Nkahm 15 - Uwumbɔr aagbaŋ

Kitork aakaal

¹ Uwumbɔr nan bui Moses ke, “Di tibɔr timina tuk maanib Israel yaab.

² Maah ban m di kitiŋ kee tii nimi na, ikaal imina le ni ga li dii.

³ Ni yaa ban ni toor kitork ki bi joo seer mmii ni na kan, ni ga ŋmaa di unaaja, bee upihja, bee upihsal, bee uŋoob ŋa kina tii mi. Ni yaa ban ni ŋa naah puu pu na, bee ni yaa ban ni tii mi nibaa aageehn aapiin buyoonn ni ban ni ji njim mu na kan, ni ŋa kina; tijikaar aatork ngbaan nu mɔ, min Uwumbɔr chee.

^4-5 Unii umɔk ban u di upiih, bee uŋoob, ŋa mmii aatork tii min Uwumbɔr na kan, u li joo ni n‑yon kuruwaa ubaa, ki di olif aakpan kpalba ubaa buun mu, ki di kpee kiwakork mɔk, ki kpee ŋisubil aadaan kpalba ubaa, aan ni mu le ye njikaabim aapiin.

⁶ Bi yaa ban bi di upihja le toor kitork kan, bi li joo ni n‑yon kuruwaa bilee, ki di olif aakpan kpalba ni ligeln buun mu,

⁷ ki kpee ŋisubil aadaan kpalba ubaa ni ligeln, ni mu li ye njikaabim aapiin. Kitork ngbaan nu mɔ, min Uwumbɔr chee.

⁸ N‑yoonn mu ni ti joo unaaja ke ni toor kitork tii min Uwumbɔr na kan, ni yaa ye mmii ni aatork, bee ni yaa ban ni giin tipuur, bee ni yaa ye kimɔbaan aatork kan,

⁹ ni li joo ni njikaabim aapiin mu, n‑yon kuruwaa bitaa, ki di olif aakpan kpalba bilee ki di buun mu,

¹⁰ ki kpee ŋisubil aadaan kpalba bilee. Kitork ngbaan nu mɔ, min Uwumbɔr chee.

¹¹ “Njikaabim aapiin kina le bi ga di kpaan unaaja, bee upihja, bee upihsal, bee uŋoob mɔmɔk pu, ki li joo ni.

¹² N‑yoonn mu bi ti joo ni tiwakor ti jer kibaa na kan, bi kpee njikaabim aapiin ngbaan mu, aan ni li ŋak.

¹³ Israel aanii umɔk ti ban u tii njikaabim aapiin na kan, udaan ŋa kina, kitork ngbaan nu mɔ, min Uwumbɔr chee.

¹⁴ Uwɔwɔnii umɔk bi ni chee, ki ga yunn, bee waan yunn, ki yaa ban u toor kina aatork kan, u mu ŋa kina. Kitork ngbaan nu mɔ, min Uwumbɔr chee.

¹⁵ N‑yoonn mɔmɔk kan, ni ni biwɔwɔm mɔmɔk li ŋani kina. Ni ni biwɔwɔm ngbaan mɔmɔk ye tiwanbaan le Uwumbɔr chee.

¹⁶ Ikaal ngbaan ye tiwanbaan, ni mɔmɔk chee la.”

^17-18 Uwumbɔr nan ki di ikaal i paa na, le ki di bui Moses, ke u di mɔk Israel yaab, aan bi yaa ti koo kitiŋ ki u ban u di tii bi na ni kan, bi li ŋani waah ban pu na.

¹⁹ N‑yoonn mu nimi aajikaar ti biir, aan ni ŋeer ke ni ji ti na kan, ni pue ban njan yaar ti biir na di tii Uwumbɔr, ni ye ipiinkpaan le u chee.

²⁰ Ni yaa ken maab kan, ni di njan aamaab u ni di njikaabipɔm aayon ŋa u na, di tii Uwumbɔr, ni ye ipiinkpaan le u chee. Naah poi njikaabipɔm ki tii Uwumbɔr ipiin pu na, ni li tii njan aamaab mu kina.

