeek ngbaan daal yaa fuu ni kan, see Israel yaab nyuŋ Uwumbɔr kinyeek ngbaan, kaa geeni.

Israel yaab aah ga joo Lakr‑jer aajim pu na

⁴³ Uwumbɔr nan bui Moses ni Aaronn ke, “Naah ga li joo Lakr‑jer aajim pu na sɔ: Biwɔwɔm taa kpaan ji Lakr‑jer aajikaar ni chee,

⁴⁴ le naah daa binaagbiib bi na mu aan ji mu, see ni gii bichakpan waahr.

⁴⁵ Unii u koo nido kaan yunn na, bee upaaja, taa ji njim ngbaan aajikaar.

⁴⁶ Njim ngbaan aajikaar mɔmɔk li bi lidichal li ponn ni bi ŋa ti na, mmaal ngbaan kpaan ji tijikaar ngbaan, ki taa di ti nya lipaal. Ni taa wii kiwakork ngbaan aakpabl libaa.

⁴⁷ Israel yaab mɔmɔk kpaan toor njim ngbaan,

⁴⁸ le unii u kaa gii uchakpaln na aan ŋmaa ji kitork ngbaan aajikaar. Uwɔwɔnii yaa nan kal ni chee ki ban u kpaan toor Lakr‑jer aatork ngbaan ki nyuŋ Uwumbɔr kan, see ni pue gii bijab bi bi baamaal ponn ni na aachakpan. N‑yoonn ngbaan na, u kpaln Israel yaab ponn ni ubaa le na, ki ga ŋmaa kpaan ni chee ki toor kitork ngbaan.

⁴⁹ Ni ye kina le ki tii nimi Israel aatimbim, ni biwɔwɔm bi bi ni chee na mu.”

⁵⁰ Israel yaab mɔmɔk nan kii tii Moses ni Aaronn, le ki ŋa Uwumbɔr aah bui bi ke bi ŋa pu na mɔmɔk.

⁵¹ Liyaadaal ngbaan le Uwumbɔr nan nyan Israel aanibol Ijipt aatiŋ ni.