Nkahm 34 - Uwumbɔr aagbaŋ

Kanaann aatiŋ aanaanmɔk

¹ Uwumbɔr nan tuk Moses

² ke u di tibɔr timina bui Israel yaab, “Ni yaa koo Kanaann aatiŋ ki m ban m di tii nimi na ni kan, kitiŋ ngbaan aanaanmɔk aah ga li ye pu na sɔ:

³ Kitiŋ ngbaan aaŋangii wɔb ga dii kina ti nya Sinn aateersakpiin ni, ki dii Edom aatiŋ mɔk. Ki yoor liwipuul wɔb, nimi aatiŋ ga piin N‑yaan Aanyusakpem aadoon mɔk ŋŋangii wɔb la;

⁴ le ki fenn buen ŋŋangii wɔb ki di toŋ Akrabim aasan wɔb, ki puur ti nya Sinn aateersakpiin ni, ki ti nya Kades Banea aaŋangii wɔb; le ki ki fenn kpaa ŋŋangan ni liwilir wɔb ki di buen Hasar Adar, le ki di ti ker Asmonn aatiŋ pu,

⁵ nima chee le ki ga fenn toŋ kifataŋ ki bi Ijipt aanaanmɔk na, ki ti doo Kaasisik ni Aanyusakpem chee.

⁶ “Kitiŋ ngbaan aawilir wɔb aanaanmɔk le ga li ye Kaasisik ni Aanyusakpem mɔk.

⁷ “Kitiŋ ngbaan ŋŋangan wɔb kan, ni lur nkuul ki yoor Kaasisik ni Aanyusakpem mɔk, ki ti nya Hor Aajool pu,

⁸ ki ki yoor nima ti nya Hamaf aasan chee; le ki di dii kina ti nya Sedad,

⁹ ki ki di kina ti nya Sifronn chee, ki ti doo Hasar Enann.

¹⁰ “Kitiŋ ngbaan liwipuul aanaanmɔk kan, ni ga lur nkuul ki yoor Hasar Enann chee, ki ti nya Sefam pu;

¹¹ le ki ga dii ŋŋangii wɔb ki ti nya Habel pu, Ayinn aawipuul wɔb, le ki dii ŋigongon pu, ki ti nya Galilee Aanyusakpem aagbaan, liwipuul wɔb,

¹² le ki yoor kina ki dii ŋŋangii wɔb, ki di kpaŋ Jɔɔdann Aamɔɔl, ki ti nya N‑yaan Aanyusakpem chee. “Kitiŋ ngbaan aapepel ŋinaa aanaanmɔk le na.”

¹³ Moses nan bui Israel yaab ke, “Naah ga too inaan ki yakr kitiŋ ki na le na. Kitiŋ ki Uwumbɔr di tii ŋinibol ŋiwae ni ligeln na le na.

¹⁴ Rubenn, ni Gad, ni Manase aanibol ligeln bi bi Jɔɔdann Aamɔɔl liwipuul wɔb na, bima puun kan baatiŋ a, bi yakr kitiŋ ngbaan deedee, ki ŋeer baamaal aah ye pu na,

¹⁵ ki bi Jɔɔdann aawipuul wɔb, ki tok Jeriko aatiŋ ki bi Jɔɔdann aawilir wɔb na.”

Biyidam bi aatuln nan ye ke bi yakr kitiŋ ngbaan na

¹⁶ Uwumbɔr nan bui Moses ke,

¹⁷ “Eleasar u ye utotoor na, ni Nunn aajapɔɔn Josua le ga yakr kitiŋ ngbaan ki tii Israel aanibol ngbaan.

¹⁸ Nyan linibol mɔmɔk ni uyidaan, aan bi ter bi.”

^19-28 Bijab bi Uwumbɔr nan nyan na sɔ: Linibol Uyidaan Juda Jefune aajapɔɔn Kaleb Simeonn Amihud aajapɔɔn Selumiel Benjaminn Kislonn aajapɔɔn Elidad Dann Jogli aajapɔɔn Buki Manase Efod aajapɔɔn Haniel Efraim Siftann aajapɔɔn Kemuel Sebulunn Paanak aajapɔɔn Elisafann Isakar Asann aajapɔɔn Paltiel Aser Selomi aajapɔɔn Ahihud Naftali Amihud aajapɔɔn Pedahel

Linibol Uyidaan

²⁹ Uwumbɔr nan nyan binib bee le ke bi yakr Kanaann aatiŋ tii Israel yaab ngbaan.