Nkahm 27 - Uwumbɔr aagbaŋ

Selofehad aabisatiib aabɔr

¹ Josef aajapɔɔn le nan ye Manase, le u mu aajapɔɔn nan ye Makir, le u mu aajapɔɔn nan ye Gilead, le u mu aajapɔɔn nan ye Hefer, le u mu aajapɔɔn nan ye Selofehad, le uma nan kpa bisatiib ŋmeen la. Bi nan yin bi ke Mala, ni Nowa, ni Hogla, ni Milka, ni Tirsa.

² Ubisatiib ngbaan nan buen ti sil Moses, ni utotoor Eleasar, ni biyidam biken, ni binib ngbaan mɔmɔk chee, Uwumbɔr Aabool aabisamɔb chee, ki bui ke,

³ “Tite nan kpo nteersakpiin ni la, ki mu aa kpa ubijabo ubaa. Waa nan kpee Kora ni waanib bi nan yii Uwumbɔr aamɔb na pu; u nan kpo ubaa aatunwanbir pu la.

⁴ Israel yaab yaa suln waabɔr waah kaa nan kpa ubijabo pu na, ni ŋan aa? Lik tite aado yaab aatiŋ ponn ni, ki tii timi kitiŋ.”

⁵ Moses nan di tibɔr ngbaan buen Uwumbɔr chee.

⁶ Le Uwumbɔr bui u ke,

⁷ “Selofehad aabisatiib aah ban pu na, ni ŋan; lik bite aado yaab chee, ki gii kitiŋ tii bi. Cha bi kan bite aafaal ngbaan,

⁸ ki tuk Israel yaab ke unii ubaa yaa kpo, kaa kpa japɔɔn kan, bi di waafaal tii ubisatiib.

⁹ Udaan yaa kaa kpa bisal mu kan, unaabitiib yoor waafaal.

¹⁰ Udaan yaa kaa kpa naabitiib kan, utekpetiib bee utewaatiib yoor waafaal ngbaan.

¹¹ Udaan yaa kaa kpa naabitiib, bee tekpetiib, bee tewaatiib kan, umaantɔtiib yoor waafaal aan lifaal ngbaan li bi waayimbil pu. Min Uwumbɔr aah siin pu na, ni li joo nkaal kpaan ngbaan kina.”

Uwumbɔr aah nan nyan Josua ke u gaa Moses pu na

¹² Uwumbɔr nan bui Moses ke, “Buen Abarim Aajool paab, ki ti yaar lik kitiŋ ki m ban m di tii Israel yaab na.

¹³ Aa yaa kan ki doo kan, nee aapuwɔb aa ga kpo ke aakpel Aaronn aah nan kpo pu na;

¹⁴ ba pu? nimi bilee ngbaan nan yii maamɔb, Sinn aateersakpiin ni. N‑yoonn mu Israel yaab mɔmɔk nan len mi tibɔbir Meriba aanyunbun chee na, ni nan yii, kaa cha binib ngbaan bee maapɔɔn mu bi chain na aah bi pu na.” Meriba nan ye nnyunbun mu nan bi Kades aatiŋ ni, ki bi Sinn aateersakpiin ni na la.

¹⁵ Le Moses mee limeel ke,

¹⁶ “Ndindaan Uwumbɔr, sin u ye umɔfadaan na, m mee ke aa nyan uja u ga ŋmaa joo binib bee na,

¹⁷ ki ga ŋmaa joo bi, bi to butɔb na, nima kan, saanib aan li bi ke ipiih i chuun kaa kpa upihkpaal na.”

¹⁸ Uwumbɔr nan bui Moses ke, “Nyan Nunn aajapɔɔn u bi yin u ke Josua na, uja u bi mbamɔm na, ki di aaŋaal paan uyil paab.

¹⁹ Cha u sil utotoor Eleasar ni binib ngbaan mɔmɔk aanimbiin ni, aan ki moon bi mɔmɔk aanimbiin ni nima, ki tuk bi ke Josua le min Uwumbɔr nyan ke u gaa si saatuln,

²⁰ ki di saaninkpir ngem tii u, nima kan, binib ngbaan mɔmɔk ga ŋun tii u.

²¹ U ga li lik Eleasar u ye utotoor na le pu, uma Eleasar le ga di tiwan ni bi yin ni ke Urim ni Tumim na bee maah ban pu na, le ki mɔk Josua, ni Israel yaab mɔmɔk, baah ga li dii mi pu na.”

²² Moses nan ŋa Uwumbɔr aah mɔk u ke u ŋa pu na. U nan cha Josua sil utotoor Eleasar ni Israel yaab mɔmɔk aanimbiin ni,

²³ le ki di uŋaal paan Josua aayil pu, le ki mɔk ke uma le gaa waasisii, ke Uwumbɔr aah tuk u pu na.