Nkahm 36 - Uwumbɔr aagbaŋ

Bipiib bi mɔn tichar na aafaal aabɔr

¹ Gilead u nan ye Makir aajapɔɔn, ki mu ye Josef aajapɔɔn Manase aayaabil na aamaal ni aayidam nan buen Moses ni biyidam biken chee,

² ki ti bui ke, “Uwumbɔr nan tuk si ke aa too inaan aan ki yakr kitiŋ ngbaan tii Israel yaab. U nan ki tuk si ke aa yakr kitiŋ tii Selofehad u ye timi aanii na aabisatiib.

³ Tɔ, bijab bi ye ŋinibol ŋiken ni aanib na yaa yoor bipiib ngbaan kan, bipiib ngbaan aafaal ga kun bichatiib yaab aanibol wɔb la, le baah nan yakr kitiŋ ki tii timi na ga bar.

⁴ Ni yaa nan saa libiln li Israel yaab ga giin baah nan daa daa ntim mu na tii bitindam kan, Selofehad aabisatiib aatiŋ ga buen bichatiib aanibol wɔb la, le ki nya ti chee.”

⁵ Nima pu le Moses nan di Uwumbɔr aabɔr timina tuk Israel yaab, ke Manase aanibol aah len pu na, ti ye tibɔbamɔnn la.

⁶ Kina pu le Uwumbɔr nan bui ke Selofehad aabisatiib ga ŋmaa mɔn baah gee bijab bi na, bi mu li ye baanibol ni aajab.

⁷ Israel aanii mɔmɔk aatiŋ ŋan ke ki bee linibol li ponn ni u nyan ni na la.

⁸ Upii umɔk kpa kitiŋ Israel aanibol ni na, ni ŋan ke u mɔn waah nyan ni linibol li ponn ni na la. Ni yaa ŋa kina kan, Israel aanii mɔmɔk ga ji uyaaja aatiŋ,

⁹ le kitiŋ kibaa aan nyan linibol libaa ni, ki buen liken wɔb. Le linibol mɔmɔk ga li beenin kpa laatiŋ, ki cha n‑yoonn mɔmɔk.

^10-11 Nima pu na, Selofehad aabisatiib bi bi nan yin bi ke Mala, ni Tirsa, ni Hogla, ni Milka, ni Nowa na, nan ŋa Uwumbɔr aah nan tuk Moses ke bi ŋa pu na, le ki mɔn bitekpetiib, ni bitewaatiib aajapɔtiib.

¹² Bi nan mɔn Josef aajapɔɔn Manase aanibol ni la, le baatim mɔmɔk gaar bite aanibol ni.

¹³ Uwumbɔr aah nan di ikaal i mɔk Moses ke u di tii Israel yaab na le na. N‑yoonn ngbaan bi nan bi Moab yaab aateer mu bi Jɔɔdann Aamɔɔl chee, ki lik Jeriko aatiŋ, limɔɔdapuul wɔb.