Nkahm 13 - Uwumbɔr aagbaŋ

Baah nan pekr Kanaann aatiŋ pu na

¹ Uwumbɔr nan bui Moses ke,

² “Nyan ŋinibol kipiik ni ŋilee ngbaan mɔmɔk aasalolm ni unii ubaabaa, ki tun bi, aan bi ti pekr Kanaann aatiŋ ki m ban m di tii nimi Israel yaab na, ki mann lik ki mɔmɔk.”

^3-15 Le Moses nan kii kina ki nyan bisalolm ngbaan, Parann Aateersakpiin ni, ki tun bi. Baah nan nyan bi na sɔ: Linibol Usaloln Rubenn Sakur aajapɔɔn Samua Simeonn Hori aajapɔɔn Safat Juda Jefune aajapɔɔn Kaleb Isakar Josef aajapɔɔn Igal Efraim Nunn aajapɔɔn Hosea Benjaminn Rafu aajapɔɔn Palti Sebulunn Sodi aajapɔɔn Gadiel Manase Susi aajapɔɔn Gadi Dann Gemali aajapɔɔn Amiel Aser Maikel aajapɔɔn Setur Naftali Fofsi aajapɔɔn Nabi Gad Maki aajapɔɔn Gewel

Linibol Usaloln

¹⁶ Bisalolm ngbaan le Moses nan tun ke bi ti pekr kitiŋ ngbaan. U nan kpeln Nunn aajapɔɔn Hosea aayimbil ki yin u ke Josua.

¹⁷ N‑yoonn mu Moses nan tun bi ke bi ti pekr Kanaann aatiŋ ki mann ni mɔmɔk na, u nan bui bi ke, “Piin ŋŋangan wɔb do man ki ti nya Kanaann aatiŋ aaŋangii wɔb aapepel, ki nyan nima ki buen ŋigongon aatiŋ ni.

¹⁸ Ni lik ke kitiŋ ngbaan bi kinye, ki lik ke binib biŋa bi ki ponn ni, ki lik ke bi kpa mpɔɔn kinye.

¹⁹ Ni lik ke kitiŋ ngbaan ŋan aan kaa ŋan, ki lik ke bi maa ŋigon mann goln baatim aan baa maa.

²⁰ Ni lik ke tikpaatan nyuun aan taa nyuun, isui mu bi aan yaa bi. Ni pɔɔn nibaa ki li joo ni nima chee aasubil ki nan mɔk mi.” Ni nan ye buyoonn ndaan aasubil bi puir na la.

²¹ Nima pu na, bijab ngbaan nan siir buen, ki dii ŋŋangan wɔb, ki mann kitiŋ ngbaan, ki ti nyan Sinn Aateersakpiin ni, ŋŋangii wɔb, ki di kina ti nyan Rehob aatiŋ pu, baah puur nkpen mu bi ŋijoo aakaasisik ni na, Hamaf aatiŋ chee, ŋŋangan wɔb.

²² Njan bi nan pue buen Kanaann aatiŋ aaŋangii wɔb na la, le ki ti nyan Hebronn aatiŋ, nin chee Ahimann yaab, ni Sesai yaab, ni Talmai yaab aataŋaal pu aanib ka na, bi nan ye ŋiniwɔk ŋi bi yin ŋi ke Anak yaab na aayaabitiib la. Hebronn aatiŋ nan bi le ŋibin ŋilole aapuwɔb na Soann aatiŋ ki bi Ijipt ni na mu nin ŋa kitiŋ.

²³ Bi nan di kina ti nyan Eskol aafataŋ ni, nima chee le bi nan gaa bar ndaan aasubil aabon mu kpa ŋisubil na, mu nan nyuun pam, le binib bilee nan di mu lun ndɔ pu ki tu. Bi nan ki joo ni ŋisubil ŋiken mu, ni ŋikakan aasubil.

²⁴ Bi nan yin kifataŋ ngbaan ke Eskol, ba pu? nima chee le Israel yaab nan gaa bar ndaan aasubil aabon.

²⁵ Baah nan pekr kitiŋ ki ti saa iwiin imonko ilee na,

²⁶ nee aapuwɔb, le bipepekb ngbaan gir ni Moses, ni Aaronn, ni Israel yaab mɔmɔk chee, Kades aatiŋ ki bi Parann Aateersakpiin ni na. Bi nan bui bi baah kan pu na, ki mɔk bi nima chee aasubil ŋi bi nan joo ni na.

²⁷ Bi nan bui Moses ke, “Ti mann kitiŋ ngbaan ni mɔmɔk, ki kan ke ki kpa liwangol pam, le kaakpaatan mu nyuun. Lik, taah joo ni nima chee aasubil ŋi na sɔ.

²⁸ Tɔ, binib bi koo nima chee na kpa mpɔɔn pam, le baatim wiir ki kpa ŋigon mann goln mu mɔmɔk. Ni jer ni mɔmɔk na, ti kan ŋiniwɔk aayaabitiib bi nima chee.

²⁹ Amalek yaab koo kitiŋ ki bi ŋŋangii wɔb na, le Hef yaab ni Jebus yaab, ni Amor yaab mu koo ŋigongon aatim ni, le Kanaann yaab koo gbɔk Kaasisik ni Aanyusakpem ki nɔn Jɔɔdann Aamɔɔl mu.”

³⁰ Kaleb nan bui binib bi nan bi len Moses chee tibɔr ti kaa ŋan na ke bi ŋmin chii, le ki bui bi ke, “Cha ti buen ti tak kitiŋ ngbaan yaab ki gaa ki, ti kpa mpɔɔn ki ŋeer ti nyaŋ bi ki gaa kitiŋ ngbaan.”

³¹ Le binib bi nan dii Kaleb buen na bui ke, “Aayii, taa kpa mpɔɔn ki ŋeer ti tak bi; binib bi koo nima na kpa mpɔɔn jer timi.”

³² Nima pu na, bi nan di inyamɔn aabɔr yaa gaa Israel yaab chee, baah buen kitiŋ ngbaan ni ki ti kan pu na. Bi nan ki bui ke, “Kitiŋ ngbaan ni aakpaatan aa nyuun, le binib ngbaan aa kpa tijikaar bi ji bab. Taah kan binib bi mɔmɔk koo nima na fɔk sakpen a.

³³ Ti kan Anak aaniwɔk na aayaabitiib mu nima chee, ke ti yaa si bi chee kan, ti naahn inaakan la. Bi yaa lik timi kan, ti ga li bi kina le bi chee.”