Nkahm 20 - Uwumbɔr aagbaŋ

Kades aatiŋ aabɔr

¹ Israel yaab aah nan nyan Ijipt aatiŋ ni ki ti saa ŋibin imonko ilee pu na aajan aaŋmal ni, le binib ngbaan mɔmɔk nan ti fuu Sinn aateersakpiin ni, le ki kal Kades aatiŋ ni. Nima chee le Miriam nan kpo, le bi sub u.

² Baah nan kal nin chee na, nnyun aa nan bi nima, kina pu na, binib ngbaan nan kuun gob Moses ni Aaronn,

³ le ki ŋulni bi pu ki len ke, “Ti yaa ba kpo Uwumbɔr Aabool chee, biken chee kan, ni ba soor.

⁴ Ba ŋa ni joo ni timi nteersakpiin mue ni do? Ni ban ke ti ni timi aawakor kpo do la aa?

⁵ Ba ŋa ni nyan ni timi Ijipt aatiŋ ni, ki cha ti nan bi falaa ni do; tijikaar tibaa ga ŋmaa ŋa do oo? Njikaabim ni ŋisubil aasui aa bi kpala. Nnyun aa kpaan bi, ti nyu.”

⁶ Le Moses ni Aaronn siir foor binib ngbaan chee, le ki ti sil Uwumbɔr Aabool aabisamɔb chee, le ki tar lir kitiŋ bipuu pu, le Uwumbɔr aawiihn mu moor ki deer ŋinimbil na sunn ni bi chee.

⁷ Le Uwumbɔr bui Moses ke,

⁸ “Ti yoor lidabil li dɔ Nkaal Aadakaa chee na, aan aa ni Aaronn kuun ni binib ngbaan mɔmɔk, ki len litakpal sakpeln limina chee tibɔr, binimbil ni, le nnyun ga nyan ni li ponn ni. Ni yaa ŋa kina kan, nnyun ga nyan ni li ponn ni aan binib ngbaan ni baawakor kan nnyun ki nyu.”

⁹ Uwumbɔr aah bui u kina na, le Moses buen ti yoor ni lidabil ngbaan.

¹⁰ U ni Aaronn nan kuun ni binib ngbaan mɔmɔk, litakpal sakpeln ngbaan aanimbiin ni, le Moses bui bi ke, “Li pel man, nimi tafalaaŋun aanib bee. Ti ga nyan nnyun litakpal lee ni, tii nimi ii?”

¹¹ Le Moses yoor lidabil ngbaan ki di faa litakpal ngbaan nfum mulee, le nnyusakpem puu nyan ni, le binib ngbaan mɔmɔk ni baawakor nyun.

¹² Uwumbɔr nan ki bui Moses ni Aaronn ke, “Naah kaa gaa mi ki kii mbamɔm, ki yii, kaa ban ni mɔk binib ngbaan maapɔɔn mu bi chain na pu na, maan cha ni di bi koo kitiŋ ki ponn ni m puu ke m ga di tii bi na ni.”

¹³ Nimina mɔmɔk nan ŋa Meriba aatiŋ ni, nin chee Israel aanib nan ŋulni Uwumbɔr pu na la, le u nan mɔk bi ke u bi chain.

Edom yaab aabɔr aah kaa nan kii ke Israel yaab jer waatiŋ ni pu na

¹⁴ Baah nan ka Kades aatiŋ ni na, le Moses nyan ntuuntiib tun Edom yaab aabɔr chee. Bi nan ti bui u ke, “Tibɔr tee nyan ni aanaabitiib Israel yaab chee la. Aa nyi taah ji falaa umɔk na.

¹⁵ Tiyaajatiib nan buen Ijipt aatiŋ ni, le ki ti koo nima ŋibin pam. Le Ijipt yaab saan tiyaajatiib, ni timi,

¹⁶ le ti wii yin Uwumbɔr ke u ter timi. U nan ŋun timi aawiil le ki tun ni waatuun, le u nan nyan timi Ijipt aatiŋ ni. N‑yoonn mue ti ka Kades aatiŋ ni la. Kitiŋ ngbaan bi saatiŋ aanaanmɔk la.

¹⁷ Uninkpel, tiin timi nsan aan ti bɔ dii saatiŋ ni ki jer. Ti ni timi aawakor ga li dii nsan la, taan dii tikpaasar, ni ŋisubil aasui aasar ponn ni, ki mu aan nyu nimi aanyunbun ni aanyun. Ti ga li dii nsanjakpaan la, le ki ti jer saatiŋ ni.”

¹⁸ Le Edom yaab giin bui bi ke, “Taan cha ni dii timi aatiŋ ponn ni ki jer. Ni yaa ban ni dii kan, ti ga fii ki tak nimi.”

¹⁹ Le Israel yaab bui ke, “Ti ga dii nsanja pu la, le ti ni timi aawakor yaa nyun nimi aanyun kan, ti ga pa mu pu. Ti ban ti dii jer kakaan la.”

²⁰ Le Edom yaab ki gir bui ke, “Taan kii tii nimi.” Le baajab bi pɔɔ ki wiir sakpen na fii ti tak Israel yaab.

²¹ Edom yaab aah kaa nan kii ke Israel yaab dii baatiŋ ni ki jer na, le Israel yaab fenn ki dii niyayan.

Aaronn aah kpo pu na

²² Israel yaab mɔmɔk nan fii Kades aatiŋ ni le ki ti fuu Hor Aajool chee.

²³ Ni nan bi Edom aatiŋ aanaanmɔk la. Nima chee le Uwumbɔr bui Moses ni Aaronn ke,

²⁴ “Aaronn aan koo kitiŋ ki m puu ke m ga di tii Israel yaab na ni, u ban u kpo la, ba pu? nimi bilee bee nan yii maamɔb Meriba aatiŋ ni.

²⁵ Di Aaronn ni ujapɔɔn Eleasar buen Hor Aajool pu.

²⁶ Ti chuu peer Aaronn aatotoorbɔkul ki di peen Eleasar. Aaronn ga ti kpo nima chee la.”

²⁷ Moses nan ŋa Uwumbɔr aah bui ke u ŋa pu na mɔmɔk. Bi nan buen Hor Aajool pu, binib ngbaan mɔmɔk aanimbil ni.

²⁸ Le Moses ti chuu peer Aaronn aatotoorbɔkul le ki di peen Eleasar. Lijool ngbaan aapaacham le Aaronn kpo, le Moses ni Eleasar gir sunn ni.

²⁹ Binib ngbaan mɔmɔk aah ŋun ke Aaronn kpo na, le bi mɔmɔk nan wii waakpuul ki ti saa iwiin piitaa.