Nkahm 31 - Uwumbɔr aagbaŋ

Israel yaab aah nan faa Midiann yaab butɔb pu na

¹ Uwumbɔr nan bui Moses ke,

² “Midiann yaab aah ŋa Israel yaab pu na, daa bitafal kina pu. Israel yaab yaa ŋa kina doo kan, nee aapuwɔb aa ga kpo.”

³ Kina pu na, Moses nan bui Israel yaab ke, “Gor nibaa man ki buen butɔb ki ti tak Midiann yaab, baah ŋa Uwumbɔr bakaa pu na.

⁴ Ni nyan linibol mɔmɔk ni bijab lichur libaa, bi buen butɔb ngbaan.”

⁵ Bi nan nyan bijab lichur libaabaa le linibol mɔmɔk ni, le bi nan ti kpaan ki saa bijab ŋichur kipiik ni ŋilee, ki gor bibaa bi buen butɔb.

⁶ Moses nan cha utotoor Eleasar aajapɔɔn, u bi nan yin u ke Fineas na, di bi buen butɔb ngbaan yaan. Uma le nan joo Uwumbɔr aawan, ni kakaan tiib bi bi joo yin tɔb na.

⁷ Uwumbɔr aah nan bui Moses ke u ŋa pu na, le waajab nan ti tak Midiann yaab, ki ku bijab mɔmɔk,

⁸ ki kpee Midiann yaab aabɔrb biŋmu bimina: Efi, ni Rekem, ni Sur, ni Hur, ni Reba. Bi nan ku Beor aajapɔɔn Balaam mu.

⁹ Israel yaab nan chur Midiann yaab aapiib ni mbim tinaagbiir, le ki gaa baawakor, ki yoor baawangol mɔmɔk,

¹⁰ le ki see baatim, ni itingbaan mmii.

¹¹ Baah nan jenn bi ki gaa tiwan nimɔk na, bi nan yoor ni, ni binaagbiib, ni tiwakor mɔmɔk.

¹² Bi nan joo ni ni mɔmɔk Moses, ni Eleasar, ni Israel yaab mɔmɔk chee, Moab yaab aapaan mu bi Jɔɔdann aamɔɔl chee, ki lik Jeriko aatiŋ, limɔɔdapuul wɔb na.

Bijab aah gir kun ni pu na

¹³ Moses, ni Eleasar, ni binib ngbaan aayidam mɔmɔk nan nyan linampal, ki tooh bijab ngbaan nsan pu.

¹⁴ Moses nan gee liŋuul ŋa bininkpiib, ni bijab ngbaan aayidam bi nan nyan ni butɔb ni na.

¹⁵ U nan baa bi ke, “Ba ŋa ni joo ni bipiib bee mɔmɔk, kaa ku bi?

¹⁶ Ni teer man ke bipiib le nan kii tii Balaam, ki cha binib ngbaan nyan Uwumbɔr aapuwɔb, Peor aatiŋ ni. Nima le nan cha Uwumbɔr cha iween lir waanib pu, ki ku bi.

¹⁷ Nima pu na, ni ku mbijabim mɔmɔk, ni bipiib bi mɔmɔk nyi uja na,

¹⁸ ki taa ku bisapɔm ni bipiib bi kaa nyi uja na, ki li joo bi nibaa man.

¹⁹ Nimi bi mɔmɔk ku unii na, ni bi meeh linikpol na, ni taa kun ni linampal, ni kuun ki li bi nibaa chee ki ti saa iwiin ilole. Wintaa, ni winlole daal kan, ni toor ki ŋa nibaa, ni bipiib bi ni chur bi tinaagbiir na chain.

²⁰ Ni toor ki ŋa nimi aawanpeenkaan, ni tiwan ni ye igban aawan, ni iŋoob aakor aawan, ni idɔ na mɔmɔk chain.”

²¹ Le Eleasar u ye utotoor na nan bui binib bi nyan ni butɔb na ke, “Ikaal i Uwumbɔr di tii Moses na sɔ:

^22-23 Tiwan nimɔk mmii aan ŋmaa wu ni, ni ye salmaa, ni tikunabr, ni tikumann, ni tikur, ni tikur ti bi joo leŋni tiken na, ni tikur ti bi joo doon biini tiwan pu na, ni di pu mmii ni ki ŋa ni chain. Tiwan nimɔk gur na, ni di nnyun mu bi joo ŋani tiwan chain na, ki di finn tiwan ngbaan mɔmɔk ki ŋa ni chain.

²⁴ Winlole daal kan, ni finn nimi aawanpeenkaan aan ki ŋa nibaa chain, ki gir kun ni linampal.”

Baah nan yakr tiwan ni bi jenn gaa na pu na

²⁵ Uwumbɔr nan bui Moses ke,

²⁶ “Aa ni Eleasar, ni biyidam ngbaan mɔmɔk kpaan ki kahn tiwan nimɔk bi jenn gaa na, ki kpee binaagbiib, ni tiwakor mu.

