Nnyam 10 - Uwumbɔr aagbaŋ

Itoon aafalaa

¹ Uwumbɔr nan bui Moses ke, “Buen ki ti kan ubɔr ngbaan. M cha u ni waaninkpiib aasui pɔɔk, nima kan, m ga ŋmaa ŋa lijinjiir aatuln, binib ngbaan aanimbiin ni,

² le ni mu ga ŋmaa tuk nimi aabim, ni niyaabitiib, maah tun lijinjiir aatuln, ki cha Ijipt yaab kpaln bijɔrb pu na. Ni mɔmɔk ga bee ke min le ye Uwumbɔr.”

³ Moses ni Aaronn nan dii buen ubɔr ngbaan chee, le ki ti bui u ke, “Hiibru yaab Aadindaan Uwumbɔr bui ke, ‘N‑yoonn mulamu aa ga diŋ aasui pu, ki kii tii mi? Cha maanib ngbaan buen, nima kan, bi ga ti ŋmaa doon mi.

⁴ Aa yaa beenin kii maanib ngbaan ke bi taa buen kan, fen m ga fe cha itoon lir kitiŋ kee pu.

⁵ I ga li wiir sakpen a, le ki ga ŋmɔ tiwan ni mɔmɔk ŋitaatakpal aa nan bii na, ni isui mɔmɔk mu, ki biin kitiŋ mɔmɔk pu.

⁶ I ga gbiin libɔrdichal, ni saaninkpiib ni saanib mɔmɔk do. I ga li wiir ki jer niyaajatiib aah kaa kee kan lijinjiir aawan ni na.’” Le Moses fenn ki siir buen.

⁷ Le ubɔr aaninkpiib ngbaan bui u ke, “N‑yoonn mulamu uja wee ga di cha ki taa ki daa titafal? Cha Israel yaab ngbaan li cha, nima kan, bi ga ŋmaa buen ti doon Bidindaan Uwumbɔr. Saa kan ke Ijipt bii doo oo?”

⁸ Bi nan yin ni Moses ni Aaronn ubɔr chee, le u nan bui bi ke, “Ni ga ŋmaa buen ti doon Nidindaan Uwumbɔr. Ŋma mam mu ga buen?”

⁹ Moses nan bui u ke, “Ti mɔmɔk ga buen la, bi pɔɔk na, ni bi diin na, ni timi aabim, ni timi aapiih, ni iŋoob, ni inaa, ba pu? ti ga ti ji njim ki nyuŋ Uwumbɔr nima.”

¹⁰ Le ubɔr ngbaan bui ke, “M puu Uwumbɔr ke maan cha ni di nimi aapiib ni mbim buen. Ni mɔk ke ni ban tibɔr la.

¹¹ Aayii. Ni yaa ban ke ni ti doon Uwumbɔr kan, bijab baanja le ga buen ti doon u.” Ubɔr aah len kina doo na, le bi jenn nyan Moses ni Aaronn u chee.

¹² Uwumbɔr nan ki bui Moses ke, “Yoor aaŋaal paacham Ijipt aatiŋ kee pu, ki cha itoon dan kitiŋ ngbaan pu. I ga dan ki nan ŋmɔ timoor, ni tifar, ni tiwan ni nan ŋmar ŋitaatakpal ŋi jer na ni na.”

¹³ Moses nan yoor waajaangbeek, le Uwumbɔr cha libuln nyan ni liwipuul, le ki daa nwimɔn ni kinyeek mu. Ni ti woln kitaak kichakpiik ni na, le libuln ngbaan joo ni itoon.

¹⁴ I nan dii ni ŋiker ŋiker, le ki nan gbiin kitiŋ ngbaan ni. I nan wiir ki ti nyaŋ, ubaa aa kee kan itoon kina, le ubaa mu aan ki kan itoon kina aaboln.

¹⁵ I nan lir gbiin kitiŋ ni, le kitiŋ ti bɔnn. I nan ŋman timoor ni tifar ti nan gur na, ki kpee ŋisubil ŋi nan baa isui pu na. Timosɔnn ni tifasɔnn tibaa aa nan ki gur Ijipt aatiŋ ngbaan ni.

¹⁶ Ubɔr ngbaan nan ŋa mala le ki yin ni Moses ni Aaronn, le ki nan bui bi ke, “M tun titunwanbir Nidindaan Uwumbɔr, ni nimi chee.

¹⁷ Nimina ma kan, di cha pinn mi, ki mee Nidindaan Uwumbɔr ke u nyan nkun aawan nimina m pu.”

¹⁸ Le Moses siir ubɔr chee, ki ti mee Uwumbɔr.

¹⁹ Le Uwumbɔr cha libuln ngbaan kpeln ki daa nyan ni liwilir wɔb, le ki di itoon ngbaan mɔmɔk buen Limɔɔkal Aanyusakpem ponn ni. Utoon ubaa aa nan ki gur Ijipt aatiŋ ni.

²⁰ Uwumbɔr nan ki cha ubɔr aasui ki pɔɔk, le waa kii ke Israel yaab buen.

Mbɔmbɔɔn aafalaa

²¹ Uwumbɔr nan ki bui Moses ke, “Yoor aaŋaal paacham ki di mɔk kitaapaak, le mbɔmbɔɔn sakpiin ga lir ni, ki biin Ijipt aatiŋ pu.”

²² Moses nan yoor uŋaal ki di mɔk paacham, le mbɔmbɔɔn lir ki biin Ijipt aatiŋ ponn ni, iwiin itaa.

²³ Ijipt yaab aa nan ki waa tɔb, le bi ponn ni ubaa aa nan ŋmaa nyan waadichal ni ki buen nibaa chee. Le Israel yaab ma aah nan koo nin chee na nan kpa nwiihn.

²⁴ Le ubɔr ngbaan yin ni Moses ki nan bui u ke, “Aa ni saanib ngbaan nya ki li cha man, ki ti doon Uwumbɔr, hali nipuutiib, ni nimi aabim mu ga ŋmaa dii nimi buen. Ni mu taa di nimi aapiih, ni iŋoob, ni inaa buen, see ima bee do.”

²⁵ Le Moses nan giin bui u ke, “Kina kan, sin le ga ban tiwakor tii timi le ti ti toor kitork tii Tidindaan Uwumbɔr.

²⁶ Aayii, see ti di timi aawakor buen; kibaa kina aan gur do. Timi tibaa le ga nyan tiwakor ti ti gee na ki di toor kitork tii Tidindaan Uwumbɔr. Ti mu yaa kaa fuu nin chee ti cha na kan, taan ŋmaa bee tiwakor ti ti ban ti di toor kitork ngbaan na.”

²⁷ Uwumbɔr nan cha ubɔr ngbaan aasui too pɔɔk, le waa kii, ke bi taa nya waatiŋ ponn ni ki buen.

²⁸ Le u bui Moses ke, “Siir foor m chee. Aa taa ki cha m kan si daalbaadaal. Bundaal m kan si na kan, aa ga kpo.”

²⁹ Moses nan giin kii u ke, “Aa sil len mbamɔn la, saan ki kan mi daalbaadaal.”