Nkahm 8 - Uwumbɔr aagbaŋ

Baah ga siin karyaa tiib pu na

¹ Uwumbɔr nan bui Moses ke,

² “Bui Aaronn ke u yaa ban u di karyaa tiib bilole na tɔŋ baawan pu kan, u di bi siin nin chee bi ga li wiin nimbiin ni na.”

³ Aaronn nan kii Uwumbɔr aah len pu na, le ki di karyaa tiib ngbaan di siin le bi lik karyaa aawan ngbaan aanimbiin ni.

⁴ Bi nan di ligagaar le gbaa salmaa le ki ŋa karyaa aawan ngbaan mɔmɔk, ki dii Uwumbɔr aah nan mɔk Moses ke bi ŋa pu na.

Baah toor ki ŋa Liifai yaab chain ki di bi tii Uwumbɔr pu na

⁵ Uwumbɔr nan bui Moses ke,

⁶ “Chuu yakr Liifai yaab Israel aanib biken chee,

⁷ ki dii maah ga mɔk si pu na aan ki toor bi chain; di nnyun mu aa joo toor ki ŋani tiwan chain na yɔk bi pu, aan ki tuk bi ke bi kuu biwon pu tikor mɔmɔk, ki finn baawanpeenkaan mu. Nima kan, bi ga li bi chain.

⁸ Bi ban unaajabo, ni n‑yon mu bi di olif aakpan buun mu na, ni li ye njikaabim aatork aapiin; le aa ga ban unaaja uken u li ye titunwanbir aatork aapiin.

⁹ Kuun ni Israel yaab mɔmɔk ki cha Liifai yaab sil Maabool aabisamɔb chee.

¹⁰ Cha Israel aanib ngbaan di biŋaal paan Liifai yaab aayil pu,

¹¹ le Aaronn ga di Liifai yaab ngbaan tii mi, bi li ye Israel yaab aapiinkpaan tii mi, bi li tun maatuln.

¹² Le Liifai yaab mu ga di biŋaal paan inaaja ilee na aayil pu; ni ga di ubaa toor titunwanbir aatork aapiin, ki di uken toor kitork ki ni ga di see mmii ni na aapiin, aan ni li ye kitork ki ga ŋa Liifai yaab ngbaan chain na.

¹³ “Di Liifai yaab ngbaan tii mi, bi li ye ipiinkpaan m chee, aan Aaronn ni ujapɔtiib li joo bi.

¹⁴ Ŋa kina aan ki yakr Liifai yaab, Israel yaab biken chee, nima kan, bi ga li ye min yaab.

¹⁵ Aa yaa toor ki ŋa Liifai yaab chain ki di bi tii mi kan, bi ga ŋmaa tun Maabool ni aatuln.

¹⁶ M nyan bi ke bi li si Israel yaab aajan aabijabim aasisiiyaan la, aan bi li ye min baanja yaab.

¹⁷ N‑yoonn mu m nan ku njan aabim mɔmɔk Ijipt aatiŋ ni na, m nan nyan Israel yaab aajan aabijabim, ni baawakor aajan aabim, ni li ye maawan la.

¹⁸ Dandana wee, maah ba ga gaa nimi aajan aabijabim pu na, le m nyan Liifai yaab ke bi li ye maanib.

¹⁹ M di Liifai yaab tii Aaronn ni ujapɔtiib, bi li ye Israel yaab aapiin tii bi, aan bi li tun Maabool ni lituln tii Israel yaab, bi li kiir Israel yaab tibɔbir ti bi yaa duun Chain Aapepel kan, bi ga kan ti na chee.”

²⁰ Nima pu na, Moses ni Aaronn, ni Israel yaab mɔmɔk nan di Liifai yaab tii Uwumbɔr, waah nan bui Moses ke u ŋa pu na.

²¹ Liifai yaab nan toor bibaa, ki finn baawanpeenkaan, le Aaronn di bi tii Uwumbɔr, bi li ye ipiinkpaan u chee. U nan ki toor titunwanbir aatork ke bi ŋa chain mbamɔm.

²² Binib ngbaan nan ŋa Uwumbɔr aah nan bui Moses ke u ŋa Liifai yaab pu na. Nima pu na, Liifai yaab nan ŋeer ke bi ŋmaa tun, Aaronn ni ujapɔtiib aah tuk bi ke bi ŋa pu na.

²³ Uwumbɔr nan ki bui Moses ke,

²⁴ “Liifai aanii yaa ti saa ŋibin moninko ni ŋiŋmu kan, u ŋeer ke u tun lituln nnimbiin ni, Maabool ni.

²⁵ U yaa tun kina ki ti saa ŋibin piiŋmu kan, ni ŋeer u di cha kina.

²⁶ Nee aapuwɔb na, u ga ŋmaa ter biken baatuln ni, Maabool ni; biken yaa kaa bi kan, waan ki ŋmaa tun lituln ngbaan ubaa baanja. Kina le aa ga mɔk Liifai yaab baatuln mɔmɔk.”