Nkahm 32 - Uwumbɔr aagbaŋ

Ŋinibol ŋi nan kal Jɔɔdann Aamɔɔl liwipuul wɔb na

¹ Rubenn ni Gad aanibol nan kpa tiwakor ti wiir pam. Bi nan kan ke Jaser ni Gilead aatim kpa kimopɔɔk ki ŋan tiwakor ga kan timoor ki ŋmɔ na,

² le bi buen Moses, ni Eleasar, ni biyidam biken chee, ki ti bui ke,

^3-4 “Uwumbɔr aah ter timi Israel yaab aan ti gaa lipepel limina, Atarof, ni Dibonn, ni Jaser, ni Nimra, ni Hesbonn, ni Eleale, ni Sibma, ni Nebo, ni Beonn aatim mu na ŋan tiwakor pam, le ti mu kpa tiwakor ti wiir sakpen na.

⁵ Ni yaa mɔɔr si kan, di kitiŋ kee tii timi, ki li ye timi aawan, aan ki taa cha ti puur Jɔɔdann Aamɔɔl ki ti kal nima wɔb.”

⁶ Le Moses giin bui bi ke, “Ni ban ke ni gaar do aan niŋeen aatɔtiib Israel yaab biken buen ti to butɔb bibaa la aa?

⁷ Ba ŋa ni ban ke ni yɔl Israel yaab aataakpab ke bi taa puur Jɔɔdann Aamɔɔl ki buen kitiŋ ki Uwumbɔr nan puu ke u ga di tii bi na?

⁸ Kina le nitetiib nan ŋa buyoonn m nan tun bi ke bi nya Kades Banea aatiŋ ni ki buen ti pekr kitiŋ ngbaan na.

⁹ Bi nan buen ki ti fuu Eskol Aafataŋ ni, ki kan kitiŋ ngbaan. Baah gir ni na, le bi yɔl binib ngbaan aataakpab ke bi taa koo Uwumbɔr aah puu ke u ga di kitiŋ ki tii bi na ni.

¹⁰ Le Uwumbɔr aaŋuul nan fii bi pu liyaadaal ngbaan, le u puu tii bi ke;

¹¹ ‘M puu ke naah kaa si nchaŋ ni mbamɔm na, nimi bijab bi ye ŋibin moninko ki jer na ki nan nyan ni Ijipt aatiŋ ni na, naan koo kitiŋ ki m nan puu ke m ga di tii Abraham, ni Aisak, ni Jakob na ni.’

¹² Bi mɔmɔk nan bi ni ni, see Jefune aajapɔɔn Kaleb u ye Kenis aanii na, ni Nunn aajapɔɔn Josua; bima le nan si Uwumbɔr aachaŋ ni mbamɔm.

¹³ Uwumbɔr nan gee bi gur na pu liŋuul, le ki cha bi chuun manni nteersakpiin ni, ki ti saa ŋibin imonko ilee, le binib bi nan bii usui na kpoi doo.

¹⁴ Le nimi titunwanbirdam bimina fii sil nitetiib aataa pu, ki ban ke ni bii Uwumbɔr aasui aan waaŋuul fii Israel yaab pu.

¹⁵ Nima pu na, nimi Rubenn ni Gad yaab yaa yii ke naan dii u kan, waah nan ŋa nitetiib pu na, u ga ki ŋa ni mu kina, ki bii ni mɔmɔk nteersakpiin mue ni, le ni yaa cha u ŋa kina kan, binib ngbaan aasin ga li bi nimi le pu.”

¹⁶ Le bi foor mar ni Moses chee ki ti bui u ke, “Njan, cha ti maa ŋitakpal aawan ni pɔɔ na, ki di timi aawakor ŋa, aan ki maa ŋigon ŋi fɔk ki pɔɔ na gob timi aatim ki tii tipuutiib ni mbim.

¹⁷ Nee aapuwɔb, ti ga gor tibaa ki dii tiŋeen aatɔtiib Israel yaab biken, ki loln bi pu nsan butɔb ni, aan bi mu kan baakakaa yaan. Tipuutiib ni timi aabim ga li koo ntim mu ti maa ŋigon gob mu na bibaa pu, aan binib bi bi kitiŋ kee pu na taa ŋa bi nibaa.

¹⁸ Taan gir kun ni tido see Israel yaab biken gaa kitiŋ ki bi di tii bi na.

¹⁹ Taah kan timi aatiŋ Jɔɔdann aamɔɔl, liwipuul do na, taan ki ban nibaa biken chee, Jɔɔdann aamɔɔdapuul.”

