Nkahm 29 - Uwumbɔr aagbaŋ

Libipɔln aatork aajim

¹ Ŋmalole aajan aawiindaal kan, ni kuun ni tɔb chee, ki nan doon Uwumbɔr; ni taa tun lituln libaa. Liyaadaal ngbaan kan, ni pii kakaan tiib.

² Ni toor kitork ki di see mmii ni, tii Uwumbɔr, ki nu mɔ u chee. Tiwakor ti ni ga di toor na sɔ: unaaja ubaa, ni upihja, ni libiln libaa aapihjabi ilole, i mɔmɔk taa li kpa iween, ki mu li ŋan chain.

³ Ni ki kpee na, ni ban boroboro aayon, ni olif aakpan, ki di ŋmal tɔb ni: ki di n‑yon kuruwaa bitaa kpee unaaja ngbaan pu, ki di n‑yon kuruwaa bilee kpee upihja ngbaan pu,

⁴ ki di n‑yon kuruwaa ubaa kpee upihjabo ubaabaa pu.

⁵ Ni ki kpee na, ni ban uŋoja toor titunwanbir aatork aan ki ŋa binib ngbaan chain.

⁶ Ni toor kina aatork ki kpee uŋmal mɔmɔk aajan aawiin aatork, ni iwiin mɔmɔk aatork ki ni joo seer mmii ni na, ni njikaabim aatork ni ŋisubil aadaan aatork na pu, ki tii Uwumbɔr. Tijikaar aatork kina aaboln nu mɔ Uwumbɔr chee.

Titunwanbir aachapinn aatork aajim

⁷ Ŋmalole aawinpiik daal kan, ni kuun ni tɔb chee ki nan doon Uwumbɔr, ni taa ji tijikaar tibaa, ki taa tun lituln libaa.

⁸ Ni toor kitork ki di see mmii ni, tii Uwumbɔr; kina aatork nu mɔ u chee: ni di unaajabo ubaa, ni upihja ubaa, ni libiln libaa aapihjabi ilole, i mɔmɔk taa li kpa iween, ki li ŋan chain,

⁹ ki toor baah siin njikaabim aatork pu na mu, ni li ye boroboro aayon ki di olif aakpan ŋmal mu ni, ki tii u: ni di n‑yon kuruwaa bitaa kpee unaajabo ngbaan pu, ki di n‑yon kuruwaa bilee kpee upihja ngbaan pu,

¹⁰ aan ki di n‑yon kuruwaa ubaa kpee upihjabo ubaabaa mu pu.

¹¹ Ni ban uŋoja toor titunwanbir aatork, ki ki toor uŋoja uken ki ŋa binib ngbaan chain, ki kpee uŋoja ngbaan pu, ni iwiin mɔmɔk aatork ki ni joo seer mmii ni na, ni njikaabim aatork, ni ŋisubil aadaan aatork pu.

Tikakar aawiin daal aatork aajim

¹² Ŋmalole aawinpiik ni iŋmu daal kan, ni mɔmɔk kuun ni, ki nan doon Uwumbɔr. Ni ji njim ngbaan ki nyuŋ Uwumbɔr ki ti saa iwiin ilole, ki taa tun lituln libaa.

¹³ Njan aawiin daal kan, ni toor tijikaar aatork ki tii Uwumbɔr, ki nu mɔ u chee: ni ban inaajabi kipiik ni itaa, ni ipihja ilee, ni libiln libaa aapihjabi kipiik ni inaa, i mɔmɔk taa li kpa iween, ki li ŋan chain.

¹⁴ Ni toor njikaabim aatork ki ŋeer na, ki kpee kitork ngbaan pu, ni ban boroboro aayon ki di olif aakpan ki di ŋmal mu ni: ni ban n‑yon kuruwaa bitaa kpee unaaja ubaabaa pu, ki ban n‑yon kuruwaa bilee kpee upihja ubaabaa pu,

¹⁵ ki ban n‑yon kuruwaa ubaa kpee upihjabo ubaabaa pu, ki kpee ŋisubil aadaan aatork pu.

¹⁶ Ni ki kpee na, ni ban uŋoja ki toor titunwanbir aatork. Ni toor kina aatork ki kpee iwiin mɔmɔk aatork ki ni joo seer mmii ni na pu, ni njikaabim aatork, ni ŋisubil aadaan aatork pu.

