Nkahm 28 - Uwumbɔr aagbaŋ

Baah ga li tii ipiin aatork n‑yoonn mɔmɔk pu na

¹ Uwumbɔr nan bui Moses

² ke u mɔk Israel yaab ke ipiin aatiin aayoonn yaa fuu kan, bi tii Uwumbɔr tijikaar aapiin, waah ban pu na. Kina aapiin nu mɔ u chee.

³ Naah ga di tijikaar aapiin i tii Uwumbɔr iwiin mɔmɔk, aan ki di see mmii ni na sɔ: libiln libaa aapihjabi ilee, i taa li kpa iween, ki li ŋan.

⁴ Ni di njan aapihjabo toor kichakpiik ni, aan ki nan di uleler mu toor kijook wɔb.

⁵ Ni yaa ban ni di i toor n‑yoonn mu na kan, ni ban njikaabim aapiin mu kpee; ni li ye boroboro aayon kuruwaa ubaa, ki di olif aakpanyaan kpalba ubaa ki di buun mu.

⁶ Ni li joo ipiin ngbaan seer mmii ni, iwiin mɔmɔk. Njikaabim aapiin kina aaboln le bi nan pue see mmii tii Uwumbɔr, Sainai Aajool paab, ipiin ngbaan aaboln nu mɔ Uwumbɔr chee.

⁷ Ni di ŋisubil aadaan kpalba ubaa kpee njan aapiih pu, ki di kpir kitork aabimbiln taab.

⁸ Kijook wɔb mu kan, ni di lelee aapiih toor ke kichakpiik ni naah ba toor pu na, ki kpee ni mu aasubil aadaan. Ni mu ki ye tijikaar aapiin la, ipiin ngbaan aaboln nu mɔ Uwumbɔr chee.

Likpaakool daal aapiin

⁹ Likpaakool daal kan, ni di libiln libaa aapihjabi ilee i kaa kpa iween ki ŋan na, ni boroboro aayon kuruwaa bilee, ki di olif aakpan buun mu, aan ni li ye njikaabim aapiin, ni ŋisubil aadaan aapiin, ki toor kitork tii Uwumbɔr.

¹⁰ Likpaakool daal mɔmɔk kan, ni di kitork ki bi joo seer mmii ni kina aaboln na, ki di kpee iwiin mɔmɔk aatork aapiin, ni kaadaan aapiin pu, tii Uwumbɔr.

Uŋmal aajan aawiin daal aapiin

¹¹ Uŋmal aajan aawiin daal kan, ni toor kitork ki ni ga di see mmii ni na tii Uwumbɔr. Naah ga di tiwakor ti toor na sɔ: inaajabi ilee, ni upihja, ni libiln libaa aapihjabi ilole, i mɔmɔk taa li kpa iween, ki li ŋan.

¹² Ni ki di boroboro aayon ni olif aakpan buun ŋmal tɔb ni, ni li ye njikaabim aatork, ki di kpee tiwakor ngbaan pu: ni di n‑yon kuruwaa bitaa kpee unaaja mɔmɔk pu; ki di n‑yon kuruwaa bilee kpee upihja ngbaan pu;

¹³ ki di n‑yon kuruwaa ubaa kpee upihjabo mɔmɔk pu. Kitork ngbaan ye tijikaar aapiin la, le ki nu mɔ Uwumbɔr chee.

¹⁴ Ŋisubil aadaan mu ni ga di kpee kitork ngbaan pu na sɔ: ni ban ŋisubil aadaan kpalba bilee ki di kpee unaaja ubaabaa pu, ki ban ŋisubil aadaan kpalba ubaa ni ligeln ki di kpee upihja ngbaan pu, ki ban ŋisubil aadaan kpalba ubaa ki di kpee upihjabo ubaabaa pu. Libiln ni, iŋmal mɔmɔk, njan aawiin daal kan, ni toor kina aapiin aatork ki di see mmii ni tii Uwumbɔr.