²⁰ Moses nan bui bi ke, “Naah len pu na yaa sil ye ibamɔn kan, gor man Uwumbɔr aanimbiin ni do, aan ti li cha butɔb.

²¹ Nimi aajab bimɔk to butɔb na ga puur Jɔɔdann Aamɔɔl, Uwumbɔr aah siin pu na, ki tak timi aadim ngbaan ki ti saa buyoonn Uwumbɔr ga nyaŋ bi

²² aan ti gaa kitiŋ ngbaan na. Nee aapuwɔb na, ni ga ŋmaa gir kun ni; ba pu? n‑yoonn ngbaan muin ni ŋa naah len Uwumbɔr, ni niŋeen aatɔtiib Israel yaab biken chee ke ni ga ŋa pu na. Uwumbɔr ga kii ke u di kitiŋ ki bi Jɔɔdann aamɔɔl, liwipuul wɔb do, ki di tii nimi, ki li ye nimi yaan.

²³ Ni mu yaa kaa ŋa naah puu pu na kan, m sur nimi la, ni ga tun titunwanbir Uwumbɔr chee, le u ga sil daa nitafal.

²⁴ Nima pu na, maa nimi aatim man, ki maa gob nimi aapiih pu, ki ŋa naah puu pu na.”

²⁵ Le Gad ni Rubenn aajab ngbaan bui Moses ke, “Uninkpel, ti ga ŋa saah bui timi pu na.

²⁶ Tipuutiib, ni timi aabim, ni timi aawakor ga bee Gilead aatim ni do la.

²⁷ Le timi bimɔk gur na gor ke ti buen butɔb, Uwumbɔr aah tuk timi ke ti ŋa pu na. Ti ga puur Jɔɔdann aamɔɔl, le ki to butɔb saah len pu na.”

²⁸ Nima pu na, Moses nan tuk Eleasar, ni Josua, ni Israel yaab aayidam biken na ke,

²⁹ “Gad ni Rubenn aajab yaa puur Jɔɔdann aamɔɔl ke bi ti to butɔb, Uwumbɔr aah tuk bi pu na, aan baaterm pu ni yaa nyaŋ kan, ni di Gilead aatiŋ tii bi, ki li ye biyaan.

³⁰ Bi mu yaa yii, kaa puur Jɔɔdann aamɔɔl ki buen ti ton butɔb kan, ni yaa nan ban ni yakr Kanaann aatiŋ kan, ni nyan nibaa chee tii bi mu, ki taa di Gilead aatiŋ tii bi.”

³¹ Le Gad ni Rubenn aajab bui ke, “Uninkpel, Uwumbɔr aah tuk timi ke ti ŋa pu na, ti ga ŋa kina.

³² Waah tuk timi pu na, ti ga puur buen Kanaann aapepel wɔb ki ti to butɔb, nima kan, Jɔɔdann aamɔɔl liwipuul wɔb do, ga li ye timi aatiŋ.”

³³ Nima pu na, Moses nan di Amor yaab aabɔr Sihonn, ni Basann aabɔr Og aatiŋ aapepel mɔmɔk, ki kpee ntim, ni tikpaasar ti mann goln mu na le tii Gad, ni Rubenn, ni Manase aanibol ligeln libaa.

³⁴ Gad yaab nan ki gir maa ntim mu kpa ŋigon ŋi fɔk ki pɔɔ, ki ye Dibonn, ni Atarof, ni Aroer,

³⁵ ni Atrof Sofann, ni Jaser, ni Jogbeha,

³⁶ ni Bef Nimra, ni Bef Harann na.

³⁷ Le Rubenn yaab ki gir maa Hesbonn, ni Eleale, ni Kiriataim,

³⁸ ni Nebo, ni Baal Meonn, bi nan kpeln kitiŋ kee aayimbil, ni Sibma aatim. Baah nan ki gir maa ntim ngbaan na bi nan kpeln mu aayimbil la.

³⁹ Manase aajapɔɔn u bi nan yin u ke Makir na aataŋaal ni yaab le nan jenn nyan Amor yaab Gilead aatiŋ ni, ki koo nima chee.

⁴⁰ Nima pu na, Moses nan di Gilead aatiŋ ngbaan tii Makir aataŋaal ni yaab, le bi koo nima.

⁴¹ Le Manase aanibol ni aaja u bi nan yin u ke Jair na, buen ti tak itingbaan ibaa ki nyaŋ bi, le ki yin mu ke, “Jair Aatingbaan.”

⁴² Le Noba mu buen ti tak le ki jenn gaa Kenaf aatiŋ, ni kaatingbaan mɔmɔk, ki di waayimbil Noba yin ki.