Nkahm 30 - Uwumbɔr aagbaŋ

Tipuur aabɔr

¹ Moses nan ki di Israel yaab aayidam aabɔr timina mɔmɔk tuk bi.

² Uja yaa puu tipuur ke u ga tii Uwumbɔr tiwan nibaa, bee u yaa puu ke waan ŋa tiwan nibaa kan, see u ŋa waah puu ke u ga ŋa pu na, u taa bii tipuur ngbaan.

³ Upiisapɔɔn yaa beenin ka ute do ki yaa puu tipuur ke u ga tii Uwumbɔr tiwan nibaa, bee u puu ke waan ki ŋa tiwan nibaa kan,

^4-5 see u ŋa waah puu ke u ga ŋa pu na. Upii ngbaan aate yaa yii buyoonn u ŋun tipuur ngbaan pu na, ki kiir u ke u taa ŋa tipuur ngbaan kan, upii ngbaan taa ki li joo tipuur ngbaan. Uwumbɔr ga di cha pinn upii ngbaan; ni ye le ke ute le yii ke u taa ŋa.

⁶ Ni yaa ye ke upii u kaa kpa tichar na yaa puu tipuur bamɔnn, bee u yaa peln le ki len kan, ki mu yaa puu ke waan ŋa tiwan nibaa, le ki nin mɔn tichar kan,

^7-8 see u pɔɔn ubaa ki ŋa tipuur ngbaan. Uchal yaa yii buyoonn u ŋun tipuur ngbaan pu na, ki kiir u, ke u taa ŋa ti kan, upii ngbaan taa ki joo tipuur ngbaan. Uwumbɔr ga di cha pinn upii ngbaan; ni ye le ke uchal le yii ke u taa ŋa.

⁹ Ukpopii, bee upii u uchal jenn u lii na mu yaa puu ke u ga tii Uwumbɔr tiwan nibaa, bee u yaa puu tipuur ke waan ŋa tiwan nibaa kan, see u ŋa waah puu pu na.

¹⁰ Upii u ka uchal chee na yaa puu ke u ga tii Uwumbɔr ipiin, bee u yaa puu tipuur ke u ga chuu ubaa, kaan ŋa tiwan nibaa kan,

^11-12 see u pɔɔn ubaa ki ŋa waah puu ke u ga ŋa pu na. Tɔ, uchal yaa yii buyoonn u ŋun tipuur ngbaan pu na, ki yaa yii ke u taa ŋa ti kan, upii na taa ki li joo tipuur ngbaan. Uwumbɔr ga di cha pinn u, ba pu? uchal le kiir u ke u taa ŋa ti.

¹³ Uchal kpa nsan ke u yii, bee u kii, upuu aah puu tipuur ti na.

¹⁴ Tɔ, nwiin mundaal uchal ŋun tipuur ngbaan pu ki woln kaa len tibaa na, see upii ngbaan pɔɔn ubaa ki ŋa tipuur ngbaan mɔmɔk. Uchal aah kaa len tibaa bundaal u ŋun ti pu na, u kii le na.

¹⁵ Uchal mu yaa bi ki nan ki yii ke upuu taa ŋa tipuur ngbaan kan, uma le ga gaa upii ngbaan aah kaa ŋa tipuur ngbaan pu na aatafadaan.

¹⁶ Ikaal imina le Uwumbɔr nan di tii Moses ki joo cha bipiib bi beenin bi bitetiib do na, ni bipiib bi mɔn tichar na aah puu tipuur kan, baah ga ŋa pu na.