Nkahm 16 - Uwumbɔr aagbaŋ

Kora, ni Datann, ni Abiram aah yii Moses pu na.

^1-2 Le Isar aajapɔɔn Kora, u ye Kohaf aataŋaal ni aanii, ki nyan ni Liifai aanibol ponn ni na, nan ŋa kijɔrk aapobil ki yii Moses. Binib bitaa bi nan kpee u pu ki nyan ni Rubenn aanibol ponn ni na sɔ: Eliab aajapɔtiib Datann, ni Abiram, ni Pelef aajapɔɔn u bi yin u ke Onn na. Israel yaab ponn ni binib ikui ilee ni piiŋmu, bi bi nan nyan bi ke bi li ye bisalolm binib ngbaan pu na, mu nan kpee bi pu.

³ Bi nan kuun sil Moses ni Aaronn chee, le ki bui bi ke, “Ni yoor nibaa paacham ki ti chaar jer a. Uwumbɔr le yeh binib ngbaan mɔmɔk, le ki bi ti mɔmɔk ubaabaa chee. Nima pu na, ba ŋa si Moses dak ke aa ŋan jer Uwumbɔr aanib ngbaan mɔmɔk, aan ki yoor aabaa paacham sakpen kina?”

⁴ N‑yoonn mu Moses ŋun kina na, le u gbaan kitiŋ ki mee Uwumbɔr,

⁵ le ki bui Kora, ni binib bi kpee u pu na ke, “Fen aachakpiik ni kan, Uwumbɔr ga fe mɔk ti mɔmɔk unii u ye waanii na; u ga fe cha waah nyan unii u na dan u chee, waatork aabimbiln chee.

^6-7 Fen aachakpiik ni kan, aa ni binib bi kpee aa pu na fe ban mmii aasambil, ki di mmiisakɔl ni tulalee aayon ŋa ŋi ponn ni, aan ki di buen kitork aabimbiln chee. Nima chee le ti ga ti bee unii u ye Uwumbɔr aah lee u na. Nimi Liifai yaab le yoor nibaa paacham sakpen ki ti chaar jer.”

⁸ Moses nan ki len Kora chee ke, “Li pel man, nimi Liifai yaab,

⁹ ni dak ke Israel yaab Aawumbɔr aah nyan nimi binib ngbaan mɔmɔk ni, ke ni li tun tii binib ngbaan mɔmɔk, aan ki ŋmaa sil unimbiin ni, ki tun Waabool ni aatuln mɔmɔk na, naa nyaŋ aa?

¹⁰ Uma le nyuŋ nimi, ni Liifai yaab bi gur na, le dandana wee ni ban ni gaa kitork aatuln mu ki di kpee.

¹¹ Aa ni saanib ngbaan aah bi galni Aaronn buyoonn na, Uwumbɔr le ni bi galni.”

¹² Le Moses yin ni Eliab aajapɔtiib Datann ni Abiram. Le bi bui ke, “Taan dan.

¹³ Saah nyan ni timi Ijipt aatiŋ ki kpa nkpan ni n‑yaan, ke aa nan ku timi lii nteersakpiin mue ni na, naa ŋeer aa? Le aa ki ban ke aa kpaln timi aabɔr aa?

¹⁴ Mbamɔn, saa di timi dan kitiŋ ki kpa nkpaatanyaan na ponn ni, ki mu aa tii timi tikpaasar ni ŋisubil aasui, le aa pɔɔni aabaa ke aa ŋmann timi. Taan dan.”

¹⁵ Moses nan gee liŋuul sakpen, le ki bui Uwumbɔr ke, “Binib bee yaa joo ni baapiin kan, taa gaa i. Maa ŋa bi taani ubaa, ki mu aa gaa baabon ubaa.”

¹⁶ Moses nan bui Kora ke, “Ni yaa fe woln kichakpiik ni kan, aa ni binib ikui ilee ni piiŋmu bi kpee aa pu na dan Uwumbɔr aanimbiin ni, Waabool aabisamɔb chee; Aaronn mu ga li bi nima.

