Nkahm 35 - Uwumbɔr aagbaŋ

Baah ga di ntim mu tii Liifai yaab na

¹ Baah nan bi Moab yaab aateer mu bi Jɔɔdann Aamɔɔl chee ki lik Jeriko aatiŋ limɔɔdapuul wɔb na, le Uwumbɔr nan bui Moses ke,

² “Bui Israel yaab ke kitiŋ ki bi yakr tii bi na, bi mu ki yakr baatim ngem mu li kpa kimoŋmɔpɔɔk ki mann goln ntim ngbaan na tii Liifai yaab.

³ Le Liifai yaab mu ga li kpa baatim ki li bi mu ni. Le bi ga li kpaa baawakor ti mɔmɔk bi kpa na kimoŋmɔpɔɔk aatim ni.

⁴ Kimoŋmɔpɔɔk ga piin ligoln li bi maa gob baatim na, ki taln ŋipepel mɔmɔk ki saa ŋitaa lichur libaa ni ikui iŋmu,

⁵ nima kan, kitiŋ ngbaan aapepel ga li ŋak tɔb ki saa ŋitaa ŋichur ŋitaa, aan kitiŋ ngbaan li bi kaasisik ni.

⁶ Ni di mbɔbɔryaan aatim muloob tii Liifai yaab, nin chee unii yaa peln ku uken kan, u ga san buen nima ki ti ŋmar na. Ni kpee na, ni ki tii bi ntim muken mu saa imonko ilee ni mulee,

⁷ ki cha mu li kpa kimoŋmɔpɔɔk aan mu kpaan saa imonko ilee ni muniin.

⁸ Ntim mu ni ga di tii Liifai yaab na ga nya ŋinibol ngbaan aatim aah wiir pu na la.”

Mbɔbɔryaan aatim

⁹ Uwumbɔr nan bui Moses

¹⁰ ke u tuk Israel yaab ke, “Ni yaa puur Jɔɔdann Aamɔɔl ki koo Kanaann aatiŋ ni kan,

¹¹ ni nyan mbɔbɔryaan aatim, nima kan, unii yaa kaa nyi le ki peln ku uken kan, u san buen nima chee ki ŋmar.

¹² U yaa san ti koo nima chee kan, waah ku u na aado aanii aan ki pii u ki ku u mu. Baah galn unii u ke u ku uken na, bi taa ku u see bi jin waabɔr binib aanimbil ni.

¹³ Ni nyan ntim muloob,

¹⁴ mutaa li bi Jɔɔdann aawipuul wɔb, aan mutaa mu li bi Kanaann aatiŋ wɔb.

¹⁵ Ntim ngbaan le ga li ye mbɔbɔryaan ki tii Israel yaab, ni biwɔwɔm bi koo bi chee na, ni binib bi kaan yunn ki jer kakaan na. Unii ubaa yaa kaa nyi ki ku uken kan, u ga ŋmaa san buen nima ki ŋmar.

^16-18 “Tɔ, unii yaa di tijawan ni ye tikur, bee litakpal, bee ndɔ ku uken kan, u ye unikur la, le ni ŋeer bi ku u mu.

¹⁹ Linikpol ngbaan aado aanii kpa nsan ke u ku u teen. U yaa pii u kan, u ku u.

²⁰ “Nibaakan, unii yaa nan uken le ki tur u lii, bee u yaa di tiwan le mee u,

²¹ bee u yaa di linyakaakul le faa ku u kan, u ye unikur la, le ni ŋeer bi ku u. Linikpol ngbaan aado aanii kpa nsan ke u ku u teen. U yaa pii u kan, u ku u.

²² “Tɔ, unii yaa kaa nyi le ki peln ku uken kaa nan u kan, u yaa tur u lii, bee u yaa mee u tiwan le ki ku u,

²³ bee u yaa kaa lik uken wɔb le ki mee litakpal ku u, ki mu aa ye ke u ye waadin ki ban u ku u,

²⁴ kina yaa ŋa kan, bi gur na ji tibɔr kpee udaan u ku unii na pu, bi taa kpee linikpol aado yaab bi ban bi ku u teen na pu.

²⁵ Israel yaab bi gur na gaa unikur ngbaan linikpol na aado yaab chee lii, aan ki giin u buen mbɔbɔryaan aatiŋ ki u nan san buen ki ponn ni na. U li koo nima ki ti saa buyoonn Utotoorninkpel u bi nan di Uwumbɔr aakpan kpir uyil pu na aah ga nan kpo na.

²⁶ Ni yaa ye ke unikur na yaa ki nyan mbɔbɔryaan aatiŋ ki u nan san buen ke u ŋmar na ni

²⁷ aan linikpol ngbaan aado aanii yaa pii u ki ku u kan, waa kpa taani.

²⁸ Nima pu na, unikur yaa san buen mbɔbɔryaan aatiŋ ngbaan ni kan, u taa ki nyan nima ki ti saa buyoonn Utotoorninkpel ga kpo na. Nee aapuwɔb na, unikur ngbaan ga ŋmaa gir kun.

²⁹ Israel yaab, ni biyaabitiib yaa bi nin chee mɔmɔk na kan, bi li joo nkaal ngbaan.

³⁰ “Binib yaa pii bilee, bee ki jer kina, ki ye seeraadam ki len mbamɔn ke unikur ngbaan tun taani kan, ni ŋeer bi ku u; unibaan le yaa ye seeraadaan kan, naa ŋeer ke bi ku u.

³¹ Unikur mɔmɔk ŋeer nkun la. Waan ŋmaa pa ŋimombil ke u nya ntafadaan ngbaan ni.

³² Unikur yaa san buen mbɔbɔryaan aatiŋ ni kan, ni taa cha u pa ŋimombil aan ki gir kun waahr aan Utotoorninkpel nin kpo.

³³ Ni yaa ŋa kina kan, ni ga bii kitiŋ ki ni koo ki ponn ni na. Linikul bii kitiŋ la, le unii yaa ku uken kan, see bi ku udaan ngbaan mu, naa ye kina kan, kitork kibaa aa ki bi, ni ga ŋmaa toor ki ŋaŋ baah ku unii kitiŋ ki pu na.

³⁴ Nima pu na, ni taa bii kitiŋ ki ni koo ki ponn ni na, ba pu? min le ye Uwumbɔr, ki bi nimi Israel yaab chee.”