Nkahm 25 - Uwumbɔr aagbaŋ

Israel yaab aah nan bi Peor aatiŋ ni pu na

¹ N‑yoonn mu Israel yaab nan kal Sitim Aafataŋ ni, Moab yaab aatiŋ ni na, le Israel yaab aajab piin ki yoor ki kpaan doo kitiŋ ngbaan yaab aapiib chee.

² Bipiib ngbaan nan chɔi bi, le bi chaa ti ji bido yaab aawaa ŋi bi dooni ŋi na aajim. Israel yaab nan ji baah di tijikaar ti tii baawaa na,

³ le ki dooni Peor yaab aawaal li bi yin li ke Baal na. Nima pu na, Uwumbɔr nan gee liŋuul bi pu,

⁴ le ki bui Moses ke, “Chuu Israel yaab aayidam mɔmɔk, aan ki ku bi nwiin pu, nnimbiin ni, le maan ki gee liŋuul binib ngbaan pu.”

⁵ Le Moses bui bininkpiib bi lik baanibol na ke, “Ni mɔmɔk ku unii umɔk bi nimi aanibol ponn ni ki dooni Peor yaab aawaal Baal na.”

⁶ Buyoonn Moses ni Israel yaab biken nan si wii Uwumbɔr Aabool aabisamɔb chee na, le Israel aanii ubaa yoor ni Moab yaab aapii ubaa, ki di koo waadiik ni, Moses ni biken aanimbil ni.

⁷ N‑yoonn ngbaan le utotoor Aaronn aayaabil u bi yin u ke Fineas aan ute nan ye Eleasar na nan kan u, le ki fii biken chee ki yoor waakpaatuŋ,

⁸ ki paan uja ngbaan ni upii ngbaan pu kidiik ni, le ki ti saa ku bimɔk bilee tam tɔb. Waah nan ŋa kina na, le iween i nan ku Israel yaab na di cha.

⁹ Israel yaab bi nan puun kpo Uwumbɔr aaŋuul pu na nan pii binib ŋichur moninko ni ŋinaa.

¹⁰ Uwumbɔr nan bui Moses ke,

¹¹ “Fineas aah ŋa pu na, maan ki gee Israel yaab pu liŋuul. U si nchaŋ ni, kaa kii ke biken ki doon liwaal libaa ki kpee m pu, le nima pu, maa kuln bi maaŋuul ni.

¹² Nima pu na, bui u ke m ban m puu tipuukpaan tii u, ti li kpa mpɔɔn ki cha n‑yoonn mu kaa kpa ndoon na.

¹³ Waah kaa kii ke Israel yaab ki li dooni ubaa ki kpee m pu, ki joo ni chapinn baatunwanbir pu na, u ni waamaal ga li ye bitotoorb le n‑yoonn mɔmɔk.”

¹⁴ Israel yaab aaja u Fineas nan kpaan ku u ni Midiann yaab aapii na, bi nan yin u ke Simri u nan ye Salu aajapɔɔn na. Salu nan ye Simeonn aanibol aamaal ponn ni aaninkpel la.

¹⁵ Upii ngbaan mu aayimbil le nan ye Kosbi. Ute Sur le nan ye Midiann yaab aataŋaal ibaa aaninkpel.

¹⁶ Le Uwumbɔr bui Moses ke,

¹⁷ “Fiin ki tak Midiann yaab ngbaan ki kuln bi,

¹⁸ baah tun titunwanbir ki ŋmann si Peor aatiŋ ni na pu, ni Kosbi u Fineas nan ku u buyoonn iween nan bi ku nimi Peor aatiŋ ni na aatunwanbir pu.”