Nkahm 3 - Uwumbɔr aagbaŋ

Aaronn aajapɔtiib

¹ N‑yoonn mu Uwumbɔr nan len Moses chee tibɔr Sainai Aajool pu na, Aaronn ni Moses aamaal aah nan ye pu na sɔ:

² Aaronn nan kpa mbijabim binaa la: Nadab, uma le nan ye upol, ni Abihu, ni Eleasa, ni Itamar.

³ Bi nan di Uwumbɔr aakpan kpir biyil pu, ke bi li ye bitotoorb.

⁴ Nadab ni Abihu nan di mmii yayan toor kitork, Sainai Aateersakpiin ni, le Uwumbɔr faa ku bi. Baa nan kpa mbim, nima pu na Eleasar ni Itamar le nan gur tun bitotoorb aatuln, buyoonn bite Aaronn nan bi limɔfal ni na.

Liifai yaab le bi nan nyan ke bi li tun bitotoorb aatuln

⁵ Uwumbɔr nan bui Moses ke,

⁶ “Li joo ni Liifai aanibol ki nan di bi tii Aaronn u ye utotoor na, bi li ter u.

⁷ Bima le ga li tun Maabool li m bi li ponn ni na aatuln aah ye pu na, ki tun tii bitotoorb, ni binib na mɔmɔk.

⁸ Bima le ga gaa Maabool, ni tiwan nimɔk bi li ponn ni na aatuln, ki tun tii Israel yaab bi gur na.

⁹ Liifai yaab aah ga tun lituln li na le ye ke bi li tun tii Aaronn ni ujapɔtiib.

¹⁰ Aa ga nyan Aaronn ni ujapɔtiib le bi li tun bitotoorb aatuln, unii u mu ki ban ke u tun bitotoorb aatuln na kan, u ga kpo.”

¹¹ Uwumbɔr nan bui Moses ke,

^12-13 “Min le nyan Liifai yaab ke bi li gur ye maanib. N‑yoonn mu m nan ku Ijipt yaab aajan aabim mɔmɔk na, m nan di cha nimi Israel yaab aamaal mɔmɔk ponn ni ubijabopol, ni nimi aawakor mɔmɔk ponn ni aajan aabo, ke ni li ye min yaan la. Dandana wee, maah ba ga li joo nimi Israel yaab aajan aabim bi li ye min yaab pu na, m nyan Liifai yaab ke bi li ye min yaab. Min le ye Uwumbɔr.”

Baah nan kahn Liifai yaab pu na

¹⁴ Sainai Aateersakpiin ni, le Uwumbɔr nan tuk Moses

¹⁵ ke u ŋmee Liifai yaab aayimbil ki kahn bi itaŋaal itaŋaal, ni mmaal mmaal, ki ŋmee ubijabo umɔk fuu uŋmal ubaa na, ni bi jer kina na,

¹⁶ le Moses nan ŋa kina.

^17-20 Liifai nan kpa mbijabim bitaa la, baayimbil sɔ: Gesonn, ni Kohaf, ni Merari; biyaabitiib joo bima aayimbil le yin baataŋaal pu aanib. Gesonn nan kpa mbijabim bilee la, baayimbil sɔ: Libni, ni Simei; Kohaf mu nan kpa mbijabim binaa la, baayimbil sɔ: Amram, ni Isar, ni Hebronn, ni Usiel; le Merari mu nan kpa mbijabim bilee, baayimbil sɔ: Mali, ni Musi. Biyaabitiib joo bima aayimbil le yin baamaal ni aanib na.

²¹ Gesonn aataŋaal ni aanib le nan ye Libni ni Simei aamaal.

²² Baah nan ŋmee mbijabim bi nan saa uŋmal ubaa, ni bi jer kina na aayimbil ki kahn bi na, bi nan ti kpaan saa ŋichur ŋilole, ni ikui iŋmu la.

²³ Ntaŋaal mumina le nan ye bi ga kal liwilir wɔb, Uwumbɔr Aabool aapuwɔb na,

²⁴ le Lael aajapɔɔn u bi nan yin u ke Eliasaf na nan ye baayidaan.

²⁵ Bima le nan lik Uwumbɔr Aabool ngbaan, ni tiwan ni gob ponn ni na, ni tiwan ni gob paa ni pu na, ni mbisamɔb aakekeln,

²⁶ ni ŋikeken ŋi bi di gob mann goln Libool ngbaan ni kitork aabimbiln na, ni mbisamɔb mu bi ga dii ni lichiln ni na aakekeln aatuln mɔmɔk. Bima le nan tun tiwan ngbaan mɔmɔk aatuln.

²⁷ Kohaf aataŋaal ni aanib le nan ye Amram, ni Isar, ni Hebronn, ni Usiel aamaal.