²⁷ Chuu yakr tiwan ngbaan nfum mulee, ki di ligeln tii butɔb aajab, aan ki di ligeln liken tii litimbol ngbaan aanib bi gur na.

²⁸ Ligeln li ye bijab yaan na, ni yaa kahn binaagbiib ti saa ikui iŋmu kan, ni ti nyan ubaa ki tii Uwumbɔr; ni ŋa inaa, ni ibon, ni ipiih, ni iŋoob mu kina.

²⁹ Ni di tiwan ngbaan ki di tii Eleasar u ye utotoor na, ni li ye ipiinkpaan ki tii Uwumbɔr.

³⁰ Ligeln li ye litimbol ngbaan aanib yaan na, ni yaa kahn binaagbiib ti saa piiŋmu kan, ni ti nyan ubaa; ki ŋa inaa, ni ibon, ni ipiih, ni iŋoob mu kina, ki di ni tii Liifai yaab bi tun Uwumbɔr Aabool ponn ni lituln na.”

³¹ Moses ni Eleasar nan ŋa Uwumbɔr aah tuk bi pu na mɔmɔk.

^32-35 Bijab ngbaan aah nan jenn gaa tiwan ni na, ki kpee baah joo ni bibaa mu ni na sɔ: ipiih ni iŋoob nan kpaan ki saa ŋichur ikui iloob ni imonko itaa ni kipiik ni ŋiŋmu la; le inaa nan ye ŋichur imonko itaa ni kipiik ni ŋilee; le ibon nan ye ŋichur imonko itaa ni libaa, ni bisapɔm bi kaa nyi uja na ŋichur piitaa ni ŋilee.

^36-40 Baah nan yakr ligeln li ki tii bijab na, ipiih ni iŋoob nan ye ŋichur ikui itaa ni piitaa ni ŋilole, ni ikui iŋmu la, le baah nan nyan i ponn ni ki di tii Uwumbɔr na nan ye ikui iloob ni imonko itaa ni kipiik ni iŋmu; bijab ngbaan aanaa nan ye ŋichur piitaa ni ŋiloob la, le baah nan nyan i ponn ni ki di tii Uwumbɔr na nan ye imonko itaa ni kipiik ni ilee. Bijab ngbaan aabon nan ye ŋichur piitaa, ni ikui iŋmu la, le baah nan nyan i ponn ni ki di tii Uwumbɔr na nan ye imonko itaa ni ubaa. Bijab ngbaan aasapɔm nan ye ŋichur kipiik ni ŋiloob la, le baah nan nyan bi ki di tii Uwumbɔr na nan ye piitaa ni bilee.

⁴¹ Kina pu na, Moses nan di ipiinkpaan i bi nan di tii Uwumbɔr na, ki di tii Eleasar, Uwumbɔr aah nan tuk u ke u ŋa pu na.

^42-46 Baah nan yakr ni tii litimbol ngbaan aanib bi gur na, ni baah yakr ni tii bijab ngbaan na nan ŋak la, naah nan ye pu na sɔ: ipiih ni iŋoob nan kpaan ki ye ŋichur ikui itaa ni piitaa ni ŋilole, ni ikui iŋmu la; inaa nan ye ŋichur piitaa ni ŋiloob la; ibon nan ye ŋichur piitaa, ni ikui iŋmu la; le bisapɔm bi kaa nyi uja na nan ye ŋichur kipiik ni ŋiloob.

⁴⁷ Ligeln limina ponn ni, le Moses nan nyan binaagbiib, ni tiwakor ponn ni, tii Liifai yaab bi nan bi Uwumbɔr Aabool ponn ni ki tun waatuln na. Tiwan piiŋmu mɔmɔk ni kan, le u ti nyan nibaa tii bi, Uwumbɔr aah nan tuk u ke u ŋa pu na.

⁴⁸ Le biyidam bi nan joo bijab ngbaan na nan buen Moses chee,

⁴⁹ ki ti bui u ke, “Uninkpel, ti mɔmɔk aah nan di bijab bi buen butɔb ni ki gir ni aan ti mɔmɔk kahn timi aajab na, ubaa kina aa wɔŋ.

⁵⁰ Kina pu na, ti mɔmɔk ga joo ni taah nyan tiwan ni ti li joo tibaa, aan ni ye salmaa aawanyaan mɔmɔk: ibuen, ni ŋibun, ni mbɔmbim, ni tafajɔn tiib, ni ileen na nan tii Uwumbɔr, waah gaa timi lii pu na, aan u li kii timi.”

⁵¹ Moses ni Eleasar nan gaa salmaa aawanyaan ngbaan mɔmɔk.

⁵² Bijab ngbaan aayidam aawan ngbaan aah nan nyuun pu na ga nan li pii ndibim kuruwaa ikui ilee.

⁵³ Bijab bi kaa nan ye biyidam na nan joo baah nyan tiwan ni na.

⁵⁴ Le Moses ni Eleasar nan di salmaa aawan ngbaan mɔmɔk buen ti ŋa Libool ni, nima kan, Uwumbɔr ga li kii Israel yaab.