Nkahm 4 - Uwumbɔr aagbaŋ

Liifai yaab bi nan ye Kohaf aataŋaal ni aanib na aatuln

¹ Uwumbɔr nan bui Moses ke,

² “Kahn Liifai yaab bi ye Kohaf aataŋaal ni aanib na ŋiker ŋiker, ni mmaal mmaal,

³ ki ŋmee bijab bi ye ŋibin piitaa ki ti saa piiŋmu ki ŋeer bi tun lituln Maabool ponn ni na aayimbil.

⁴ Baatuln le ye ke bi li lik tiwan ni m ŋa ni chain na.”

⁵ Uwumbɔr nan tuk Moses baah ga li tun lituln li na. “N‑yoonn mu ni ti ŋeer ke ni fii ki buen nibaa chee na kan, Aaronn ni ujapɔtiib koo Maabool ponn ni, ki chuu nyan likekeln li bi Uwumbɔr Aakaal Aadakaa chee na, ki di li biin Dakaa ngbaan pu.

⁶ Bi di ngbanyaan ki di poo u, ki di likekeln bɔmbɔln kpar biin upaacham, aan ki di ŋidabil ŋi bi joo yoor u na ŋa ŋaabon ni.

⁷ “Bi di likekeln bɔmbɔln kpar biin teebul u bi joo boroboro paani tii Uwumbɔr na pu, aan ki di ŋisambil, ni tulalee aayon aasambil, ni ipiin aasambil, ni ŋisubil aadaan aabobim ŋi bi joo tii Uwumbɔr ipiin na chɔŋ u pu. N‑yoonn mɔmɔk kan, boroboro li paa teebul ngbaan pu.

⁸ Bi di likekeln mamaln kpar biin tiwan ngbaan mɔmɔk pu, ki di ngbanyaan poo biin ni pu, aan ki di ŋidabil ŋi ni joo yoor u na ŋa ŋaabon ni.

⁹ “Bi di likekeln bɔmbɔln biin baah joo karyaa tiib chɔŋni tiwan ni pu na, ni naakaryaa tiib pu, ni baah joo tiwan ni toor karyaa aapal na, ni baah joo karyaa taŋni tiwan ni ponn ni na, ni olif aakpan aawan mɔmɔk.

¹⁰ Bi di ngbanyaan ki di poo biin karyaa tiib ni baawan ngbaan mɔmɔk pu, aan ki di chɔŋ baah joo tiwan ni yoor ni na pu.

¹¹ “Ni paa na, bi di likekeln bɔmbɔln ki di biin salmaa aatork aabimbiln pu, ki di ngbanyaan poo biin li pu, aan ki di ŋidabil ŋi bi joo yoor li na ŋa ŋaabon ni.

¹² Bi di Chain Aapepel aasambil mɔmɔk poo likekeln bɔmbɔln ni, ki di ngbanyaan biin ŋi pu, aan ki di ŋi chɔŋ baah joo tiwan ni yoor ŋi na pu.

¹³ Bi chuu faa nfatan kitork aabimbiln pu, ki di likekeln bɔmbɔln biin li pu.

¹⁴ Bi di tiwan ni ye mmii aasambil, ni inanmoon, ni tiwan ni bi joo leer mmii ki faa nfatan na, ni ŋisambijal ŋimɔk bi joo tun lituln libimbiln ngbaan pu na di ŋa li ponn ni, aan ki di ngbanyaan biin ni pu, ki di ŋidabil ŋi bi joo yoor li na di ŋa ŋaabon ni.

¹⁵ Ni yaa ti ŋeer buyoonn ni ban ni fii buen nibaa chee, aan Aaronn ni ujapɔtiib yaa poo poo tiwan nimɔk m ŋa ni chain na doo na kan, Kohaf aataŋaal ni aanib le ga yoor tiwan ngbaan mɔmɔk tun. Kohaf aataŋaal ni aanib taa meeh tiwan nimɔk m ŋa ni chain na, bi yaa meeh ni kan, bi ga kpo. “Bi yaa ti ber Maabool n‑yoonn mu na kan, Kohaf aataŋaal ni aanib aatuln le na.

¹⁶ “Utotoor Aaronn aajapɔɔn Eleasar le ga li lik Maabool ngbaan, ni laawan ni ye nkpan mu bi joo seer karyaa tiib na, ni tulalee aayon, ni njikaabim aapiin, ni nkpan mu bi joo ŋani tiwan chain na, ni tiwan nimɔk bi Maabool ni, bi di tii min Uwumbɔr na.”

