Nkahm 7 - Uwumbɔr aagbaŋ

Bisalolm aah joo ni ipiin i na

¹ Nwiin mundaal Moses nan doo Uwumbɔr Aabool aatuln na, u nan di nkpan meen Libool ngbaan, ni laawan mɔmɔk, ni kitork aabimbiln, ni laawan mɔmɔk, ki di ni tii Uwumbɔr.

² Le itaŋaal mɔmɔk aayidam bi ye Israel yaab aanibol mɔmɔk pu bisalolm, aan ki cha bi kahn binib na,

³ nan joo ni baapiin ki nan tii Uwumbɔr: ni nan ye tɔroku tiib biloob, ni inaaja kipiik ni ilee; bisalolm bilee le nan joo tɔroku ubaa, le usaloln mɔmɔk nan joo unaaja ubaabaa. Baah joo ni tiwan ngbaan mɔmɔk ki nan tii doo na,

⁴ le Uwumbɔr bui Moses ke,

⁵ “Gaa ipiin ngbaan ki li joo tun Libool ni aatuln, di ni tii Liifai yaab bi li joo tun baatuln.”

⁶ Nima pu na, Moses nan di tɔroku tiib ni inaaja ngbaan mɔmɔk tii Liifai yaab.

⁷ U nan di tɔroku tiib bilee ni inaaja inaa le tii Gesonn yaab,

⁸ le ki di tɔroku tiib binaa ni inaaja iniin tii Merari yaab. Aaronn aajapɔɔn Itamar le nan mɔk bi baah ga tun pu na mɔmɔk.

⁹ Moses aa nan tii Kohaf yaab tɔroku ni inaaja, ba pu? bima nan joo tiwan nimɔk nan bi chain na buŋni bibɔgbin pu la.

¹⁰ Bisalolm ngbaan nan ki joo ni ipiin ki nan nyuŋ kitork aabimbiln ki di li tii Uwumbɔr. N‑yoonn mu bi gor ke bi tii ipiin ngbaan libimbiln pu na,

¹¹ le Uwumbɔr nan ki bui Moses ke, “Tuk bisalolm ngbaan ke bi mɔmɔk li joo ni baapiin nwiin mubaabaa ki ti saa iwiin kipiik ni ilee, naah ga di kitork aabimbiln tii mi na pu.”

^12-83 Bi mɔmɔk aah nan joo ni baapiin ki paa tɔb pu pu na sɔ: Linibol Usaloln 1 Juda Aminadab aajapɔɔn Nasonn 2 Isakar Suar aajapɔɔn Netanel 3 Sebulunn Helonn aajapɔɔn Eliab 4 Rubenn Sedeur aajapɔɔn Elisur 5 Simeonn Surisadai aajapɔɔn Selumiel 6 Gad Dewel aajapɔɔn Eliasaf 7 Efraim Amihud aajapɔɔn Elisama 8 Manase Pedasur aajapɔɔn Gamaliel 9 Benjaminn Gideoni aajapɔɔn Abidann 10 Dann Amisadai aajapɔɔn Ahieser 11 Aser Okrann aajapɔɔn Pagiel 12 Naftali Enann aajapɔɔn Ahira Bi mɔmɔk aah nan joo ni baapiin i na nan ye ipiin baan la; bi nan joo ni tikunabr aasambil li aanyunyuun ga pii ndibim kuruwaa ubaa ni ligeln na, ni tikunabr aasapeek kibaa, kaanyunyuun ga pii ndibim kuruwaa ubaa, ki ŋeer bitotoorb aah siin pu na, ni mɔmɔk nilee nan gbii n‑yon mu bi di nkpan buun mu na. Ni nan ye njikaabim aatork aapiin la; ki kpee salmaa aasambil li aanyunyuun ga pii ndibim lichakpaal libaa na, li mu nan gbii tulalee aayon la; ni unaaja ubaa, ni upihja ubaa, ni libiln libaa aapihbo, bi di toor kitork ki bi joo seer mmii ni na; ni uŋoob bi di toor titunwanbir aatork, ni inaaja ilee, ni ipihja iŋmu, ni iŋoja iŋmu, ni libiln libaa aapihbi iŋmu, bi di toor kimɔbaan aatork.

Linibol Usaloln

^84-88 Bisalolm kipiik ni bilee ngbaan aah nan joo ni baapiin i na aah nan ti kpaan saa pu na sɔ: —Tikunabr aasambil kipiik ni ŋilee, ni tikunabr aasapar kipiik ni tilee, naanyunyuun ga nan pii ndibim kuruwaa moninko ni bilee. —Salmaa aasambil kipiik ni ŋilee, ŋaanyunyuun ga nan pii ndibim kuruwaa ubaa ni ligeln, tulalee aayon le nan gbii ŋi ponn ni. —Inaaja kipiik ni ilee, ni ipihja kipiik ni ilee, ni libiln libaa aapihbi kipiik ni ilee, ki kpee njikaabim aapiin i bi ga di kpaan, ni li ye kitork ki bi ga di see mmii ni na aapiin. —Iŋoob kipiik ni ilee, bi di toor titunwanbir aatork. —Inaaja moninko ni inaa, ni ipihja imonko itaa, ni iŋoob imonko itaa, ni libiln libaa aapihbi imonko itaa, bi di toor kimɔbaan aatork.

⁸⁹ N‑yoonn mu Moses buen Uwumbɔr Aabool ni u ti len Uwumbɔr chee tibɔr na, le u ŋun Uwumbɔr len u chee tibɔr, tiwan ni bi Nkaal Aadakaa pu aapaacham ki kpa ifeen na aakaasisik ni.