²¹ N‑yoonn mumɔk paa ni na, ni li tii Uwumbɔr njan aamaab u ni ken na kina cha.

²² Tɔ, ubaa yaa kaa nyi le ki yenn Uwumbɔr aah mɔk Moses ke ni ŋa pu na,

²³ bee ni mɔmɔk mu yaa ti ki yenn nimɔk Uwumbɔr mɔk Moses ke u di tuk nimi na kan,

²⁴ taani ngbaan yaa nan dan binib ngbaan aamaanyi pu le kan, bi di unaaja toor kitork, ki di u see mmii ni, ki kpee njikaabim ni ŋisubil aadaan aatork ki ŋeer na. Kitork ngbaan nu mɔ Uwumbɔr chee. Ni ki kpee na, bi di uŋoja toor titunwanbir aatork.

²⁵ Utotoor le ga ŋa kina aatork ki ŋa binib ngbaan mɔmɔk chain, le bi ga kan chapinn, ba pu? baa nyi le ki tun taani ngbaan, le ki mu joo ni titunwanbir aatork aapiin ke ni ye tijikaar aapiin le nan tii Uwumbɔr.

²⁶ Le Uwumbɔr ga di cha pinn Israel yaab mɔmɔk, ni biwɔwɔm bi koo bi chee na mu, ba pu? bi mɔmɔk kpaan le ki tun taani ngbaan.

²⁷ Nibaakan, unibaan yaa kaa nyi ki tun titunwanbir kina kan, u di libiln libaa aaŋosal toor titunwanbir aatork.

²⁸ Kitork aabimbiln pu, le utotoor ga ŋa kina aatork ki nyan unii ngbaan waatunwanbir ni ki ŋa u chain, le u kan chapinn.

²⁹ Unii umɔk kaa nyi ki tun titunwanbir na kan, u ga ŋa kina la. U yaa ye Israel aatimbo, bee uwɔwɔnii kan, bi mɔmɔk ga ŋa kina la.

³⁰ Tɔ, u yaa nyi le ki tun titunwanbir, ki ye utinbo, bee uwɔwɔnii kan, usui aah kaa lik faar Uwumbɔr pu na, ni ku u;

³¹ ba pu? u yii Uwumbɔr aamɔb, le ki bii waakaal. Unii ngbaan aan ki li bi waanib ponn ni. Uma le ban ubaa aakun.

Uja u koor Likpaakool daal aakoobil na

³² N‑yoonn mu Israel yaab nan beenin bi nteersakpiin ni na, le bi nan kan uja ubaa bi peei idɔ Likpaakool daal.

³³ Le bi di u buen Moses, ni Aaronn, ni binib ngbaan mɔmɔk chee.

³⁴ Le bi di u ŋa kidiik ni ki kii u, ba pu? baa nan nyi baah ga ŋa u pu na.

³⁵ Uwumbɔr nan bui Moses ke, “Ni ku uja ngbaan, ni nyan u buen n‑gbaan nibaa chee, aan binib ngbaan mɔmɔk mae u ŋitakpal ki ku u.”

³⁶ Nima pu na, Uwumbɔr aah nan mɔk ke bi ŋa pu na, le bi nan nyan u n‑gbaan, ki ti mae ŋitakpal ku u.

Tikokonn aagbeen aakaal

³⁷ Uwumbɔr nan ki tuk Moses

³⁸ ke u bui Israel aanib ke: “Ni ŋa tikokonn aagbeen nimi aabɔkul aamɔju mɔmɔk pu, aan ki di tikokonn bɔmbɔln ŋa ngbeen ngbaan mɔmɔk pu.

³⁹ Le ni yaa lik ngbeen ngbaan kan, ni ga teer nimi maakaal mɔmɔk aabɔr, le ni kii tii mi. Nima kan, naan fenn nipuwɔb ki tun nibaa aasui aageehn.

⁴⁰ Ngbeen ngbaan le ga teer nimi, ni li joo maakaal mɔmɔk, ki li ye maanib kookoo.

⁴¹ Min le ye Nidindaan Uwumbɔr. Min le nyan ni nimi Ijipt aatiŋ ni ke m li ye nimi Aawumbɔr. Min le ye Uwumbɔr.”