Nkahm 14 - Uwumbɔr aagbaŋ

Israel yaab aah nan len tibɔr ti kaa ŋan na pu na

¹ Kinyeek wɔb ki ti woln kitaak, binib ngbaan nan wii ki ŋulni.

² Bi nan len Moses ni Aaronn tibɔr ti kaa ŋan na ki bui ke, “Ti yaa ba kpo Ijipt aatiŋ ni, bee nteersakpiin ni do kan, ni ba soor.

³ Ba ŋa Uwumbɔr joo timi cha kitiŋ ngbaan ni? Bi ga ku timi butɔb ni, ki chur tipuutiib ni timi aabim tinaagbiir. Ti yaa ba gir buen Ijipt aatiŋ ni kan, naa ba soor aa?”

⁴ Nima pu na, bi nan bui tɔb ke, “Cha ti nyan usaloln aan u giin timi buen Ijipt aatiŋ ni.”

⁵ Le Moses ni Aaronn lir gbaan Israel yaab aanib mɔmɔk aanimbiin ni.

⁶ Le Nunn aajapɔɔn Josua, ni Jefune aajapɔɔn Kaleb, bima bilee ngbaan mu nan dii bipepekb ngbaan buen, le bisui nan bii, le bi chuu baawanpeenkaan daa kar.

⁷ Bi nan bui binib ngbaan ke, “Taah nan mann lik kitiŋ ngbaan mɔmɔk na, ki nan ŋan sakpen a.

⁸ Ti yaa piir Uwumbɔr aasui kan, u ga di timi koo kitiŋ ngbaan ni, ki tii timi kaawangol, ni kaakpaatan mu nyuun na.

⁹ Taa yii Uwumbɔr man, ki mu taa san binib bi koo nima chee na ijawaan. Ti ga ŋmaa nyaŋ bi, naan li pɔɔ. Uwumbɔr bi ti chee, le ki nyaŋ baawaa ŋi kii bi na; nima pu na, taa san ijawaan man.”

¹⁰ Le Israel yaab mɔmɔk nan bui ke bi ga mae ŋitakpal ki ku bi. Libuul ngbaan ni, le bi kan Uwumbɔr aawiihn mu moor lak lak, ki deer ŋinimbil na, Waabool aapaacham.

Moses aah nan mee Uwumbɔr ke u di cha pinn Israel yaab pu na

¹¹ Uwumbɔr nan baa Moses ke, “Bayoonn aan binib bee ga di cha kaan ki yii mi? Maah ŋa lijinjiir aawan bikaasisik ni pu na, bayoonn aan bi ga di cha ki tii mi naadii?

¹² M ga cha iween i bir sakpen na dan nan lir bi pu, ki kuln bi, ki tee cha sin Moses ma maa pam ki ŋa litimbokpaan, ki li kpa mpɔɔn sakpen ki jer bi.”

¹³ Le Moses bui Uwumbɔr ke, “Sin Uwumbɔr le nan di saapɔɔn nyan ni binib bee Ijipt aatiŋ ni. Ijipt yaab yaa ki ŋun ke aa ŋa saanib kina kan,

¹⁴ bi ga tuk binib bi bi kitiŋ ngbaan pu na. Binib ngbaan ŋun saah bi ti chee pu na, ki kpiir saanaŋ mɔk timi ntaalangbam mu bii ti pu na ni, le nwiin pu kan, aa bi ntaalangbam ni le ki loln ti pu nsan, le kinyeek kan, ntaalangbam ngbaan ye mmii ki wiin ti pu.

¹⁵ Aa yaa ku saanib bee mɔmɔk kan, ŋinibol aanib bi ŋun saah kpa liyimbil pu na ga len

¹⁶ ke saah kaan ŋmaa joo saanib ngbaan fuu kitiŋ ki aa nan puu ke aa ga di bi buen ki ponn ni na le cha aa ku bi lii nteersakpiin ni.

¹⁷ Kina na, Ndindaan, m mee si ke aa mɔk timi saapɔɔn, aan ki ŋa saah nan bui ke,

¹⁸ ‘Min le ye Uwumbɔr, maaŋuul aa fii yɔl yɔl, le m mɔk maah kpa ngeehm sakpen pu, ki ŋani maah puu ke m ga ŋa pu na, le ki cha pinni titunwanbir, ni binib bi yii maamɔb na. Mbamɔn, maan di cha ke maan daa tetiib aabim, ni biyaabitiib, ni biyaabisɔsɔk aatafal, ki ti saa nfum munaa pu, bitetiib aatunwanbir pu.’

¹⁹ Tɔ, Uwumbɔr, m mee si la, saah kpa ngeehm sakpen pu na, cha pinn binib bee aatunwanbir, ke saah ti cha pinni bi baatunwanbir, n‑yoonn mu aa nyan ni bi Ijipt aatiŋ ni ki nan saa din na.”

²⁰ Le Uwumbɔr bui u ke, “Saah mee mi pu na, m ga di cha pinn bi.

