Nkahm 22 - Uwumbɔr aagbaŋ

Moab yaab aabɔr aah nan tun yin Balaam pu na

¹ Israel yaab nan fii baah nan ka nin chee na, le ki ti kal Moab yaab aapepel, kitiŋ taar kibaa ni, ki bi Jɔɔdann aamɔɔl liwipuul wɔb, ki tok Jeriko aatiŋ la.

² N‑yoonn mu Sipor aajapɔɔn, u bi nan yin u ke Balak, aan u ye Moab yaab aabɔr na ŋun Israel yaab aah ŋa Amor yaab pu, ki wiir sakpen pu na,

³ le ijawaan chuu u ni waanib mɔmɔk.

⁴ Le Moab yaab bui Midiann yaab aayidam ke, “Binib sakpem bimina ga dan nan bii tiwan nimɔk bi ti chee na dandana wee, bi ga bii ni mɔmɔk ke unaaja yaa kan timonyaan kan, u ŋmɔ ti mala mala pu na la.”

⁵ Nima pu na, Ubɔr Balak nan tun bi ti yin Beor aajapɔɔn u bi nan yin u ke Balaam, u nan bi Petor aatiŋ, ki bi gbɔk Yufrates Aamɔɔl li bi Amau aatiŋ aapepel ni na. Tibɔr ti nan nyan ni Balak chee aan bi ti bui u na sɔ: “M ban aa li nyi ke litimbomɔln libaa nyan ni Ijipt aatiŋ ni, binib ngbaan bi kitiŋ kee mɔmɔk pu, ki ban ke bi gaa timi aatiŋ mɔmɔk.

⁶ Bi wiir jer timi, kina pu na, m ban ke aa dan nan puun lii bi pu ki tii mi. Aa yaa ŋa kina kan, nibaakan ti ga ŋmaa nyaŋ bi aan ki jenn nyan bi kitiŋ kee ni. M nyi ke aa yaa len tibɔnyaan lii unii pu kan, u kani tinyoor la, le aa yaa len tibɔbir lii unii pu kan, u kani tibɔr ti kaa ŋan na.”

⁷ Nima na, Moab yaab, ni Midiann yaab aayidam nan ban ŋimombil ŋi bi ga ti di pa tipuur ngbaan pu na, le ki buen Balaam chee ki ti bui u Balak aabɔr ngbaan.

⁸ Balaam nan bui bi ke, “Doon man, aan ni yaa fe woln fen kan, m tuk nimi Uwumbɔr aah ga bui mi pu na.” Le Moab yaab aayidam ngbaan doon Balaam do.

⁹ Uwumbɔr nan dan Balaam chee ki nan baa u ke, “Bijab bee nyan ni la chee ki koo aado?”

¹⁰ Le u bui ke, “Moab yaab aabɔr Balak le tun ni bi, bi nan bui mi

¹¹ ke linibol libaa aanib nyan ni Ijipt aatiŋ ni, ki yaa gaa kitiŋ, le u ban ke m nan puun lii bi pu, aan u ŋmaa nyaŋ bi, aan ki jenn nyan bi waatiŋ ni.”

¹² Uwumbɔr nan bui Balaam ke, “Taa dii bijab ngbaan buen, ki mu taa puun lii Israel yaab pu, ba pu? maanyoor le bi bi pu.”

¹³ Naah woln kichakpiik ni na, le Balaam buen Balak aanib ngbaan chee le ki ti tuk bi ke, “Gir kun man; Uwumbɔr aa kii ke m dii nimi buen.”

¹⁴ Le bi gir kun ki ti tuk Balak ke Balaam yii, ke waan dii ni bi ki dan.

¹⁵ Balak nan ki gir tun ni binib bi wiir ki ye binikpaam ki jer njan yaab na.

¹⁶ Bi mu nan buen Balaam chee ki ti di Balak aabɔr tee tuk u, “Uninkpel, taa cha nibaa kiir si aan saan ŋmaa dan m chee.

¹⁷ Aa yaa ban m pa ki ŋa saah ban pu na mɔmɔk kan, m ga ŋa kina. Uninkpel, dan nan puun lii binib ngbaan pu ki tii mi.”

¹⁸ Le Balaam giin bui bi ke, “Ni yaa ye ke Balak ga di tikunabr ni salmaa u kookoo bi waadichal ni na le tii mi, bee ni yaa ti ki ye tibɔr waatiir, bee tisakpeln pu kan, maan ŋmaa yii Ndindaan Uwumbɔr aamɔb.

¹⁹ Tɔ, bininkpiib, doon man ke biken na aah nan doon pu na, nima kan, m ga baa Uwumbɔr ki lik ke u ga tuk mi kinye.”

²⁰ Kinyeek ngbaan le Uwumbɔr dan Balaam chee le ki nan bui u ke, “Binib bee yaa dan ke aa dii bi kan, gor aan ki dii bi buen, m mu tee ban ke aa ti ŋa maah bui si ke aa ŋa pu na baanja la.”

