Nkahm 18 - Uwumbɔr aagbaŋ

Bitotoorb ni Liifai yaab aatuln

¹ Uwumbɔr nan bui Aaronn ke, “Sin, ni aajapɔtiib, ni Liifai yaab, ni li nyi ke taani ubaa yaa dan Maabool aatuln ni kan, nimi le ga kan ntafadaan. Taani yaa dan kitork aatuln ni kan, aa ni aajapɔtiib baanja le ga kan ntafadaan.

² Li joo ni aado yaab, bi ye Liifai yaab aanibol na, aan bi nan ter si, buyoonn aa ni aajapɔtiib ga li bi tun Maabool ni aatuln na.

³ Liifai yaab ga li ter si la, le ki tun Libool na ni aatuln. Tɔ, baa kpa nsan bi meeh tiwan nimɔk bi chain ki bi Chain Aapepel na ponn ni, bee kitork aabimbiln. Bi yaa ŋa kina kan, bi ni si ga kpo.

⁴ Bi ga ter si, le ki tun baatuln aah ye pu na Libool ngbaan ni. Unii u kaa ŋeer ke u tun saatuln na kan, u taa duun ni aa chee.

⁵ Sin, ni aajapɔtiib baanja le ga tun Chain Aapepel wɔb, ni kitork aabimbiln pu aatuln. Nima kan, maaŋuul aan ki fii Israel yaab pu.

⁶ Min le ye u nyan aado yaab Liifai aanibol, Israel yaab ponn ni, ke bi li ye ipiin ki tii nimi na. Min le nyan bi ke bi li ye maanib, nima kan, bi ga ŋmaa tun Maabool ni aatuln.

⁷ Aa ni aajapɔtiib baanja le ga tun lituln li ye kitork ni kaabimbiln yaan na, ni Chain Chain Aapepel wɔb ni aatuln. Ŋitun ŋimina mɔmɔk ye nimi yaan la, ba pu? min le di kitork aatuln tii nimi ipiin. Unii u kaa ŋeer ke u tun lituln ngbaan na yaa dan tiwan ni m ŋa ni chain na chee kan, u ga kpo.”

Tiwan ni ye bitotoorb yaan na

⁸ Uwumbɔr nan ki bui Aaronn ke, “Teer ke m di ipiinkpaan i bi di toor kitork tii mi kaa di see mmii ni na tii si la. M di i tii sin ni aayaabitiib, aan i li ye nimi aawan ki cha n‑yoonn mu kaa kpa ndoon na la.

⁹ Ipiinkpaan i ye miyaan ki bi chain, baan di see mmii ni, kitork aabimbiln pu, ki ye saawan na sɔ: njikaabim aatork, ni titunwanbir aatork, ni lipɔln aapam aatork. Tiwan nimɔk bi di tii mi, ni ye chain aapiin na ye aa ni aajapɔtiib yaan la.

¹⁰ Ni li ji tiwan ngbaan, chain aapepel ni; bijab baanja le ga ŋmaa ji ni. Li nyi ke m ŋa tiwan ngbaan chain la.

¹¹ “Ni ki kpee na, Israel yaab yaa ti ki tii ipiinkpaan ibaa kpee kan, i ye saawan la. M joo i tii sin ni aajapɔtiib, ni aabisatiib, ni li ye nimi yaan ki cha n‑yoonn mɔmɔk. Saamaal ni aanii umɔk bi chain ki ŋeer na ga ŋmaa ji ni.

¹² “M di tiwanyaan ni Israel yaab kan ki nyan baasar ni, ŋibin mɔmɔk ni, aan bi di tii mi na, tii si; tiwan ngbaan sɔ: olif aakpan, ni ŋisubil aadaan, ni njikaabim.

¹³ Nimina mɔmɔk ye sin yaan la. Saamaal ni aanii umɔk bi chain ki ŋeer na ga ŋmaa ji ni.

¹⁴ “Tiwan nimɔk bi Israel aatiŋ ni aan bi di ni tii mi na ye sin yaan la.

¹⁵ “Njan aabo, ni tiwakor aajan aabo bi di tii mi na, mu ye sin yaan la. Tɔ, ni gaa tipar, njan aabim ni tiwakor ti kaa bi chain na pu.

