Nkahm 21 - Uwumbɔr aagbaŋ

Israel yaab aah nan nyaŋ Kanaann yaab pu na

¹ N‑yoonn mu Arad aatiŋ aabɔr u nan bi Kanaann aatiŋ aaŋangii wɔb na, nan ŋun Israel yaab pu ke bi dii Atarim aapepel choo bi nan jer, le u tak bi, ki chur bi ponn ni ngem.

² Le Israel yaab puu tipuur tii Uwumbɔr ke, “Aa yaa cha ti ŋmaa nyaŋ binib bee kan, ti ga kuln bi, ni baatim mɔmɔk.”

³ Uwumbɔr nan ŋun baah mee u pu na, le ki ter bi, bi nyaŋ Kanaann yaab ngbaan. Nima pu na, Israel yaab nan kuln bi, ni baatim mɔmɔk pel pel, le ki yin nima chee ke Homa.

Moses aah nan di tikumann mɔɔ uwaa pu na

⁴ Israel yaab nan nyan Hor aajool chee, le ki dii nsan mu cha baah nan puur Limɔɔkal Aanyusakpem nin chee na, nima kan, bi ga ŋmaa gɔln Edom aapepel aanaanmɔk. Baah nan cha na, le binib ngbaan aa nan ŋmaa chuu bibaa,

⁵ le ki ŋulni Uwumbɔr ni Moses pu. Bi nan len ke, “Ba ŋa ni nyan ni timi Ijipt aatiŋ ni ke ti nan kpo nteersakpiin mue ni, nin chee tijikaar ni nnyun aa bi na. Ti nuur tijikaar tichachaan tee pu a.”

⁶ Le Uwumbɔr cha iwaa i kpa liluul na dan nan junn bi, le bi ponn ni pam nan kpoi.

⁷ Le bi dan Moses chee ki nan bui u ke, “Taah len aa ni Uwumbɔr tibɔr ti kaa ŋan na, ti tun titunwanbir. Mee Uwumbɔr ke u gaa timi lii iwaa ngbaan chee.” Kina pu le Moses mee Uwumbɔr tii bi.

⁸ Le Uwumbɔr tuk Moses ke u di tikur mɔɔ uwaa, aan ki di u fin ndɔŋumkoo pu, nima kan, uwaa yaa juu umɔk aan u waan lik uwaanaankoo ngbaan na kan, u kan limɔfal.

⁹ Le Moses di tikumann mɔɔ uwaa, ki di u fin ndɔŋumkoo pu. Le umɔk uwaa nan juu u aan u waan lik na, udaan nan kan limɔfal.

Baah nan fii buen Moab yaab aafataŋ ni pu na

¹⁰ Israel yaab nan chuun kina, le ki ti kal Obof aatiŋ ni.

¹¹ Nee aapuwɔb le bi ki nyan nima, ki ti kal Abarim aatiŋ ki ye tilangbenn na ni, ki bi Moab yaab aapepel, liwipuul wɔb, nteersakpiin ni la.

¹² Bi nan nyan nima chee le ki ti kal Sered aafataŋ ni.

¹³ Bi nan ki fii nima chee mu, ki ti kal Anonn Aamɔɔl chee, ŋŋangan wɔb, nteersakpiin ni; mu di kina ti kar Amor yaab aatiŋ aapepel wɔb. Anonn Aamɔɔl le nan yakr Moab yaab ni Amor yaab aatim.

¹⁴ Nima pu le Uwumbɔr aatɔb aagbaŋ ni, bi nan ŋmee ke: “Waheb aatiŋ ki bi Sufa aapepel ni na, ni ŋifatan, ni Anonn Aamɔɔl,

¹⁵ ni tifatann ti di ti nyan Ar aatiŋ ni, ki di toŋ Moab yaab aanaanmɔk na.”

¹⁶ Bi nan ki nyan nima chee, le ki ti fuu nibaa chee, bi yin nima ke Inyunbun; nima chee le Uwumbɔr nan bui Moses ke, “Kuun ni binib ngbaan mɔmɔk aan m nan tii bi nnyun.”

