Nkahm 23 - Uwumbɔr aagbaŋ

¹ Balaam nan bui Balak ke, “Maa kitork aabimbin ŋilole siin mi, aan ki li joo ni inaaja ilole, ni ipihja ilole.”

² Balak nan ŋa Balaam aah bui u ke u ŋa pu na, le u ni Balaam kpaan di unaaja, ni upihja toor kitork, ŋibimbin ngbaan libaabaa pu.

³ Balaam nan bui Balak ke, “Li si gbɔk kitork aabimbin ngbaan, aan m buen do, ki ti lik ke Uwumbɔr ga kpiir ba aabɔr tuk mi. M ga tuk si waah kpiir tibɔr ti mɔk mi na.” Kina pu na, u nan buen ligongoln paab ubaa la.

⁴ Le Uwumbɔr dan u chee nima. Balaam nan bui u ke, “M maa kitork aabimbin ŋilole, le ki di unaaja, ni upihja toor kitork, ŋibimbin ngbaan mɔmɔk libaabaa pu.”

⁵ Uwumbɔr nan tuk Balaam waah ga len pu na, le ki tun u Balak chee, u ti bui u tibɔr ngbaan.

⁶ Le u gir buen Balak ni Moab yaab aayidam bi nan beenin si gbɔk kitork ki bi di see mmii ni na.

⁷ Balaam aah nan nabr tibɔr ti na sɔ: “Moab yaab aabɔr u bi yin u ke Balak na le yin ni mi Siria yaab aabɔr aatiŋ ki bi ŋijoo ŋi bi liwipuul wɔb na ni. U bui ke, ‘Dan nan len tibɔr tii mi. Puun lii Israel yaab pu.’

⁸ M ga ŋa kinye ki puun lii binib bi Uwumbɔr aa puun lii bi pu na, bee m len tibɔbir lii binib bi Uwumbɔr aa len tibɔbir lii bi pu na.

⁹ Maah si ŋitakpal fɔfɔŋ ŋee pu na, m waa bi; maah si ŋigongon ŋee pu na, m waa bi. Bi ye linibol li kaa di libaa ŋmal biken ponn ni na la. Bi nyi ke bi kan tinyoor jer ŋinibol ŋiken.

¹⁰ Israel yaab ngbaan wiir pam, le unii aan ŋmaa kahn bi. Uwumbɔr cha m kpo ke waanib aah ga kpo pu na. U cha m kpo nsuudoon ni, ke waaninyaam na.”

¹¹ Le Balak bui Balaam ke, “Ba ŋa aa ŋani kina? M joo ni si do ke aa nan puun lii maadim le pu, le aa tee ŋa tinyoor ŋa bi pu.”

¹² Le u giin bui ke, “Uwumbɔr aah bui ke m len pu na, kina baanja le m ga ŋmaa len.”

Balaam aah nan nabr lelee aabɔr pu na

¹³ Le Balak ki bui ke, “Li dii ni mi, aan ti ki buen niken chee, aa ti kan Israel yaab ngbaan ngem. Sil nima chee, aan ki puun lii bi pu ki tii mi.”

¹⁴ Nima pu na, u nan di u buen Sofim aakpaab ni, Pisga Aajool paab. Nima chee mu u nan ki maa kitork aabimbin ŋilole, le ki di unaaja ni upihja toor kitork, ŋibimbin ngbaan libaabaa pu.

¹⁵ Balaam nan bui Balak ke, “Li si gbɔk saatork ki aa di see mmii ni na, aan m buen do ki ti lik ke Uwumbɔr ga kpiir ba aabɔr tuk mi.”

¹⁶ Uwumbɔr nan dan Balaam chee, le ki nan tuk u waah ga len pu na, ki giin tun u Balak chee, ke u ti di tibɔr ngbaan tuk u.

¹⁷ Le u gir Balak ni Moab aayidam bi nan beenin si gbɔk kitork ki bi di see mmii ni na. Balak nan baa u Uwumbɔr aah len pu na.

¹⁸ Balaam aah nan nabr tibɔr ti na sɔ: “Sipor aajapɔɔn Balak, dan, ki nan pel maah ban m len pu na.

¹⁹ Uwumbɔr aa ye unii ki geei inyamɔn, waa ye unibɔn le ki kpelni waalandak. U yaa puu ke u ga ŋa pu na kan, see u ŋa kina. U len, le ni ŋani kina.

²⁰ U tuk mi ke m ŋa tinyoor ŋa bi pu la. Uwumbɔr yaa tee ŋa tinyoor kan, maan ŋmaa kpeln ki len tibɔyayan.

²¹ Maah kan pu na, Israel yaab aan kan tibɔbir, bee limukl libaa. Bidindaan Uwumbɔr bi bi chee; bi mooni ke u ye baabɔr la.

²² Uwumbɔr le nyan ni bi Ijipt aatiŋ ni, le ki jaa bi pu ke upɔɔnaaja aah jaa ubaa pu pu na.

²³ Nnyɔk mubaa aa bi, le kisook mu aa bi ki ga ŋmaa ŋa Israel yaab nibaa. Binib ga len Israel yaab aabɔr ke, ‘Lik Uwumbɔr aah ŋa pu tii bi na.’

²⁴ Israel yaab aanibol naahn uchinn sakpiin la. U yaa kan waadin kan, waan kal fuur see u chuu u ki bii u, le ki nyu waah ku bi na aasin kookoo.”

²⁵ Le Balak bui Balaam ke, “Aa yii ke saan puun lii Israel yaab pu, kina pu na, taa ki labr ŋa tinyoor ŋa bi pu.”

²⁶ Le Balaam giin bui u ke, “Maa tuk si ke m ga ŋmaa ŋa Uwumbɔr aah bui ke m ŋa pu na la aa?”

Balaam aah nan nabr taataa aabɔr pu na

²⁷ Balak nan ki bui ke, “Li dii ni mi aan ti ki buen niken chee. Nibaakan Uwumbɔr ga cha aa sil nima chee ki puun lii bi pu ki tii mi.”

²⁸ Nima pu na, u nan di Balaam buen Peor Aajool paab, ni lik nteersakpiin wɔb la.

²⁹ Le Balaam ki bui u nima chee mu ke, “Maa kitork aabimbin ŋilole tii mi, ki li joo ni inaaja ilole, ni ipihja ilole, m toor kitork.”

³⁰ Le Balak ŋa waah mɔk u pu na, ki di unaaja ni upihja toor kitork, ŋibimbin ngbaan mɔmɔk libaabaa pu.