¹⁷ Ni mɔmɔk ubaabaa ga di waasambil li bi joo moi mmii na, ki di mmiisakɔl ni tulalee aayon ŋa ŋi ponn ni, ki di buen kitork aabimbiln chee.”

¹⁸ Kina pu na, bi mɔmɔk nan ban baasambil, le ki di mmiisakɔl ni tulalee aayon ŋa ŋi ponn ni, ki sil gbaŋ Moses ni Aaronn, Uwumbɔr Aabool aabisamɔb chee.

¹⁹ Le Kora kuun ni Israel yaab mɔmɔk, ki nan sil toŋ Moses ni Aaronn, Libool ngbaan aabisamɔb chee. Libuul ngbaan ni, le Uwumbɔr aawiihn mu moor lak lak na woln binib ngbaan mɔmɔk pu.

²⁰ Le Uwumbɔr bui Moses ni Aaronn ke,

²¹ “Ni foor binib ngbaan chee aan ki cha m ku bi mɔmɔk libuul lee ni.”

²² Le Moses ni Aaronn tar lir kitiŋ bipuu pu, ki gaŋni, ki bui ke, “Uwumbɔr, sin le ye umɔfadaan. N‑yoonn mu unibaan ti tun titunwanbir na kan, aa geer binib ngbaan mɔmɔk pu liŋuul la aa?”

²³ Le Uwumbɔr bui Moses ke,

²⁴ “Bui binib ngbaan mɔmɔk ke bi siir foor Kora, ni Datann, ni Abiram aadichal chee.”

²⁵ Le Moses ni Israel yaab aayidam dii buen Datann ni Abiram chee.

²⁶ Le u bui binib bi si nima chee na ke, “Siir foor bibiindam bimina chee, ki taa meeh tiwan nimɔk ye bi yaan na nibaa. Ni yaa kaa ye kina kan, ni ga kpaan kpo bi chee, baatunwanbir pu.”

²⁷ Nima pu na, bi mɔmɔk nan siir foor Kora, ni Datann, ni Abiram aadichal chee. Le Datann, ni Abiram, ni bipuutiib, ni baabim nyan ni ki nan sil baadichal aabisamɔi chee.

²⁸ Le Moses bui Israel yaab ngbaan ke, “Nimina pu le ni ga bee ke Uwumbɔr le tun ni mi ke m li tun waatuln mɔmɔk, naa ye min le lee mbaa ki ŋani ŋi mbaa pu.

²⁹ Bijab bee yaa kpo bibaa aakun, kaa ye ke Uwumbɔr le daa bitafal kan, kina kan, Uwumbɔr aa tun ni mi.

³⁰ Tɔ, Uwumbɔr yaa ŋa lijinjiir aawan, aan ki cha kitiŋ piir ki nab bi, ni baawan, aan bi mɔmɔk buen kitekpiitiŋ ki ye binifuub kan, ni ga sil bee ke bi yii Uwumbɔr la.”

³¹ N‑yoonn mu u ti len tibɔr door na, le Datann ni Abiram aah si nin chee na chuu piir,

³² le bi ni baamaal, ki kpee Kora ni binib bi dii u na, ni baawan mɔmɔk lir ni ponn ni.

³³ Kina pu na, bi nan fu, le bi ni baawan mɔmɔk lir libuul ngbaan ni, ki buen kitekpiitiŋ ni. Le kitiŋ ki gir biin bi pu, le bi wɔŋ.

³⁴ Israel yaab ngbaan mɔmɔk aah kan ki ŋun baah kaani pu na, le bi san nima chee. Bi nan tar ke, “Li san man. Nibaakan kitiŋ ga di ti mu nab.”

³⁵ Le Uwumbɔr nan cha mmii nyan ni, ki nan wun bijab ikui ilee ni piiŋmu bi nan joo ni tulalee aayon waabimbiln chee na.

