Nnyam 11 - Uwumbɔr aagbaŋ

Moses nan moon njan aabim aah ga kpo pu na

¹ Uwumbɔr nan bui Moses ke, “Ntafadaan mubaa le gur, le m ga di daa ubɔr ngbaan ni waanib Ijipt yaab aatafal. Nee aapuwɔb na, u ga cha ni nya ki buen. Mbamɔn, u ga jenn nimi ke ni nya waatiŋ ponn ni.

² Dandana wee, len saanib Israel yaab chee, ki bui bi ke bi buen Ijipt yaab bi ye bijɔtiib na chee, ki ti mee bi salmaa ni tikunabr aatakpanyaan.”

³ Uwumbɔr nan cha Ijipt yaab tii Israel yaab kipak. Mbamɔn, ubɔr aaninkpiib ni binib ngbaan mɔmɔk nan bee ke Moses ye uninyuun la.

⁴ Moses mu nan ki bui ubɔr ngbaan ke, “Uwumbɔr bui ke, ‘Kinyetaasiik kan, m ga mann Ijipt aatiŋ mɔmɔk,

⁵ le njan aabijabim mɔmɔk ga kpoi, hali ubɔr aajan aabijabo u ga ji nnaan na, ki ti saa unaagbiipii u nan n‑yon na aajan aabijabo mu ga kpo. Le tiwakor aajan aabim mu ga kpoi.

⁶ Ijipt yaab ga li kaani ki wii pam ke baah kaa kee ŋa pu na, ki mu aan ki ŋa kina.

⁷ Le ubɔ aan ŋmaa gbei Israel yaab ni baawakor ma. Nima le ni ga bee ke min Uwumbɔr le yakr ki gee Israel ki di cha Ijipt yaab.’”

⁸ Moses aah ti ban u len tibɔr mɔmɔk doo na le u bui ke, “Saaninkpiib mɔmɔk ga dan m chee ki nan gbaan nnimbiin ni, ki ga gaŋ mi ke m di maanib mɔmɔk nya ki buen. Nee aapuwɔb le m ga nya.” Liŋuul nan joo Moses, le u siir ubɔr ngbaan chee.

⁹ Uwumbɔr nan puun bui Moses ke, “Ubɔr ngbaan ga li beenin pɔɔni usui, kaan ŋun tii si, nima le ga cha m ŋa lijinjiir aatun Ijipt aatiŋ ponn ni.”

¹⁰ Tɔ, Moses ni Aaronn nan ŋa lijinjiir aatun ŋimina mɔmɔk ubɔr ngbaan aanimbiin ni, le Uwumbɔr nan cha usui pɔɔk, le waa kii ke Israel yaab nya waatiŋ ni.