Nkahm 2 - Uwumbɔr aagbaŋ

Baah nan yakr ŋinibol ki kahn bi pu na

¹ Uwumbɔr aah nan bui Moses ni Aaronn ke bi ŋa pu na sɔ:

² Israel yaab yaa ban bi kal kan, uja mɔk kal waanib aah yakr pu na, baatuutaa aataab aataŋaal chee. Bi mɔmɔk kal gob Libool.

^3-9 Liwipuul wɔb, bi ye Juda aanibol, ni ŋinibol ŋi kpee li pu na aanib bi kpaan ki kpa baatuutaa na aah ga kal ŋigetek ŋigetek baasalolm chee pu na le paa na: Juda aanibol aasaloln—Aminadab aajapɔɔn Nasonn—waajab nan ye ŋichur imonko itaa ni kipiik ni ŋinaa, ni ikui iloob Isakar aanibol aasaloln—Suar aajapɔɔn Netanel—waajab nan ye ŋichur piiŋmu ni ŋinaa, ni ikui inaa Sebulunn aanibol aasaloln—Helonn aajapɔɔn Eliab—waajab nan ye ŋichur piiŋmu ni ŋilole, ni ikui inaa Baah nan kpaan ki ti saa pu na sɔ: ŋichur nkub ni imonko inaa ni ŋiloob, ni ikui inaa. Juda aanibol, ni ŋinibol ŋi kpee li pu na, le ga li ye bisalolm.

^10-16 Ŋŋangii wɔb, bi ye Rubenn aanibol, ni ŋinibol ŋi kpee li pu na aanib bi kpaan ki kpa baatuutaa na aah ga kal ŋigetek ŋigetek baasalolm chee pu na le paa na: Rubenn aanibol aasaloln—Sedeur aajapɔɔn Elisur—waajab nan ye ŋichur imonko ilee ni ŋiloob, ni ikui iŋmu Simeonn aanibol aasaloln—Surisadai aajapɔɔn Selumiel—waajab nan ye ŋichur piiŋmu ni ŋiwae, ni ikui itaa Gad aanibol aasaloln—Dewel aajapɔɔn Eliasaf—waajab nan ye ŋichur imonko ilee ni ŋiŋmu, ni ikui iloob ni piiŋmu Baah nan kpaan ki ti saa pu na sɔ: ŋichur nkub ni piiŋmu ni libaa, ni ikui inaa ni piiŋmu. Rubenn aanibol, ni ŋinibol ŋi kpee li pu na, le ga paan lelee.

¹⁷ Tɔ, njan aagetek ŋilee, ni gbelngbeln aagetek ŋilee aakaasisik ni, le Liifai aanib ga li sak bi ni, ki tu Libool ngbaan aawan mɔmɔk. Kina le ŋigetek ngbaan ga chuun ki ti kal paan tɔb pu kina, le bi mɔmɔk siin baatuutaa tiib.

^18-24 Liwilir wɔb, bi ye Efraim aanibol, ni ŋinibol ŋi kpee li pu na aanib bi kpaan ki kpa baatuutaa na, aah ga kal ŋigetek ŋigetek baasalolm chee pu na le paa na: Efraim aanibol aasaloln—Amihud aajapɔɔn Elisama—waajab nan ye ŋichur imonko ilee, ni ikui iŋmu Manase aanibol aasaloln—Pedasur aajapɔɔn Gamaliel—waajab nan ye ŋichur piitaa ni ŋilee, ni ikui ilee Benjaminn aanibol aasaloln—Gideoni aajapɔɔn Abidann—waajab nan ye ŋichur piitaa ni ŋiŋmu, ni ikui inaa Baah nan kpaan ki saa pu na sɔ: ŋichur nkub ni ŋiniin, ni nkub. Efraim aanibol, ni ŋinibol ŋi kpee li pu na, le ga paan taataa.

^25-31 Ŋŋangan wɔb, bi ye Dann aanibol, ni ŋinibol ŋi kpee li pu na aanib bi kpaan ki kpa baatuutaa na, aah ga kal ŋigetek ŋigetek aasalolm chee pu na le paa na: Dann aanibol aasaloln—Amisadai aajapɔɔn Ahieser—waajab nan ye ŋichur imonko itaa ni bilee, ni ikui ilole Aser aanibol aasaloln—Okrann aajapɔɔn Pagiel—waajab nan ye ŋichur imonko ilee ni libaa, ni ikui iŋmu Naftali aanibol aasaloln—Enann aajapɔɔn Ahira—waajab nan ye ŋichur piiŋmu ni ŋitaa, ni ikui inaa Baah nan kpaan ki saa pu na sɔ: ŋichur nkub ni piiŋmu ni ŋilole, ni ikui iloob. Dann aanibol, ni ŋinibol ŋi kpee li pu na, le ga gbeln kookoo.

³² Israel yaab aah nan yakr ŋigetek ŋigetek, aan bi ŋmee baayimbil bi ti kpaan ki saa pu na, nan ye ŋichur ikui iloob ni ŋitaa, ni ikui iŋmu ni piiŋmu la.

³³ Baa nan ŋmee Liifai yaab aayimbil kpaan Israel yaab biken chee, ke Uwumbɔr aah nan bui Moses ke u ŋa pu na.

³⁴ Nima pu na, Israel yaab nan ŋa ni mɔmɔk ke Uwumbɔr aah nan bui Moses ke bi ŋa pu na la. Bi mɔmɔk nan kal baatuutaa aataab, le bi mɔmɔk chuun paa paa tɔb pu, itaŋaal itaŋaal.