²⁸ Baah nan ŋmee mbijabim bi nan saa uŋmal ubaa, ni bi jer kina aayimbil na, bi nan ti kpaan ŋichur ŋiniin, ni ikui iloob la.

²⁹ Ntaŋaal mumina le nan ye bi ga kal Uwumbɔr Aabool ngbaan aaŋangii wɔb na.

³⁰ Le Usiel aajapɔɔn u bi nan yin u ke Eliasaf na nan ye baayidaan.

³¹ Bima le nan lik Uwumbɔr Aakaal Aadakaa, ni teebul, ni baah joo karyaa tiib chɔŋni tiwan ni pu na, ni kitork aabimbin, ni ŋisambil ŋi bitotoorb joo tun lituln Chain Aapepel ni na, ni likekeln li bii Chain Chain Aapepel aabisamɔb na. Bima le nan tun tiwan ngbaan mɔmɔk aatuln.

³² Utotoor Aaronn aajapɔɔn Eleasar le nan ye Liifai yaab aayidaan. Uma le nan lik binib bi tun lituln, Chain Aapepel ni na.

³³ Merari aataŋaal ni aanib le nan ye Mali ni Musi aamaal.

³⁴ Baah nan ŋmee mbijabim bi nan saa uŋmal ubaa, ni bi jer kina aayimbil na, bi nan ti kpaan ŋichur ŋiloob, ni ikui ilee la.

³⁵ Ntaŋaal mumina le nan ye bi ga kal Uwumbɔr Aabool aaŋangan wɔb na, le Abihail aajapɔɔn Suriel nan ye baayidaan.

³⁶ Bima le nan lik Uwumbɔr Aabool ngbaan aawan, ni laadɔja, ni idɔŋumkee, ni idɔ i dɔ taab na, ni laawan mɔmɔk. Bima le nan tun tiwan ngbaan mɔmɔk aatuln.

³⁷ Bima le nan ki lik idɔja, ni idɔ i dɔ taab na, ni ikpaabi, ni iŋmin i bi nan di ŋa lipaal aachiln na.

³⁸ Moses, ni Aaronn, ni ujapɔtiib le nan ye bi ga kal Uwumbɔr Aabool ngbaan aabisamɔb wɔb, liwipuul wɔb na. Bima le nan lik ki tun lituln mɔmɔk Chain Aapepel ni, ki tii Israel aanib. Unii u mu ki pɔɔn ubaa ke u tun lituln ngbaan na kan, u ga kpo la.

³⁹ Uwumbɔr aah nan bui Moses ke u ŋmee Liifai yaab aabijabim bi nan saa uŋmal ubaa ni bi jer kina aayimbil itaŋaal itaŋaal na, bi nan ti kpaan ki saa ŋichur moninko ni ŋilee la.

Liifai yaab le nan si njan aabijabim aasisiiyaan

^40-41 Uwumbɔr nan bui Moses ke, “Min le yeh Israel yaab aajan aabijabim mɔmɔk. Kina pu na, ŋmee Israel yaab aajan aabijabim mɔmɔk aayimbil, ki kahn bi saa uŋmal ubaa na, ni bi jer kina na. Maah ba ga gaa bi pu na, le m tee nyan Liifai yaab ke bi li ye min yaab. Min le ye Uwumbɔr. Ni mu ki kpee na, m gaa Liifai yaab aawakor ti mu li si nimi aawakor aajan aabim aasisii la.”

⁴² Moses nan kii ki ŋmee njan aabijabim mɔmɔk aayimbil,

⁴³ ki kahn bi saa uŋmal ubaa na, ni bi jer kina na, le bi nan ti kpaan saa ŋichur moninko ni ŋilee, ni ikui ilee ni imonko itaa ni kipiik ni bitaa.

⁴⁴ Uwumbɔr nan ki bui Moses ke,

⁴⁵ “Di Liifai yaab tii mi, bi li si Israel yaab aajan aabijabim aasisii, ki di Liifai yaab aawakor mu di tii mi, ti mu li si Israel yaab mɔmɔk aawakor aajan aabim aasisii.

⁴⁶ Israel yaab aajan aabijabim aah wiir ki jer Liifai yaab ki saa mbijabim ikui ilee ni imonko itaa ni kipiik ni bitaa na, see ni ki gir daa mbijabim ngbaan m chee.

⁴⁷ Aa di tikunabr aamombil ŋiŋmu, ŋi aanyunyuun ye maah siin pu na, pa ubaabaa pu,

⁴⁸ aan ki di ŋimombil ngbaan tii Aaronn ni ujapɔtiib.”

⁴⁹ Moses nan kii,

⁵⁰ le ki yoor tikunabr aamombil lichur libaa, ni ikui itaa ni imonko itaa ni ŋiŋmu,

⁵¹ ki di tii Aaronn ni ujapɔtiib.