²¹ M mu puu ke maah ga li bi aan ki li kpa kipak dulnyaa wee ni ki cha na,

²² binib bee ubaa kina aan li bi ki koo kitiŋ ngbaan ni. Bi kan maawiihn mu moor lak lak na, ni lijinjiir aawan nimɔk m ŋa ni Ijipt aatiŋ ni, ni nteersakpiin ni na, le ki tɔŋni mi, ki ki gir tɔŋni mi kina, ki yii mi.

²³ Maah puu ke m ga di kitiŋ ki tii biyaajatiib na, baan koo ki ni kpala. Binib bimɔk yii mi na aan koo ki ni.

²⁴ Tɔ, maatutunn Kaleb aabimbin bi mubaa; u si nchaŋ ni mbamɔm. Uma le ga koo kitiŋ ki u nan buen ti pekr ki mann ki mɔmɔk na ni,

²⁵ le waamaal ga li joo kitiŋ ki aafataŋ ni Amalek yaab, ni Kanaann yaab koo dandana wee na. Fen kan, ni fe fenn nipuwɔb ki kpaa nteersakpiin ni, ki toŋ Limɔɔkal Aanyusakpem wɔb.”

Uwumbɔr aah nan daa bitafal pu na

²⁶ Uwumbɔr nan ki bui Moses ni Aaronn ke,

²⁷ “Bayoonn aan mbiindam bee ga di cha kaan ki ŋul m pu? Maah ŋun bi len tibɔr ti kaa ŋan m pu pu na, ni ti nyaŋ a.

²⁸ Giin bui bi ke: ‘M puu ke maah ga li bi cha pu na, naah len pu m ŋun na, m ga ŋa nimi kina, min Uwumbɔr le len kina.

²⁹ Ni ga kpo doo ki bee nteersakpiin mue ni, ba pu? nimi bi ye ŋibin moninko ki jer na aah ŋulni m pu pu na, ni ponn ni ubaa kina aan koo kitiŋ ngbaan ni.

³⁰ M nan puu ke m ga di kitiŋ ngbaan tii nimi, tɔ, ni ponn ni ubaa aan koo ki ponn ni, see Kaleb ni Josua.

³¹ Ni bui ke bi ga chur nimi aabim tinaagbiir; nima le m ga cha bi koo kitiŋ ki ni yii ki na ni, le ki ga li ye baatiŋ, le bi ji kaamɔɔn.

³² Nimi ma kan, nteersakpiin mue ponn ni le ni ga kpoi doo.

³³ Le nimi aabim ga li chuun yenni nteersakpiin mue ni, ki ti saa ŋibin imonko ilee, le naah nyan mpuwɔb pu na, bi ga ji kina aafalaa, aan ni mɔmɔk ti kpo doo.

³⁴ Ni ga ji nimi aatunwanbir aafalaa ki ti saa ŋibin imonko ilee. Libiln libaa ga sil iwiin imonko ilee i ni nan di chuun mann goln kitiŋ ngbaan na mbaabaa. Nima le ga cha ni bee ke m gee liŋuul ni pu.

³⁵ Nimi mbiindam aanib bi kuun ki fii sil m pu na, m puu ke m ga ŋa nimi maah len pu na. Min Uwumbɔr, min le len ke ni mɔmɔk ga kpo doo nteersakpiin mue ni.’”

^36-37 Bijab bi Moses nan tun bi ke bi ti pekr kitiŋ ngbaan na ma kan, baah len inyamɔn aabɔr, ki cha Israel yaab ŋulni Uwumbɔr pu pu na, le Uwumbɔr nan cha iween lir bi pu, le bi kpo.

³⁸ Bipepekb kipiik ni bilee ngbaan ni, Josua ni Kaleb baanja le nan ŋmar.

Baah nan ban bi jenn gaa kitiŋ ngbaan njan pu na

³⁹ N‑yoonn mu Moses tuk Israel yaab Uwumbɔr aah len pu na, bisui nan bii pam, le bi wii ikpowiil.

⁴⁰ Bi nan pue fii kichakpinaanyeek ni, ki piin ke bi buen ti jenn gaa ŋigongon aatiŋ, ki len ke, “Dandana wee ma kan, ti gor ti buen nin chee Uwumbɔr bui ke ti li cha na. Ti kii ke ti tun titunwanbir.”

⁴¹ Le Moses bui bi ke, “Kina kan, ba ŋa ni ki yii Uwumbɔr aamɔb dandana wee? Naan ŋmaa nyaŋ bi.

⁴² Taa buen man. Uwumbɔr aa bi ni chee, kina pu na, nimi aadim ga jenn nimi.

⁴³ Ni yaa buen, ni ti to Amalek yaab ni Kanaann yaab butɔb kan, bi ga ku nimi butɔb ni. Uwumbɔr aan li bi ni chee; ba pu? ni yii ke naan dii u.”

⁴⁴ Uwumbɔr Aakaal Aadakaa, ni Moses aa nan dii bi buen, bisui aageehn ni le bi nan fii buen ŋigongon aatim ngbaan ni.

⁴⁵ Nima chee le Amalek yaab ni Kanaann yaab bi koo nima na fii lir bi pu ki nyaŋ bi, le ki san dii bi kina ti nyan Homa aatiŋ ni.