²¹ Kina pu na, naah woln na, le Balaam gor waabon, le ki dii Moab yaab aayidam ngbaan buen.

Balaam ni waabon aabɔr

²² Balaam aah dii bi buen na, naa nan mɔɔr Uwumbɔr. Balaam aah nan cha ki dik ubon pu, aan waatutum bilee dii u na, le Uwumbɔr cha waatuun ti sil nsan ni ke u kiir u.

²³ N‑yoonn mu ubon ngbaan kan Uwumbɔr aatuun ngbaan si nsan ni ki joo kijuk na, le u faa ngɔnn dii timoor ni. Balaam nan faa ubon ngbaan le ki giin u taŋ nsan pu.

²⁴ Le ntuun ngbaan ki buen ti sil nsan aah kaa waa nin chee, ki bi ŋisubil aasar tilee aakaasisiik ni, aan bi di ŋitakpal maa ŋigon ŋipepel mɔmɔk ŋilee na.

²⁵ Ubon ngbaan aah ki kan ntuun ngbaan si nima chee na, le u di ubaa duur ligoln ki nyii Balaam aataal tam ligoln. Le Balaam ki gir faa waabon ngbaan lelee.

²⁶ Le ntuun ngbaan ki gir foor ti sil nsan ni, nin chee mpaan aa bi tiwan nibaa ga ŋmaa fenn nibaa ŋipepel mɔmɔk ŋilee pu na.

²⁷ Ubon ngbaan aah kan ntuun ngbaan n‑yoonn mue na, le u doon kitiŋ, Balaam aataab. Balaam aaŋuul nan fii, le u di waajaangbeek faa waabon ngbaan.

²⁸ Le Uwumbɔr cha ubon ngbaan len tibɔr, le ki bui Balaam ke, “M ŋa si ba? Ba ŋa aa faa mi nfum mutaa kina?”

²⁹ Le Balaam giin bui waabon ke, “Saah di mi ŋa ujɔr pu na le m gbaa si. M yaa ba joo kijuk do kan, m ba ga ku si.”

³⁰ Le ubon ngbaan giin baa u ke, “Naa ye m pu le aa diŋni n‑yoonn mɔmɔk aa? M kee ŋa si kina nwiin mbaa aa?” Le Balaam giin bui ubon ngbaan ke, “Aayii.”

³¹ Le Uwumbɔr cha Balaam aanimbil woln, le u kan ntuun ngbaan si nima chee ki joo kijuk. Libuul ni, le Balaam tar lir kitiŋ, ntuun ngbaan aanimbiin ni.

³² Le ntuun ngbaan baa u ke, “Ba ŋa aa faa saabon ngbaan nfum mutaa mɔmɔk kina? Naa lir si ke aa buen nsan ngbaan, nima pu le m dan ke m nan kiir si nsan ni.

³³ Nima pu le saabon ngbaan kan mi nfum mutaa mɔmɔk ki gɔln dii timoor ni. U yaa kaa ba gɔln kan, m ba ga ku si le ki cha ubon ngbaan.”

³⁴ Le Balaam giin bui ke, “M tun titunwanbir. Maa nyi ke aa si nsan ni ke aa kiir mi; nima pu na, aa yaa nyi ke naa lir mi m buen kan, cha m gir kun.”

³⁵ Le ntuun ngbaan bui u ke, “Li dii bijab ngbaan cha. Aa mu ti len maah ban ke aa len pu na baanja.” Kina pu na, Balaam nan dii bi buen.

Balak aah tooh Balaam nsan pu pu na

³⁶ Buyoonn Balak ŋun ke Balaam bi nsan ni ki choo na, le u fii tooh u pu nsan ni, ki ti kan u Ar aatiŋ, ki bi Anonn Aamɔɔl chee, Moab yaab aatiŋ aanaanmɔk na ni.

³⁷ Le Balak baa u ke, “Ba ŋa maah tun yin si njan na, saa dan? Aa dak ke maah ga pa si pu na aan li wiir la aa?”

³⁸ Le Balaam giin bui u ke, “Maa dan aa? Tɔ, aa dak ke m kpa mpɔɔn m ŋa nibaa tii si ii? Uwumbɔr aah ban ke m len pu na, kina le m ga len.”

³⁹ Tɔ, Balaam nan dii Balak le bi buen Husof aatiŋ ni.

⁴⁰ Balak nan ti kɔr inaa, ni ipiih, le ki tii Balaam, ni biyidam bi nan dii u na tinann.

Balaam aah nan nabr njan aabɔr pu na

⁴¹ Naah woln kichakpiik ni na, le Balak di Balaam buen Bamof Baal aagongoln paab, nin chee Balaam ga li waa Israel yaab ngem na.