Nkahm 5 - Uwumbɔr aagbaŋ

Binib bi kaa bi chain na

¹ Uwumbɔr nan bui Moses ke,

² “Tuk Israel yaab ke bi nyan binib bi kpa tiwon aaween i bir na, bee biwon nya kinyuŋ ni tinar, ni unii umɔk meeh utekpiir kaa bi chain na, nibaa chee.

³ Binib bi kaa bi chain ngbaan na, ni nyan bi aan bi taa bii naah ka nin chee aan m bi nimi maanib aakaasisik ni na.”

⁴ Israel yaab nan kii kina, le ki nyan bi bikaasisik ni.

Unii yaa tun taani kan, waah ga pa pu na

⁵ Uwumbɔr nan tuk Moses ke u bui Israel yaab ke,

⁶ “Buyoonn unii ti yii min Uwumbɔr aan ki tun uken taani na kan,

⁷ see u kpiir waatunwanbir ki pan naah ŋeer ke u pa pu na, ki ki pa paan ki tii uma ngbaan.

⁸ Tɔ, ni yaa ye ke unii ngbaan kpo le udo yaab aa bi, bi pa tipar ngbaan tii bi kan, ni di ti tii min Uwumbɔr aan ti li ye utotoor yaan. Ki kpee tipar ngbaan pu na, u ban upihja aan bi di toor kitork woln u pu.

⁹ Ni ki kpee na, Israel yaab yaa too tootookpaan tii min Uwumbɔr kan, ni ye baah di tii utotoor u na le yaan.

¹⁰ Utotoor mɔmɔk ga li joo baah di ipiin i tii u na la.”

Upii u aachal dak ke u nyan upuwɔb na aabɔr

¹¹ Uwumbɔr nan ki tuk Moses

^12-14 ke u tuk Israel yaab ke, “Nibaakan, uja ga li dak ke upuu nyan upuwɔb, ki cha uja uken doon u chee, ki bii ubaa. Uchal mu aa bee ti ponn ni mbamɔm, le upuu di ti bɔr kaa kpiir ti, ubaa mu aa ŋa seeraadaan, aan baa chuu u uja ngbaan chee, le ni ye ke uchal dak ke upuu nyan upuwɔb le kan,

¹⁵ uja ngbaan di upuu ngbaan buen utotoor chee. U li joo ipiin i ye n‑yon na kuruwaa ubaa, u taa di olif aakpan ŋa mu ponn ni, ki taa di tulalee aayon mu ŋa mu ni; ba pu? ni ye uchal aah dak pu na, le u ban mbamɔn nya mpaan pu.

¹⁶ “Utotoor ga nyan ni upii ngbaan siin, min Uwumbɔr aanimbiin ni, kitork aabimbiln chee,

¹⁷ ki bar min Uwumbɔr aah ŋa nnyun mu chain na, ŋa tiyakr aasambil ni, aan ki ban min Uwumbɔr Aabool ponn ni kitiŋ aatan, ki di nnyun buun ti, aan mu li cho.

¹⁸ Utotoor yaa ŋa kina doo kan, u ga finn upii ngbaan aayikpir, aan ki di n‑yon na ŋa upii ngbaan aaŋaal ni. Utotoor ubaa li joo lisambil li kpa nnyun mu cho na uŋaal ni, muma le ye imɔpuur.

¹⁹ Utotoor ga cha upii ngbaan puu ki len tibɔr ti uma utotoor ngbaan ga len na ke: ‘Aa yaa kaa tun kidagook aatuln kan, nnyun mue taa joo ni tibɔbir aa pu.

²⁰ Tɔ, aa yaa tun kidagook aatuln kan,

²¹ Uwumbɔr puun lii aa pu, aa taa ki li kpa tinyoor tibaa saanib ponn ni. U cha aanimbiin ni bii, aa taa ki ŋmaa maa ubo, aapɔtiŋ mu duun.

²² U cha nnyun mue koo aaponn ni, aan ni duun, ki cha aanimbiin ni bii, aa taa ki ŋmaa maa ubo.’ “Upii ngbaan kii, ki len ke, ‘M kii. Uwumbɔr cha ni ŋa kina.’

²³ “Le utotoor ga ŋmee imɔpuur ngbaan paan tiwan nibaa pu, ki finn ŋŋmeen ngbaan ŋa lisambil li nnyun mu cho na bi li ponn ni na.

²⁴ Waahr aan upii ngbaan nin nyu nnyun mu ga cha uponn ni li wu na,

²⁵ utotoor ngbaan ga chuu gaa n‑yon mu upii ngbaan joo uŋaal ni na, ki li joo mu uŋaal ni, ki di mu tii min Uwumbɔr, kitork aabimbiln paab.

²⁶ U di uŋaal lee mu ngem ki see mu mmii ni, kitork aabimbiln paab, ki mɔk ke mu mɔmɔk ye min Uwumbɔr yaan la. U yaa doo kan, u cha upii ngbaan nyu nnyun ngbaan.

²⁷ U yaa tun kidagook aatuln kan, nnyun ngbaan ga cha uponn ni li wu pam, le upuul ga duun, unimbiin ni mu ga bii, waan ki ŋmaa maa ubo. Le binib ga li gur joo waayimbil puuni lir biken pu.

²⁸ U yaa kaa nyi tibɔr ngbaan kan, nibaa aan ŋa u, le u ga ŋmaa maa mbim.

^29-30 “Uja yaa kpa lipiipoln upuu pu, ki dak ke upuu tun kidagook aatuln kan, nkaal mumina le ni ga dii. Utotoor ga cha upii ngbaan dan nan sil min Uwumbɔr aanimbiin ni, kitork aabimbiln chee, le u dii nkaal ngbaan aah mɔk pu na.

³¹ Ni yaa ye mbamɔn ke upii ngbaan tun kidagook aatuln kan, uchal aa kpa taani kpala; upii ma yaa galn kan, see u jin falaa ngbaan.”