¹⁷ Lelee aawiin daal kan, ni ban inaajabi kikpiik ni ilee, ni ipihja ilee, ni libiln libaa aapihjabi kipiik ni inaa, i mɔmɔk taa li kpa iween, ki li ŋan chain, aan ki toor kitork tii Uwumbɔr.

^18-19 Ni toor liyaadaal ngbaan mu aatork, ni kitork kiken na mɔmɔk kpee, naah mɔk ke ni toor njan aawiin daal pu na.

²⁰ Nwintatar daal kan, ni ban inaajabi kipiik ni ubaa, ni ipihja ilee, ni libiln libaa aapihjabi kipiik ni inaa, i mɔmɔk taa li kpa iween, ki li ŋan chain, ki toor kitork tii Uwumbɔr.

^21-22 Ni toor liyaadaal ngbaan mu aatork, ni kitork kiken na mɔmɔk kpee, naah mɔk ke ni toor njan aawiin daal pu na.

²³ Nwinanar daal kan, ni ban inaajabi kipiik, ni ipihja ilee, ni libiln libaa aapihjabi kipiik ni inaa, i mɔmɔk taa li kpa iween, ki li ŋan chain, ki toor kitork tii Uwumbɔr.

^24-25 Ni toor liyaadaal ngbaan mu aatork, ni kitork kiken na mɔmɔk kpee, naah mɔk ke ni toor njan aawiin daal pu na.

²⁶ Winŋmu daal kan, ni ban inaajabi iwae, ni ipihja ilee, ni libiln libaa aapihjabi kipiik ni inaa, i mɔmɔk taa li kpa iween, ki li ŋan chain, ki toor kitork tii Uwumbɔr.

^27-28 Ni toor liyaadaal ngbaan mu aatork, ni kitork kiken na mɔmɔk kpee, naah mɔk ke ni toor njan aawiin daal pu na.

²⁹ Winloob daal kan, ni ban inaajabi iniin, ni ipihja ilee, ni libiln libaa aapihjabi kipiik ni inaa, i mɔmɔk taa li kpa iween, ki li ŋan chain, ki toor kitork tii Uwumbɔr.

^30-31 Ni toor liyaadaal ngbaan mu aatork, ni kitork kiken na mɔmɔk kpee, naah mɔk ke ni toor njan aawiin daal pu na.

³² Winlole daal kan, ni ban inaajabi ilole, ni ipihja ilee, ni libiln libaa aapihjabi kipiik ni inaa, i mɔmɔk taa li kpa iween, ki li ŋan chain, ki toor kitork tii Uwumbɔr.

^33-34 Ni toor liyaadaal ngbaan mu aatork, ni kitork kiken na mɔmɔk kpee, naah mɔk ke ni toor njan aawiin daal pu na.

³⁵ Winiin daal kan, ni kuun ni tɔb chee ki nan doon Uwumbɔr, ki taa tun lituln libaa.

³⁶ Ni toor kitork, ni li ye tijikaar aatork ki ni joo seer mmii ni na tii Uwumbɔr, ki nu mɔ u chee. Ni di unaajabo ubaa, ni upihja ubaa, ni libiln libaa aapihjabi ilole, i mɔmɔk taa li kpa iween, ki li ŋan chain, ki toor kitork tii Uwumbɔr.

^37-38 Ni toor liyaadaal ngbaan mu aatork, ni kitork kiken na mɔmɔk kpee, naah mɔk ke ni toor njan aawiin daal pu na.

³⁹ Uwumbɔr aah siin ikaal i ki joo cha kitork ki ni ga li joo seer mmii ni na, ni njikaabim aatork, ni ŋisubil aadaan aatork, ni kimɔbaan aatork aan ni li ŋani ki tii u, n‑yoonn mɔmɔk aajim ni na, le na. Kitork kina aaboln le ni ga li toor, ki kpee naah puu tipuur ki ban ni pa na, ni nisui aageehn aatork mu pu.

⁴⁰ Moses nan bui Israel aanib ngbaan tibɔr ti mɔmɔk Uwumbɔr nan tuk u na.