Nkahm 9 - Uwumbɔr aagbaŋ

Lakr‑jer aajim

¹ Israel yaab aah nan nyan ni Ijipt aatiŋ ni, ki bi Sainai Aateersakpiin ni, lelee aabiln aajan aaŋmal ni na, le Uwumbɔr nan len Moses chee tibɔr,

^2-3 ki bui ke, “Uŋmal umina aawiin kipiik ni inaa daal kan, cha Israel aanib piin Lakr‑jer aajim, nwiin aah nan ti lir na, ki ŋa mu, mu aakaal aah mɔk pu na mɔmɔk.”

⁴ Nima pu na, Moses nan bui binib ngbaan ke bi ŋa Lakr‑jer aajim ngbaan.

⁵ Njan aaŋmal aawiin kipiik ni inaa daal aajook, le bi nan ŋa kina Sainai Aateersakpiin ni. Binib ngbaan nan ŋa Uwumbɔr aah mɔk Moses ke bi ŋa pu na mɔmɔk.

⁶ Tɔ, binib bibaa nan bi bi ponn ni, ki meeh linikpol ki bii bibaa, kina na, baa nan ŋmaa kpaan biken chee ki ŋa njim ngbaan liyaadaal. Le bi buen Moses ni Aaronn chee le ki ti bui bi ke,

⁷ “Ti meeh linikpol le ki bii tibaa, ba ŋa tima aan ŋmaa kpaan Israel yaab biken chee ki toor kitork tii Uwumbɔr?”

⁸ Moses nan bui bi ke, “Kiir mi man, aan m mee Uwumbɔr, u mɔk mi maah ga ŋa pu na.”

⁹ Uwumbɔr nan bui Moses ke,

¹⁰ “Tuk Israel aanib ngbaan ke n‑yoonn mu ni ponn ni ubaa, bee niyaabitiib, yaa ti meeh linikpol ki bii ubaa, bee u buen lisachuln kaa bi, ki ban ke u ŋa Lakr‑jer aajim na kan,

¹¹ lelee aaŋmal aawiin kipiik ni inaa daal kijook wɔb, udaan ngbaan mu ga ŋmaa ji njim ngbaan. Bi di boroboro u kaa kpa nnyɔk na, ni tifar ti cho na kpaan ji njim ngbaan.

¹² Bi taa ji gur tijikaar ngbaan tibaa ti woln kitaak, ki mu taa wii tiwakor ti bi di jin njim ngbaan na aakpabl libaa. Bi ji Lakr‑jer aajim ngbaan, mu aakaal aah mɔk pu na mɔmɔk.

¹³ Tɔ, unii umɔk bi linampal, kaa buen nsan, ki mu bi chain, ki yii kaa jin Lakr‑jer aajim ngbaan na kan, u li nyi ke waa ki ye maanii, ba pu? buyoonn ni ŋeer ke u tii mi ipiin na, waa ŋa kina, le u ga ji falaa kina pu.

¹⁴ “Uwɔwɔnja u koo ni chee na mu yaa ban u ji Lakr‑jer aajim ngbaan kan, see u dii mu aakaal aah mɔk pu na mɔmɔk. Utinbo ni uwɔwɔnja mɔmɔk ga dii nkaalbaan la.”

Ntaalangbam mu naahn mmii na aabɔr

^15-16 Nwiin mundaal bi gaa Uwumbɔr Aabool doo na, le ntaalangbam dan nan biin li pu. Kinyeek kan, mu nan bi ke mmii na la.

¹⁷ N‑yoonn mu ntaalangbam ngbaan ti fii nima chee na kan, le Israel aanib mu ti fii dii mu, ki ti kal mu aah ti sil nin chee na.

¹⁸ Uwumbɔr yaa bui bi ke bi fii nin chee na kan, see bi fii nima, le ki ti kal waah bui ke bi ti kal nin chee na. Ntaalangbam ngbaan yaa sil Libool ngbaan pu ki ti saa buyoonn na kan, bi mu nan ka nima chee le ki cha.

¹⁹ Ntaalangbam ngbaan yaa nan sil Libool ngbaan pu ki yunn kan, see bi kii tii Uwumbɔr aah ban pu na, le kaa fii nima chee.

²⁰ N‑yoonn mubaa kan, ntaalangbam ngbaan aa nan yunni nibaa chee, kina pu na, bi mu aa nan kaa yunni; le Uwumbɔr yaa bui bi ke bi fii kan, see bi fii nima.

²¹ N‑yoonn mubaa kan, ntaalangbam ngbaan ga sil nibaa chee kijook ki ti saa kichakpiik ni, le mu aah ti fii buyoonn na kan, bi mu fii dii ntaalangbam ngbaan. N‑yoonn mu ntaalangbam ngbaan fii na kan, le bi mu ti fii dii mu.

²² Ntaalangbam ngbaan yaa nan sil Uwumbɔr Aabool pu libuul libaa ni, iwiin ilee, bee uŋmal, bee libiln, bee ki yunn ti saa pu na kan, baa nan fii nima; tɔ, mu yaa ti siir kan, le bi mu fii dii mu.

²³ Uwumbɔr yaa nan bui Moses ke u ni binib ngbaan fii, bee bi kal buyoonn na kan, see bi kii tii u.