¹⁵ Ni yaa ti ban ni toor iwiin mɔmɔk aatork, ni ndaan aatork kan, ni ban uŋoja kpee ki di toor titunwanbir aatork aapiin.

Boroboro u kaa kpa boroboro aanyɔk na aajim aatork

¹⁶ Libipɔln aajan aaŋmal, winpiik ni inaa daal kan, ni ŋa Lakr‑jer aajim ki nyuŋ Uwumbɔr.

¹⁷ Winpiik ni iŋmu daal kan, ni piin njim ki ti saa winlole daal, n‑yoonn ngbaan kan, ni li ŋmɔ boroboro u kaa kpa boroboro aanyɔk na.

¹⁸ Njim ngbaan aajan aawiin daal kan, ni mɔmɔk kuun ni tɔb chee ki nan doon Uwumbɔr; liyaadaal ngbaan, ni taa tun lituln libaa.

¹⁹ Ni toor kitork ki li ye tijikaar aatork ki di see mmii ni tii Uwumbɔr. Naah ga ban tiwakor ti toor na sɔ: inaajabi ilee, ni upihja ubaa, ni libiln libaa aapihjabi ilole, i mɔmɔk taa li kpa iween ki li ŋan.

²⁰ Ni ki di boroboro aayon ni olif aakpan buun ŋmal tɔb ni ki di kpee kitork ngbaan pu, naah mɔk pu na: ni ban n‑yon kuruwaa bitaa ki di kpee inaaja ngbaan ubaabaa pu, ki ban n‑yon kuruwaa bilee ki di kpee upihja ngbaan pu;

²¹ ki ban n‑yon kuruwaa ubaa ki di kpee upihjabo ubaabaa pu;

²² ki kpee na, ni ban uŋoja toor titunwanbir aatork aan ki ŋa binib ngbaan chain.

²³ Ni toor kina aatork ki di kpee kichakpiik mɔmɔk ni aatork na pu.

²⁴ Naah ga ŋa njim ngbaan ki ti saa iwiin ilole daal pu na, ni li toor tijikaar aatork kina ki tii Uwumbɔr, kina aatork nu mɔ u chee. Ni toor kina aatork ki di kpee iwiin mɔmɔk aatork, ni li ye kitork ki ni joo seer mmii ni na, ni ŋisubil aadaan aatork na pu, ki tii Uwumbɔr.

²⁵ Winlole daal kan, ni kuun ni tɔb chee ki nan doon Uwumbɔr, ki taa tun lituln libaa.

Lijikaacheel aatork aajim

²⁶ Ni yaa chee nimi aajikaar doo ki ban ni ji njim ngbaan kan, njan aawiin daal, ni yaa ban ni toor tijikaapɔnn aatork tii Uwumbɔr kan, ni kuun ni tɔb chee ki nan doon u, ki taa tun lituln libaa.

²⁷ Ni di tiwakor timina toor kitork ki di see mmii ni tii Uwumbɔr, kina aatork nu mɔ u chee: inaajabi ilee, ni upihja, ni libiln libaa aapihjabi ilole, i mɔmɔk taa li kpa iween, ki li ŋan chain.

²⁸ Ni di njikaabim aatork mu, ni li ye boroboro aayon ni olif aakpan ŋmal tɔb ni, ki di kpee kitork ngbaan pu, baah siin pu na: unaaja ubaa kan, ni di n‑yon kuruwaa bitaa kpee,

²⁹ upihja ngbaan kan, ni di n‑yon kuruwaa bilee kpee, upihjabo ubaabaa kan, ni di n‑yon kuruwaa ubaa kpee;

³⁰ ki ki kpee na, ni ban uŋoja toor titunwanbir aatork, aan ki ŋa binib ngbaan chain.

³¹ Ni toor kina aatork, ni ŋisubil aadaan aatork, ki di kpee iwiin mɔmɔk aatork ki ye kitork ki ni joo seer mmii ni na, ni njikaabim aapiin aatork na pu tii Uwumbɔr.