Nkahm 19 - Uwumbɔr aagbaŋ

Unaa maman aafatan aabɔr

¹ Uwumbɔr nan bui Moses ni Aaronn

² ke bi di nkaal mumina mɔk Israel yaab. Bi li joo ni unaa u man, kaa kpa iween, ki ŋan, aan baa kee di u tun lituln libaa na.

³ Bi di u ŋa Eleasar u ye utotoor na aaŋaal ni. Bi di u nya n‑gbaan nibaa chee ki ti kɔr u, Eleasar aanimbiin ni.

⁴ Le Eleasar ga di uŋanbik bɔ waasin ngbaan ni, ki di yɔk lii Maabool taab nfum mulole.

⁵ Bi di unaamɔn ngbaan: waagban, ni tinann, ni nsin, ni tineer na, ki di u see mmii, utotoor aanimbiin ni.

⁶ Le u ga di santina aadɔ, ni nkiisuk, ni ŋŋmin maman, mee ŋa mmii ngbaan ni.

⁷ Nee aapuwɔb na, u finn waawanpeenkaan ki fu nnyun, nima kan, u ga ŋmaa gir kun linampal; u mu beenin ye ujɔŋdaan la, see kijook wɔb le u ga nan ŋa chain.

⁸ Le uja u see unaa ngbaan mmii ni na, mu ga finn waawanpeenkaan, ki fu nnyun, u mu beenin ye ujɔŋdaan la, see kijook wɔb le u ga nan ŋa chain.

⁹ Unii u ye chain na le ga faa unaa ngbaan aafatan ki di mu bil lipaal, nin chee ŋan na, nima chee le mu ga li dɔ, le Israel aanii ubaa yaa kpaln tijɔŋdaan kan, bi ga lee nfatan ngbaan ŋa nnyun ni, le udaan fu mu, aan ki ŋa chain. Bi yaa ŋa kina kan, bi ga nya baatunwanbir ni.

¹⁰ Uja u faa nfatan ngbaan na mu finn waawanpeenkaan, u mu beenin ye ujɔŋdaan la, see kijook wɔb le u ga nan ŋa chain. Nkaal ngbaan bi kina le ki cha n‑yoonn mɔmɔk. Mu ye nkaal ki tii Israel yaab, ni biwɔwɔm bimɔk koo bi chee na la.

Unii u meeh linikpol na

¹¹ Unii umɔk meeh linikpol na kan, u kpaln tijɔŋdaan le ki ti saa iwiin ilole.

¹² See u fu nnyun mu ga cha u li bi chain na, wintaa daal, ni winlole daal, le ki nin ŋa chain. U yaa kaa fu kina aanyun wintaa ni winlole daal ki ŋa ubaa chain kan, waan li bi chain.

¹³ Unii umɔk meeh linikpol, kaa fu kina aanyun ki ŋa ubaa chain na kan, u gaar tijɔŋ ngbaan ni la, ba pu? waa fu kina aanyun. U bii Uwumbɔr Aabool le na, le waa ki waan ki li ye Uwumbɔr aanib ponn ni ubaa.

¹⁴ Nibaakan unii ubaa yaa bi waadiik ponn ni, uken kpo leŋ u pu, bee linikpol ngbaan yaa dɔ ki ponn ni, le uken koo li chee kan, u mu kpaln tijɔŋdaan iwiin ilole le na.

¹⁵ Nkin, ni libuul ni mu bi kidiik ngbaan ni, kaa kpa ŋibii na mu kpaln tijɔŋ aawan le na.

¹⁶ Nibaakan bi yaa ku unii, bee u kpo ubaa pu lipaal, aan uken yaa meeh u, bee unii ubaa yaa meeh unibɔn aakpab, bee likaakul kan, u kpaln tijɔŋdaan iwiin ilole le na.

¹⁷ Naah ga ŋa pu ki nya tijɔŋ ngbaan ni na le ye ke ni ban unaa maman u bi nan di u see mmii ni na aafatan mu nyani titunwanbir na ŋa libuul ni, aan ki ban nnyunpɔm ŋa li ponn ni.

¹⁸ Unii u bi chain na yoor nkiisuk bɔ nnyun ngbaan ni, ki di yɔk yɔk kidiik ngbaan pu, ni tiwan nimɔk bi ki ponn ni na, ni binib bi nan bi ki ponn ni na pu. Unii u bi chain na mu di nnyun ngbaan yɔk yɔk uja u meeh unibɔn aakpab, bee linikpol, bee u meeh likaakul na pu.

¹⁹ Wintaa, ni winlole daal kan, unii u bi chain na di nnyun ngbaan yɔk yɔk unii u kaa bi chain na pu. Winlole daal kan, u toor nyan uja ngbaan aajɔŋ, ki cha u finn waawanpeenkaan ki fu nnyun, le nwiin yaa lir liyaadaal ngbaan kan, u ŋa chain le na.

²⁰ Unii umɔk kaa bi chain ki mu yii kaa toor ubaa na kan, u gur ye ujɔŋdaan la, ba pu? waa fu nnyun mu ŋani binib chain na. U bii Uwumbɔr Aabool le na, le waan ki li ye Uwumbɔr aanib ponn ni ubaa.

²¹ N‑yoonn mɔmɔk kan, ni li joo nkaal ngbaan. Le unii u di nnyun ngbaan yɔk yɔk ke mu ŋa uken chain na, mu finn waawanpeenkaan; le unii umɔk meeh nnyun ngbaan na, u mu kpaln tijɔŋdaan le ki ti saa kijook wɔb.

²² Unii u kaa ye chain na aah meeh tiwan nimɔk na mu kpaln tijɔŋ aawan la, le umɔk meeh kina aawan na mu aa ki ye chain ki ti saa kijook wɔb.