¹⁷ N‑yoonn ngbaan le Israel yaab nan gaa nlahn mue ke: “Inyunbun, cha nnyun puu ni ponn ni; le ti ga gaa ilahn kina pu,

¹⁸ Inyunbun i bininyuum ni binib aayidam nan gbii na, cha nnyun puu niponn ni. Bi nan di ubɔr aajaak aajuk, ni baajaangbar le gbii i.” Bi nan nyan nteersakpiin ngbaan ni, le ki buen Matana aatiŋ ni,

¹⁹ le ki ki nyan nima chee ki ti fuu Nahaliel aatiŋ ni, le ki nyan nima chee ki buen Bamof aatiŋ ni,

²⁰ le ki ki nyan nima chee mu, ki buen Moab yaab aafataŋ ki bi Pisga Aajool aataab na ni. Aa yaa si nima chee kan, aa ga li waa nteersakpiin wɔb.

Baah nan nyaŋ ubɔr Sihonn ni ubɔr Og pu na

²¹ Israel yaab nan tun ntuun Amor yaab aabɔr u bi yin u ke Sihonn na chee, ki bui ke:

²² “Tii timi nsan aan ti bɔ dii saatiŋ ni ki jer. Ti ni timi aawakor ga li dii nsan la, taan dii tikpaasar, ni ŋisubil aasui aasar ponn ni, ki mu aan nyu nimi aanyunbun ni aanyun. Ti ga li dii nsanjakpaan pu la, le ki ti jer saatiŋ ni.”

²³ Ubɔr Sihonn aa nan kii, ke waan cha Israel yaab jer waatiŋ ni. U nan gor waajab, le ki buen Jahas aatiŋ ki bi nteersakpiin ni na, le ki ti tak Israel yaab.

²⁴ Israel yaab nan ku baadim ngbaan pam butɔb ngbaan ni, le ki gaa baatim mu bi Anonn Aamɔɔl ŋŋangan wɔb na ki ti ker Jabok Aamɔɔl, ki ti fuu Amonn yaab aanaanmɔk. Amonn yaab aajab nan kii baatim aanaanmɔk ni pɔɔ pam.

²⁵ Israel yaab nan jenn gaa Amor yaab aatim mɔmɔk, ki kpee Hesbonn, ni kaatingbaan mɔmɔk, le ki kal mu ni.

²⁶ Hesbonn le nan ye Amor yaab aabɔr Sihonn aatiyil. Sihonn ni Moab yaab aabɔr le nan ton butɔb, le Sihonn jenn gaa waatim mɔmɔk, ki ti nyan Anonn Aamɔɔl mɔk.

²⁷ Nima pu le binib bi naani ilahn na gaa ke: “Dan Hesbonn, ubɔr Sihonn aatiŋ ni. Ti ban ke bi ki gir maa ki siin.

²⁸ N‑yoonn mubaa, Hesbonn aatiŋ ni, Sihonn aajab nan tun tijar ke mmii na, le ki bii Ar aatiŋ ki bi Moab aatiŋ ni na, le ki kuln ŋigongon ŋi bi Anonn Aamɔɔl aapaacham na.

²⁹ Moab yaab, ni ye nimi falaa la. Nimi bi dooni liwaal Kemos na bii doo a. Nimi aawaal cha nimi aajab kpaln bikusam la, le Amor yaab aabɔr di nipuutiib ŋa binaagbiib.

³⁰ Le n‑yoonn mue, baamaal bii doo, ki yoor Hesbonn aatim mɔmɔk, ki ti ker Dibonn aatiŋ, ki ki yoor Nasim aatiŋ ni, ki ti ker Nofa aatiŋ ki bi gbɔk Medeba aatiŋ na.”

³¹ Nima pu na, Israel yaab nan gaa Amor yaab aatim ngbaan mɔmɔk, le ki kal nima.

³² Le Moses tun bipepekb, bi ti lik, aan ki bee baah ga ŋa pu ki tak Jaser aatiŋ na. Israel yaab nan ŋmaa nyaŋ, ki gaa ki, ni kaatingbaan mɔmɔk, le ki jenn nyan Amor yaab bi nan ka nima chee na.

³³ Nima chee le Israel yaab fenn ki dii Basann aasan, le Basann yaab aabɔr u bi yin u ke Og na nan yoor waajab, ke bi ti tak bi, Edrei aatiŋ ni.

³⁴ Le Uwumbɔr bui Moses ke, “Taa li san bi ijawaan, m ga cha aa nyaŋ u ni waanib, ni waatiŋ mɔmɔk. Aa ŋa u ke saah nan ŋa Sihonn, u nan ye Amor yaab aabɔr ki bi Hesbonn aatiŋ na pu na.”

³⁵ Nima pu na, Israel yaab nan ku ubɔr Og, ni ujapɔtiib, ni waanib mɔmɔk, unii ubaa kina aa nan gur ki ŋmar; le bi gaa waatiŋ mɔmɔk ki kal nima.