Mmii aasambil

³⁶ Uwumbɔr nan bui Moses ke,

³⁷ “Bui Aaronn aajapɔɔn Eleasar, u ye utotoor na, ke u chuu nyan mmii aasambil ŋi bi ŋinikpol ngbaan aaŋaal ni na, ki di ŋimiisakɔn mu bi ŋisambil ngbaan ponn ni na di yaa nibaa chee; ba pu? Uwumbɔr ŋa ŋisambil ngbaan chain la.

³⁸ Baah nan di ŋi tii Uwumbɔr buyoonn na, le u ŋa ŋi chain. Kina pu na, chuu nyan ŋisambil ngbaan bijab bi kpo baatunwanbir pu na aaŋaal ni, ki di ŋi mɔɔ tiwan biin kitork aabimbiln pu. Tiwan ngbaan le ga li ye limɔkl ki tii Israel yaab mɔmɔk.”

³⁹ Nima pu na, Eleasar u ye utotoor na, nan nyan ŋisambil ngbaan mɔmɔk, le ki cha bi di ŋi mɔɔ tiwan ni kaa gbei na biin kitork aabimbiln pu.

⁴⁰ Uwumbɔr nan cha ni ye nsurm, le ki mɔk Israel yaab mɔmɔk ke unii yaa kaa nyan ni Aaronn aamaal ni kan, u taa dan kitork aabimbiln chee u nan see tulalee aayon tii u. Unii yaa ŋa kina kan, u ga kpo ke Kora ni waajab aah nan kpo pu na. Eleasar nan ŋa tiwan ngbaan mɔmɔk, Uwumbɔr aah nan bui Moses ke u cha bi ŋa ni pu na la.

Aaronn aah nan gaa Israel yaab lii pu na

⁴¹ Naah woln kitaak na, le binib mɔmɔk di dab Moses ni Aaronn le ki bui ke, “Nimi le ku Uwumbɔr aanib ngbaan ngem.”

⁴² Buyoonn aan bi mɔmɔk kuun ni ke bi nan yaar yii Moses ni Aaronn pu na, bi fenn lik Uwumbɔr Aabool, le ki kan ntaalangbam bi biini li pu, le Uwumbɔr aawiihn mu moor lak lak ki deer ŋinimbil na nyan mpaan pu.

⁴³ Le Moses ni Aaronn buen ti sil Libool ngbaan aabisamɔb chee.

⁴⁴ Le Uwumbɔr bui Moses ke,

⁴⁵ “Foor cha binib ngbaan ki sil nibaa man, aan m kpaan ku bi mɔmɔk libuul ni.” Le bi mɔmɔk bilee tar lir bipuu pu.

⁴⁶ Le Moses bui Aaronn ke, “Yoor saamii aasambil, ki ban ŋimiisakɔn kitork aabimbiln pu ŋa li ponn ni, aan ki di tulalee aayon paan mu pu. Ŋa mala mala, ki di mu san buen binib ngbaan chee ki ti toor bi, bi ŋa chain. Ŋa mala mala. Uwumbɔr aaŋuul fii a, le bi piin ki kpoi.”

⁴⁷ Le Aaronn ŋa Moses aah bui ke u ŋa pu na, ki yoor waamii aasambil, le ki san buen binib ngbaan aakaasisik ni. N‑yoonn mu u kan ke iween lir bi pu na, le u di tulalee aayon paan mmii ngbaan pu, le ki ŋa bi chain.

⁴⁸ Ni nan cha iween ngbaan doo, le u gaar si ŋinikpol ni binib bi fu na aakaasisik ni.

⁴⁹ Binib bi nan kpo na nan saa ŋichur kipiik ni ŋinaa, ni ikui ilole. Kora ni binib bi nan kpaan kpo buyoonn u nan galn Moses na aa bi bi ponn ni.

⁵⁰ N‑yoonn mu binib ngbaan aa ki kpoi na, le Aaronn gir buen Moses chee Uwumbɔr Aabool taab.