Nkahm 26 - Uwumbɔr aagbaŋ

Uwumbɔr aah nan cha Moses kahn Israel yaab lelee pu na

¹ Iweenlirkee aah nan ku Israel yaab pu na, nee aapuwɔb, le Uwumbɔr bui Moses, ni Aaronn aajapɔɔn u bi nan yin u ke Eleasar na ke,

² “Kahn Israel yaab mɔmɔk mmaal mmaal, bijab bi fuu ŋibin moninko ni bi jer ki ŋeer ke bi buen butɔb na.”

^3-4 Le Moses ni Eleasar kii kina, le ki kuun bijab bimɔk aabin fuu kina na. Bi nan kuun bi Moab yaab aapaan mubaa le ni, Jɔɔdann Aamɔɔl chee ki lik Jeriko aatiŋ, limɔɔdapuul wɔb. Israel yaab bee le Uwumbɔr nan nyan ni bi Ijipt aatiŋ ni:

⁵ Rubenn u nan ye Jakob aajan aabijabo na, waanibol ponn ni aamaal aanib le nan ye Hanok, ni Palu,

⁶ ni Hesronn, ni Kami aataŋaal.

⁷ Baah nan kahn mmaal ngbaan aanib na, bi nan saa bijab ŋichur imonko ilee ni ŋitaa, ni ikui ilole ni piitaa la.

⁸ Palu aayaabitiib le nan ye Eliab,

⁹ ni ujapɔtiib Nemuel, ni Datann, ni Abiram. Israel yaab nan nyan Datann ni Abiram la. Bima le nan yii Moses ni Aaronn, ki kpee Kora ni waadidiliib pu, buyoonn bi nan fii sil Uwumbɔr pu na.

¹⁰ Le Uwumbɔr cha kitiŋ piir ki di bi ni Kora ni waadidiliib nab, le bi nan kpaan kpo buyoonn mmii nan jin binib ikui ilee ni piiŋmu na; baakun nan ye nsurm le ki tii Israel yaab biken.

¹¹ Uwumbɔr aa nan ku Kora aajapɔtiib ma.

¹² Simeonn aanibol ponn ni aamaal aanib le nan ye Nemuel, ni Jaminn, ni Jakinn,

¹³ ni Sera, ni Saul aataŋaal.

¹⁴ Baah nan kahn mmaal ngbaan aanib na, bi nan ti saa bijab ŋichur moninko ni ŋilee, ni ikui ilee la.

¹⁵ Gad aanibol ponn ni aamaal aanib le nan ye Sefonn, ni Hagi, ni Suni,

¹⁶ ni Osni, ni Eri,

¹⁷ ni Arod, ni Areli aataŋaal.

¹⁸ Baah nan kahn mmaal ngbaan aanib na, bi nan ti saa bijab ŋichur imonko ilee, ni ikui iŋmu la.

^19-21 Juda aanibol ponn ni aamaal aanib le nan ye Sela, ni Peres, ni Sera, ni Hesronn, ni Hamul aataŋaal. Juda aajapɔtiib bilee bi bi nan yin bi ke Er, ni Onann na, bima nan kpo Kanaann aatiŋ ni la.

²² Baah nan kahn mmaal ngbaan aanib na, bi nan saa bijab ŋichur imonko itaa ni kipiik ni ŋiloob, ni ikui iŋmu la.

²³ Isakar aanibol ponn ni aamaal aanib le nan ye Tola, ni Pua,

²⁴ ni Jasub, ni Simronn aataŋaal.

²⁵ Baah nan kahn mmaal ngbaan aanib na, bi nan ti saa bijab ŋichur imonko itaa ni ŋinaa, ni ikui itaa la.

²⁶ Sebulunn aanibol ponn ni aamaal aanib le nan ye Sered, ni Elonn, ni Jaleel aataŋaal.

²⁷ Baah nan kahn mmaal ngbaan aanib na, bi nan ti saa bijab ŋichur imonko itaa, ni ikui iŋmu la.

²⁸ Josef u nan ye Manase ni Efraim aate na aanibol ponn ni:

²⁹ Manase aanibol ponn ni aamaal aanib le nan ye Manase aajapɔɔn Makir, u mu aajapɔɔn nan ye Gilead na;

³⁰ Gilead aayaabitiib nan ye Yeser, ni Helek,

³¹ ni Asriel, ni Sekem,

³² ni Semida, ni Hefer aataŋaal.

³³ Hefer aajapɔɔn Selofehad aa nan ma mbijabim see mpiibim ŋmeen; baah nan yin bi pu na sɔ: Mala, ni Nowa, ni Hogla, ni Milka, ni Tirsa.

³⁴ Baah nan kahn mmaal ngbaan aanib na, bi nan ti saa bijab ŋichur piiŋmu ni ŋilee, ni ikui ilole la.

³⁵ Efraim aanibol ponn ni aamaal aanib le nan ye Sutela, ni Beker, ni Tahann aataŋaal.