¹⁶ Mbim yaa ti saa uŋmal ubaa kan, ni cha bi pa tikunabr aamombil ŋiŋmu, baah siin pu Maabool ni na.

¹⁷ Tɔ, njan aanaabo, ni upihbo, ni uŋobo ma kan, ni taa cha bi ki gir daa ti; tiwakor ngbaan ye min yaan la, aan bi li joo toor kitork tii mi. Ni di taasin gbaa kitork aabimbiln, aan ki di tiponn ni aakpan see mmii ni, aan ni li ye tijikaar aapiin tii mi; kitork ngbaan nu mɔ m chee.

¹⁸ Tiwakor ngbaan aanann ti gur na ye sin yaan la, ke libingbaal ni ŋŋangii aataajal, ŋi ye ipiinkpaan aatork na, aah ye sin yaan pu na.

¹⁹ “Tootookpaan umɔk Israel yaab di tii mi na le m di tii sin, ni aajapɔtiib, ni aabisatiib, ki cha n‑yoonn mɔmɔk. Maah len pu na ye tipuur ti kaan bii na la.”

²⁰ Uwumbɔr nan ki bui Aaronn ke, “Saa kpa liwangol libaa aayaabitiib ga ji li lifaal, le baan gii Israel yaab aatiŋ nibaa chee tii si. Min Uwumbɔr ŋeer si.”

Tiwan ni ye Liifai yaab yaan na

²¹ Uwumbɔr nan bui ke, “M di tiwan nibaabaa ni Israel yaab nyan kipiik mɔmɔk ni tii mi na, tii Liifai yaab. Baah bi Maabool ponn ni ki tun pu na aapar le na.

²² Israel yaab bi gur na taa ki duun Maabool ke bi nan ŋa nibaa, nima kan, maan daa bitafal ki ku bi.

²³ N‑yoonn mue ki joo cha, Liifai yaab baanja le ga li tun Maabool ponn ni aatuln mɔmɔk, ki yeh li ponn ni aatork mɔmɔk. Nkaal mue si kina le ki tii saamaal mu. Le Liifai yaab mu aan li kpa lifaal libaa Israel yaab aatiŋ ni;

²⁴ ba pu? m di Israel yaab aah nyan tiwan nibaa kipiik kipiik ni tii mi na tii bi, aan ni li ye bi yaan. Kina pu le m bui bi ke baan ki li kpa lifaal libaa Israel yaab aatiŋ ni.”

Liifai yaab aah ga tii Uwumbɔr ipiin i na

²⁵ Uwumbɔr nan bui Moses

²⁶ ke u tuk Liifai yaab ke: “Ni yaa gaa Israel yaab chee baah tii mi ipiin i aan m di i tii nimi na kan, ni mu ki nyan i ponn ni nibaabaa kipiik kipiik ni, i li ye ipiinkpaan ki tii mi Uwumbɔr.

²⁷ Tootookpaan ngbaan ga li bi ke ukpaal aah kon ki kan njikaabim, ni ŋisubil aadapɔm, ki nyan miyaan tii mi pu na la.

²⁸ Kina le Israel yaab aah tii mi ipiin i mɔmɔk aan m di tii nimi na, ni mu nyan i ponn ni tii mi. Ni mu ga di tootookpaan ngbaan tii mi aan Aaronn mu yoor i, waah ye utotoor pu na.

²⁹ Naah kan tiwan nimɔk na, ni nyan tiwan ni ŋan ki bi chain na tii mi Uwumbɔr.

³⁰ Ni yaa di tiwan ni ŋan na tii min Uwumbɔr kan, ni gur na, ni mu li joo, ke ukpaal yaa nyan Uwumbɔr yaan tii u kan, u joo ni gur na pu na.

³¹ Naah bi Maabool ni ki tun maatuln na, aa ni saamaal ga ŋmaa ji ni gur na, naah gee nin chee na; nimi aapar le na.

³² Ni yaa di tiwan ni ŋan na tii min Uwumbɔr kan, ni ga ŋmaa ji ni gur na, kaan li kpa ngalm kina pu. Tɔ, ni li nyi man, Israel yaab yaa joo ni ipiin i ye chain na kan, ni taa lik ke i ye fam, ki ji, kaa pue nyan i ŋan na tii mi Uwumbɔr. Ni yaa ŋa kina kan, ni ga kpo.”