Nkahm 17 - Uwumbɔr aagbaŋ

Aaronn aadabil aabɔr

¹ Uwumbɔr nan ki bui Moses ke,

² “Tuk Israel aanib ke bi ban ŋidabil kipiik ni ŋilee tii ni si, linibol mɔmɔk aayidaan li joo ni libaabaa. Aa ŋmee uyidaan mɔk aayimbil paan waadabil pu,

³ ki ŋmee Aaronn aayimbil, Liifai yaab aanibol aadabil pu. Ŋinibol ngbaan mɔmɔk aayidam ga li kpa lidabil libaabaa la.

⁴ Aa di ŋi buen Maabool ni, ki di ŋi bil Maakaal Aadakaa taab, nin chee m len ni chee tibɔr na.

⁵ Le uyidaan u m nyan na aadabil ga bunn tifasɔnn. Kina le m ga cha Israel yaab taa ki li ŋulni ni pu.”

⁶ Nima na Moses nan tuk Israel yaab, le baayidam mɔmɔk di baadabil tii u, ŋi nan ye kipiik ni ŋilee la, le ŋinibol ngbaan nan kpa libaabaa. Aaronn aadabil mu nan bi ŋi ponn ni.

⁷ Moses nan di ŋidabil ngbaan mɔmɔk ti bil Libool ni, Uwumbɔr Aakaal Aadakaa taab.

⁸ Naah woln kitaak aan Moses buen Libool ni na, le u kan ke Aaronn aadabil li si Liifai yaab aanibol aasisii na bunn tifasɔnn ni nsupuun, ki lun ŋisubil ŋibaa aaboln.

⁹ Moses nan yoor ni ŋidabil ngbaan mɔmɔk, le ki nan di mɔk Israel yaab mɔmɔk. Bi nan kan tiwan ni ŋa na, le biyidam ngbaan mɔmɔk nyan baadabil.

¹⁰ Uwumbɔr nan bui Moses ke, “Di Aaronn aadabil giin ti bil Maakaal Aadakaa taab. Li ga li dɔ nima, ki ye nsurm ki tii Israel yaab bi yii mi na, ke bi yaa kaa di cha baah len tibɔr ti kaa ŋan na kan, bi ga kpo.”

¹¹ Moses nan ŋa Uwumbɔr aah bui u ke u ŋa pu na.

¹² Le Israel yaab mɔmɔk bui Moses ke, “Ni yaa ye kina kan, ti ga kpo doo.

¹³ Ni mɔk ke unii umɔk buen Uwumbɔr Aabool chee na kan, u ga kpo la; ti mɔmɔk ga kpo doo oo?”