³⁶ Erann aataŋaal nan ye Sutela aayaabitiib la.

³⁷ Baah nan kahn mmaal ngbaan aanib na, bi nan saa bijab ŋichur piitaa ni ŋilee, ni ikui iŋmu la. Imaal ngbaan aanib nan ye Josef aayaabitiib la.

³⁸ Benjaminn aanibol ponn ni aamaal aanib le nan ye Bela, ni Asbel, ni Ahiram,

³⁹ ni Sefufam, ni Hufam aataŋaal.

⁴⁰ Ard ni Naamann aataŋaal nan ye Bela aayaabitiib la.

⁴¹ Baah nan kahn mmaal ngbaan aanib na, bi nan ti saa bijab ŋichur imonko ilee ni ŋiŋmu, ni ikui iloob la.

⁴² Dann aanibol ponn ni aamaal aanib le nan ye Suham aataŋaal.

⁴³ Baah nan kahn mmaal ngbaan aanib na, bijab nan ti saa ŋichur imonko itaa ni ŋinaa, ni ikui inaa la.

⁴⁴ Aser aanibol ponn ni aamaal aanib le nan ye Imna, ni Isfi, ni Beria aataŋaal.

⁴⁵ Heber ni Malkiel aataŋaal nan ye Beria aayaabitiib la.

⁴⁶ Aser nan kpa upiibo ubaa, bi yin u ke Sera.

⁴⁷ Baah nan kahn mmaal ngbaan aanib na, bi nan ti saa bijab ŋichur piiŋmu ni ŋitaa, ni ikui inaa la.

⁴⁸ Naftali aanibol ponn ni aamaal aanib le nan ye Jaseel, ni Guni,

⁴⁹ ni Jeser, ni Silem aataŋaal.

⁵⁰ Baah nan kahn mmaal ngbaan aanib na, bi nan ti saa bijab ŋichur imonko ilee ni ŋiŋmu, ni ikui inaa la.

⁵¹ Baah nan kahn Israel yaab aajab n‑yoonn ngbaan na, bi mɔmɔk nan ti kpaan ŋichur ikui iloob ni libaa, ni ikui ilole ni piitaa la.

⁵² Uwumbɔr nan bui Moses ke,

⁵³ “Chuu yakr kitiŋ tii ŋinibol ngbaan, ki ŋeer bimɔk aah wiir ki ti saa pu na.

^54-56 Aa yaa ban aa yakr kitiŋ ngbaan kan, aa cha bi too inaan, ki di kitiŋ ki wiir na tii linibol li aanib wiir na, ki di ki kaa wiir na tii linibol li aanib aa wiir na.”

⁵⁷ Liifai yaab aanibol ponn ni aamaal aanib le nan ye Gesonn, ni Kohaf, ni Merari aataŋaal.

⁵⁸ Baamaal ni aanib biken le nan ki ye imaal waatiir i bi yin bi ke Libni, ni Hebronn, ni Mali, ni Musi, ni Kora aataŋaal na. Kohaf le nan ye Amram aate,

⁵⁹ uma le nan joo Liifai yaab aapiibo u bi nan yin u ke Jokebed, aan bi nan ma u Ijipt aatiŋ ni na. Upii ngbaan nan ma mbijabim mulee le tii Amram, bi nan yin bi ke Moses ni Aaronn, le ki ma upiibo u bi nan yin u ke Miriam na mu.

⁶⁰ Le Aaronn mu nan ma mbijabim binaa, bi nan yin bi ke Nadab, ni Abihu, ni Eleasar ni Itamar.

⁶¹ Uwumbɔr nan faa ku Nadab ni Abihu, buyoonn bi nan di mmii mu kaa bi chain na see tulalee aayon tii u na.

⁶² Baah nan kahn Liifai yaab aabijabim bi nan saa uŋmal ubaa ki jer na, bi nan ti saa ŋichur moninko ni ŋitaa la. Bi nan kahn bi bibaa la, baa nan di bi kpaan Israel yaab biken chee, ba pu? baa nan yakr kitiŋ tii bi ke baah nan tii Israel yaab biken pu na.

⁶³ Moses ni Eleasar le nan ŋmee itaŋaal ngbaan mɔmɔk aayimbil, n‑yoonn mu bi nan kahn Israel yaab, Moab yaab aapaan mu bi Jɔɔdann aamɔɔl chee, ki lik Jeriko aatiŋ, limɔɔdapuul wɔb na.

⁶⁴ Moses ni Aaronn aah nan pue kahn Israel yaab, Sainai Aateersakpiin ni na, bi ponn ni ubaa aa nan ki bi n‑yoonn ngbaan.

⁶⁵ Uwumbɔr nan bui ke bi mɔmɔk ga kpo nteersakpiin ni, see Jefune aajapɔɔn Kaleb, ni Nunn aajapɔɔn Josua baanja le aan kpo.