¹⁷ Uwumbɔr nan bui Moses ni Aaronn ke,

¹⁸ “Ni taa cha Kohaf aataŋaal ni aanib

¹⁹ duun ni tiwan ni m ŋa ni chain na chee ki kpoi. Naah ga kiir bi pu na sɔ: Aaronn ni ujapɔtiib le ga dii bi koo Maabool ngbaan ponn ni, le ki ti mɔk bi mɔmɔk baatuln, ni baah ga tun tiwan ni na.

²⁰ Kohaf yaab yaa koo Maabool ngbaan ni ki ti kan bitotoorb aah bi gor tiwan ni m ŋa ni chain na kan, bi ga kpo.”

Liifai yaab bi nan ye Gesonn aataŋaal ni aanib na aatuln

²¹ Uwumbɔr nan bui Moses ke,

²² “Kahn Liifai yaab bi ye Gesonn aataŋaal ni aanib na, ntaŋaal ntaŋaal, ni mmaal mmaal,

²³ ki ŋmee bijab bi ye ŋibin piitaa ki ti saa piiŋmu ki ŋeer bi tun lituln Maabool ponn ni na aayimbil.

²⁴ Baatuln le ye ke bi tun tiwan nimina:

²⁵ Libool ngbaan, ni tiwan ni bii li ponn ni na, ni tiwan ni bii lipaal na, ni ngbanyaan mu bii paacham na, ni mbisamɔb aakekeln,

²⁶ ni ŋikeken, ni iŋmin i bi di gaa tiwan ni gob bii Libool, ni kitork aabimbiln na, ni ŋikeken ŋi bii lipaal aabisamɔb pu na, ni tiwan ni bi di chɔi chur tiwan ngbaan mɔmɔk na. Bima le ye bi ŋa tiwan nimina mɔmɔk aatuln.

²⁷ Moses ni Aaronn le ga cha Gesonn yaab tun baatuln, ki tun tiwan ngbaan mɔmɔk Aaronn ni ujapɔtiib di ŋa biŋaal ni na.

²⁸ Lituln li Gesonn aataŋaal yaab ga tun Maabool ni na le na; utotoor Aaronn aajapɔɔn Itamar aah mɔk bi pu na, kina le bi ga tun.”

Liifai yaab bi nan ye Merari aataŋaal ni aanib na aatuln

²⁹ Uwumbɔr nan bui Moses ke, “Kahn Liifai yaab bi ye Merari aataŋaal ni aanib na, ntaŋaal ntaŋaal, ni mmaal mmaal,

³⁰ ki ŋmee bijab bi ye ŋibin piitaa ki ti saa piiŋmu ki ŋeer bi tun lituln Maabool ponn ni na aayimbil.

³¹ Baatuln le ye ke bi tun Libool ngbaan aawan, ni idɔja, ni idɔŋumkee, ni idɔpuinkee,

³² ni lipaal aawan ni bi di gob Libool ngbaan na aadɔŋumkee, ni ikpaabi, ni iŋmin, ni tiwan ni bi di chɔi chur tiwan ngbaan mɔmɔk na. Bi ga mɔk unii mɔmɔk aah ga tun tiwan ni na.

³³ Lituln li Merari aataŋaal yaab ga tun Maabool ni na le na; utotoor Aaronn aajapɔɔn Itamar aah mɔk bi pu na, kina le bi ga tun.”

Baah nan kahn Liifai yaab pu na

^34-48 Moses, ni Aaronn, ni Israel yaab aaninkpiib nan dii Uwumbɔr aah tuk bi pu na, ki nan kahn Liifai yaab aataŋaal aanib bi ye Kohaf, ni Gesonn, ni Merari yaab na. Bi nan kahn bi ntaŋaal ntaŋaal, ni mmaal mmaal, bijab bi ye ŋibin piitaa ki ti saa piiŋmu, ki ga ŋmaa tun lituln Uwumbɔr aanimbiin ni, Waabool ni na. Bima sɔ: Ntaŋaal Nkahm Kohaf ŋichur ŋilee, ni ikui ilole ni piiŋmu Gesonn ŋichur ŋilee, ni ikui iloob ni piitaa Merari ŋichur ŋitaa, ni ikui ilee Baah nan kpaan saa pu na sɔ: ŋichur ŋiniin, ni ikui iŋmu ni imonko inaa.

Ntaŋaal Nkahm

⁴⁹ Uwumbɔr aah nan tuk Moses ke u ŋa pu na, le u nan ŋmee uja mɔmɔk aayimbil. Uwumbɔr aah nan ki tuk Moses pu na, u nan mɔk uja mɔmɔk waatuln aah ye pu na le bi tun.