Nkahm 33 - Uwumbɔr aagbaŋ

Israel yaab aasachuln

¹ Moses ni Aaronn aah nan di Israel yaab aanibol nyan Ijipt aatiŋ ni, ki dii, ki kaa ntim mu ni na aabɔr sɔ.

² Uwumbɔr aah nan tuk Moses pu na, u nan ŋmee nin chee mɔmɔk bi kal na aayimbil.

³ Israel yaab nan nyan Ijipt aatiŋ ni, libipɔln ni, njan aaŋmal aawiin kipiik ni muŋmuŋmur daal la; nwiin ngbaan nan ye Lakr‑jer aajim aawiin aah jer ki woln nwiin mu na la. Uwumbɔr aah nan kii bi pu na, le bi nan ŋmaa nyan Rameses aatiŋ ni ki cha, le Ijipt yaab mɔmɔk nan kan baah cha pu na.

⁴ N‑yoonn ngbaan, Ijipt yaab nan bi sui baajan aabijabim mu Uwumbɔr nan ku bi na la. Uwumbɔr aah nan ŋa kina na, u nan cha Ijipt yaab bee ke u kpa mpɔɔn ki jer baawaa mɔmɔk.

⁵ Israel yaab nan fii Rameses le ki ti kal Sukof.

⁶ Baah nan ti ki kal nin chee na le ye Etam aatiŋ, ki bi nteersakpiin aagbaan la.

⁷ Nima chee le bi nan ki fenn buen Pi Hahirof aatiŋ, ki bi Baal Sefonn aatiŋ aawipuul wɔb na, le ki ti kal Migdol aatiŋ chee.

⁸ Bi nan fii Pi Hahirof aatiŋ ni, ki ti puur Nnyusakpem Mamam, ki koo Sur aateersakpiin ni; baah nan chuun ki ti saa iwiin itaa na, le bi kal Mara aatiŋ ni.

⁹ Bi nan fii nima chee mu, le ki buen Elim aatiŋ ni, ki ti kal nima, ba pu? inyunbun kipiik ni ilee, ni ŋibɔkpal aasui imonko itaa ni kipiik nan bi nima.

¹⁰ Bi nan fii Elim aatiŋ ngbaan ni, le ki ti kal gbaŋ Limɔɔkal Aanyusakpem.

¹¹ Bi nan ti ki kal nteersakpiin mu bi yin mu ke Sinn na ni,

¹² le ki nabr ti kal Dofka aatiŋ ni,

¹³ le ki ki fii ti kal Alus aatiŋ ni.

¹⁴ Baah nan ki fii ti kal nin chee na le nan ye Refidim aatiŋ ni. Nnyun aa nan bi nima chee bi nyu.

^15-37 Baah nan ki nyan Refidim aatiŋ ni ke bi ti fuu Hor Aajool chee na, bi nan ki kal kal ntim mu aayimbil paa na ni: Sainai aateersakpiin, ni Kiberof Hatafa, bi nan ki yin nima chee Kikpeek Aakaakun, ni Haserof, ni Ritma, ni Rimonn Peres, ni Libna, ni Risa, ni Kehelata, ni Sefer Aajool chee, ni Harada, ni Makelof, ni Tahaf, ni Tera, ni Mitka, ni Hasmona, ni Moserof, ni Bene Jaakann, ni Hor Hagidgad, ni Jotbata, ni Abrona, ni Esionn Geber, ni Sinn aateersakpiin ni, nima chee le bi ki yin ni ke Kades na, ni Hor Aajool chee, ni bi Edom aatiŋ aagbaan la.

^38-39 Uwumbɔr nan bui Aaronn u nan ye utotoor na ke u jon Hor Aajool paab. N‑yoonn ngbaan Aaronn nan saa ŋibin nkub ni moninko ni ŋitaa, le baah nan nyan ni Ijipt aatiŋ ni ki ti saa ŋibin imonko ilee na aaŋmaŋmu ni, njan aawiin daal, le Aaronn nan kpo, lijool ngbaan paab.

⁴⁰ Arad aabɔr u nan bi Kanaann aatiŋ, ŋŋangii wɔb na, nan ŋun ke Israel yaab choo.

^41-49 Israel yaab aah nan nyan Hor Aajool chee ke bi ti fuu Moab yaab aateer ni, ki kal kal ntim mu ni na aayimbil le paa na: Salmona, ni Punonn, ni Obof, ni Abarim aalangbenn ti bi Moab aapepel ni na, ni Dibonn Gad, ni Almonn Diblataim, ni Abarim Aajool li bi gbɔk Nebo Aajool chee na, ni Moab yaab aateer mu bi Jɔɔdann Aamɔɔl chee ki lik Jeriko aatiŋ limɔɔdapuul na, ni bi Bef Jesimof ni Sitim Aafataŋ aakaasisik ni la.

Baah ga ti ŋa pu Jɔɔdann aamɔɔdapuul na aabɔr

⁵⁰ Baah nan bi Moab yaab aateer mu bi Jɔɔdann Aamɔɔl chee ki lik Jeriko aatiŋ limɔɔdapuul na, le Uwumbɔr nan tuk Moses

⁵¹ ke u bui Israel yaab tibɔr ti paa na: “N‑yoonn mu ni puur Jɔɔdann Aamɔɔl ki koo Kanaann aatiŋ ni na,

⁵² ni pɔɔn nibaa ki jenn nyan binib bimɔk bi kitiŋ ngbaan ni na. Ni bii baah di ŋitakpal ni tikur ŋa baawaa ŋi na, ni ŋiwaa ngbaan aah si nin chee na mɔmɔk.

⁵³ Ni gaa kitiŋ ngbaan ki kal nima, ba pu? m di ki tii nimi la.

⁵⁴ Ni too inaan ki yakr kitiŋ ngbaan ki tii ŋinibol, ni itaŋaal ni yaab mɔmɔk. Bi aataŋaal yaab wiir na kan, ni gii kitiŋ ki li wiir ki tii bi, aan ki gii kitiŋ waatiir tii bi kaa wiir na mu.

⁵⁵ Tɔ, ni yaa yii, kaa jenn nyan binib bimɔk bi kitiŋ ngbaan ni na kan, bi gur na ga tii nimi tibɔr pam, ki li bi ke liwanchɔl na le ninimbil ni, ki ki li bi ke ikokon na le ki saar nimi, le ki ga tak nimi.

⁵⁶ Ni yaa kaa jenn nyan bi kan, m ga kuln nimi, ke maah dak ke m ga kuln bi pu na.”