Nkahm 6 - Uwumbɔr aagbaŋ

Unii u nyan ubaa siin ki puu tipuur tii Uwumbɔr aakoobil na

¹ Uwumbɔr nan bui Moses

² ke u di tibɔr timina tuk Israel yaab. Uja ni upii umɔk puu ke u ga di ubaa tii Uwumbɔr na kan,

³ u taa nyu ŋisubil aadaan, ki mu taa nyu ndaan mubaa. U taa nyu ŋisubil aadaan ki taa ŋmɔ ŋisubil ngbaan, ŋi soon, bee ŋi kuur na.

⁴ Buyoonn u nyan ubaa siin kina aasisii na, u taa ji tiwan nimɔk bi di ndaan aasubil ŋa ni na, u taa ji ndaan aasubil aawan ni ye libil bee tipɔkr na.

⁵ Buyoonn u ti puu kina aapuur na, u taa kuu uyikpir. Waah puu tipuur ki di ubaa tii Uwumbɔr na, u cha uyikpir ni ulangbaln aakor li bi, u taa kuu ti.

^6-7 Waakor le ye limɔkl ke u di ubaa tii Uwumbɔr la, nima pu na, u taa meeh linikpol ki bii ubaa, hali ute, bee una, bee ute aabo yaa kpo kan, u taa meeh linikpol ngbaan.

⁸ Buyoonn u nyan ubaa siin kina aasisii na, u ye Uwumbɔr aanii la.

⁹ Unii le yaa kpaan kpo kina aanii u di ubaa tii Uwumbɔr na aanimbiin ni, ki cha u kpaln tijɔŋdaan, aan uyikpir bii kan, u li kii ki ti saa iwiin ilole daal aan ki nin kuu uyikpir ni ulangbaln, n‑yoonn ngbaan na, u ki kpaln chain aanii le na.

¹⁰ Winiin daal kan, u li joo ni ŋibɔrnanjel ŋilee, bee ŋinanjel ŋilee utotoor chee, Uwumbɔr aanimbiin ni, Waabool aabisamɔb chee.

¹¹ Utotoor ga di libaa toor titunwanbir aatork, ki di liken na toor ki see li mmii ni, ki ŋaŋ u waah meeh linikpol pu na. Liyaadaal ngbaan unii ngbaan ga ki di waayikpir ti ga ki pa na giin tii Uwumbɔr,

¹² ki ki nyan ubaa tii Uwumbɔr. Waah nan nyan ubaa njan pu aan ki meeh linikpol ki bii ubaa na, nima aa ki ye nibaa, ba pu? waayikpir ti u nan di tii Uwumbɔr na nan kpaln tijɔŋ. U ki li joo ni libiln libaa aapihbo ki nan toor lipɔln aatork.

¹³ N‑yoonn mu kina aanii ti ŋa waah puu pu na, see u toor ki woln ubaa pu. U ga li joo ni tiwakor titaa ti kaa kpa ngalm mubaa na, ki di buen Uwumbɔr aanimbiin ni, Waabool aabisamɔb chee,

¹⁴ ki di ti tii Uwumbɔr: ni li ye libiln libaa aapihjabo aan bi di toor kitork ki see ki mmii ni, ni libiln libaa aapihsabo bi di toor titunwanbir aatork, ni upihja bi di toor kimɔbaan aatork;

¹⁵ ki kpee na, u ga ban ni boroboro u gbei ki ŋmar olif aakpan, kaa kpa boroboro aanyɔk na kibɔɔkuuk kibaa, ni maab u bi di olif aakpan ŋmir u na; ki kpee njikaabim ni ŋisubil aadaan pu.

¹⁶ Utotoor le ga di tiwan nimina mɔmɔk tii Uwumbɔr, ki toor titunwanbir aatork, ni kitork ki bi joo seer mmii ni na.

¹⁷ U ga di upihja na toor kimɔbaan aatork, ki di u ni boroboro kibɔɔkuuk na kpaan, ki di tii Uwumbɔr, ki di njikaabim ni ŋisubil aadaan na mu tii ipiin aatork.

¹⁸ Uwumbɔr aanimbiin ni, Waabool aabisamɔb chee, kina aanii ngbaan ga kuu uyikpir ki di ti ŋa kimɔbaan aatork aamii na ponn ni.

¹⁹ Bi yaa ŋaan upihja ngbaan aabook aanann kan, utotoor nyan ti, ki nyan boroboro kpiln li gbei na libaa, ni maab ubaa kibɔɔkuuk na ni, ki di ŋa kina aanii ngbaan aaŋaal ni.

²⁰ Ni paa na, utotoor di tiwan ngbaan mɔmɔk tii Uwumbɔr, ni li ye ipiinkpaan yaan; ni ye chain aapiin ki ye utotoor yaan, ki kpee upihja ngbaan aabingbaal ni litaajal pu. Ni ye nkaal le ke ni li ye utotoor yaan. Nee aapuwɔb na, kina aanii ngbaan ga ŋmaa nyu ŋisubil aadaan.

²¹ Kina aanib aah ga li dii pu na le na, le u yaa puu tipuur ke u ga tii ipiin i chaar jer waapɔɔn na kan, see u pɔɔn ubaa ki ŋa waah puu pu na.

Bitotoorb aah ga li ŋani tinyoor ŋani binib pu pu na

²² Uwumbɔr nan ki bui Moses

²³ ke u tuk Aaronn ni ujapɔtiib ke bi li joo ŋimɔbon ŋimina mee tinyoor ŋani Israel aanib pu:

²⁴ Uwumbɔr ŋa tinyoor ŋa ni pu ki li lik nimi;

²⁵ Uwumbɔr li kpa ni pu tibulchinn ni tiŋann, ki li gee nimi;

²⁶ Uwumbɔr lik faar nimi, ki tii nimi nsuudoon.

²⁷ Uwumbɔr nan ki bui ke, “Bi yaa di maayimbil mee tinyoor biin Israel yaab pu kina kan, m ga ŋa tinyoor ŋa bi pu.”