Nkahm 24 - Uwumbɔr aagbaŋ

¹ N‑yoonn mue na, Balaam aah nan bee ke Uwumbɔr ban ke u ŋa tinyoor ŋa Israel yaab pu na, waa nan ki gir buen ke waah nan chaa pu, u ti baa ki bee waah ga len pu na. U nan fenn toŋ nteersakpiin wɔb,

² le ki kan Israel yaab ka ŋinibol ŋinibol. Uwumbɔr Aafuur Nyaan nan koo u ni,

³ le u nabr tibɔr timina: “Beor aajapɔɔn Balaam le nabr tibɔr timina; uja u waa chain

⁴ ki ŋun Uwumbɔr aah len pu na aabɔr. Maah dɔ ke maah geen na, le m likr ki kan Uwumbɔr Mpɔɔnsakpiindaan aah kpiir mɔk mi pu na:

⁵ Israel yaab aadichal ŋan sakpen la.

⁶ Ŋi si chɔl tɔb pu, ki naahn ŋibeebil aasui la, ki ki naahn tikpifar aasaak ki dɔ limɔɔl aagbaan na la, ki bi ke Uwumbɔr aah ŋum isui nyanyaan i na ki ki naahn santina aasui i si gbɔk nnyun na la.

⁷ Utaal ga nu baatiŋ ni pam, le bi bu baajikaabim kitiŋ ki soon na pu. Baabɔr ga li kpa mpɔɔn pam, ki jer Ubɔr Agag, le waapɔɔn ga taln ki buen dandar dandar.

⁸ Uwumbɔr le nyan ni bi Ijipt aatiŋ ni. U jaa bi pu ke upɔɔnaaja aah jaa ubaa pu pu na, le bi kuln baadim mɔmɔk, ki wii baakpab, ni baapiin yuk yuk.

⁹ Litimbol ngbaan kpa mpɔɔn sakpen ke uchinn aah kpa pu na la; u yaa dɔ geen kan, ubaa aan kaa ki finn u. Unii umɔk ŋa tinyoor ŋa Israel yaab pu na kan, Uwumbɔr mu ga ŋa tinyoor ŋa udaan pu; le unii umɔk puun lii bi pu na kan, Uwumbɔr mu ga puun lii udaan pu.”

¹⁰ Tɔ, liŋuul nan chuu Balak, le u ŋmaan linyakaakul, ki bui Balaam ke, “M yin si ke aa nan puun lii maadim le pu, nfum mutaa mɔk le na aa labr ŋa tinyoor ŋa bi pu.

¹¹ Dandana wee, siir ki li chaa kun. M puu ke m ga pa si, le Uwumbɔr kiir si ke aa taa kan tipar ngbaan.”

¹² Balaam nan giin bui u ke, “M tuk saah nan tun ni binib bi na

¹³ ke aa yaa ga di tikunabr ni salmaa u mɔmɔk gbii saabɔrdichal ni na tii mi kan, maan ŋmaa yii Uwumbɔr ki ŋa maageehn. M ga len Uwumbɔr aah bui mi ke m len pu na baanja la.”

Balaam aah nan nabr kookoo aabɔr pu na

¹⁴ Balaam nan ki bui Balak ke, “Dandana wee, m ban m gir kun ndo yaab chee la; waahr aan m gir buen na, cha m sur si, ki tuk si Israel yaab aah ga nan ŋa saanib pu, n‑yoonn mu choo na.”

¹⁵ Le u nan nabr tibɔr timina: “Beor aajapɔɔn Balaam le nabr tibɔr timina, uja u waa chain

¹⁶ ki ŋun Uwumbɔr aah len pu na aabɔr. Uwumbɔr u kaa kpa ŋeen aatɔ na le tii mi nnyim mu nyan ni u chee na. Maah dɔ ke maah geen na, le m likr ki kan Uwumbɔr Mpɔɔnsakpiindaan kpiir tibɔr tee mɔk mi.

¹⁷ M nan lik kan n‑yoonn mu choo na aabɔr, le ki kan Israel yaab aatimbol. Ubɔr u bi ke liŋmabil li wiin chain na ga nan nyan ni litimbol ngbaan ni. Libɔrdabil ga nan nyan ni Israel aatimbol ponn ni, ki ga bii Moab yaab aayidam, le ki gbaa yaa mbiindam mɔmɔk.

¹⁸ U ga nyaŋ waadim bi mɔmɔk bi Edom aatiŋ ni na, ki gaa baatiŋ di ŋa uyaan, Israel yaab ga li nyaŋni kina le ki cha.

¹⁹ Israel yaab aatimbol ga nyaŋ bi, ki taa bi diin, ki ku binib bi mɔmɔk nan ŋmar na.”

²⁰ Balaam nan ki kan tibɔkpiirkaan ti ye Amalek yaab aabɔr na, le ki nabr tibɔr timina: “Amalek yaab aatimbol le nan kpa mpɔɔn sakpen ki jer ŋitimbol mɔmɔk. Tɔ, ki cha baadoon na, bi ga nan kuln kookoo.”

²¹ U nan ki kan Kenn yaab mu aabɔkpiirkaan, le ki nabr tibɔr timina: “Saanib aah ka nin chee, aan ni dak ke ni pɔɔ, ki bi ke unyoon aadil li bi lijool aamɔju pu na,

²² bi ga nan kuln nimi Kenn yaab mɔmɔk. N‑yoonn ngbaan le Asiria yaab ga nan chur nimi tinaagbiir.”

²³ Balaam le nan ki nabr tibɔr timina: “Binib ngbaan nyan ni la chee, ki bi kuuni ŋŋangan wɔb?

²⁴ Binib bi jenn gaal biken aatim na ga nyan ni Saiprus aatiŋ ni. Bi ga nyaŋ Asiria ni Eber aatim, le bi mu ga nan kuln doo, ki joo cha n‑yoonn mu kaa kpa ndoon na.”

²⁵ Balaam nan siir le ki gir kun udo aatiŋ ni, le Balak mu siir buen udo.