Nkahm 12 - Uwumbɔr aagbaŋ

Miriam aah nan kan ntafadaan pu na

¹ Moses nan joo Kus yaab aapiibo ubaa la, le Miriam ni Aaronn nan galn u kina pu.

² Bi nan bui ke, “Uwumbɔr cha Moses baanja le nabr waabɔr aa? Waa cha ti mu nabr waabɔr aa?” Uwumbɔr nan ŋun baah len pu na.

³ Moses nan ye unii u sunn ubaa taab na la, u nan sunn ubaa taab ki jer unii mɔmɔk dulnyaa wee ni.

⁴ Libuul ngbaan ni le Uwumbɔr bui Moses ni Aaronn ni Miriam ke, “M ban nimi bitaa bee nyan ni ki dan Maabool chee.” Bi nan buen,

⁵ le Uwumbɔr sunn ni ntaalangbam ni ki nan sil Libool ngbaan aabisamɔb chee, le ki yin ke, “Aaronn. Miriam.” Le bima bilee ngbaan nyan sil.

⁶ Le Uwumbɔr bui bi ke, “Li pel man maah ban m len pu na. N‑yoonn mu maabɔnabtiib bi ni chee na, min le joo mbaa mɔk bi tidaŋ ni, le ki len bi chee tibɔr.

⁷ Maah len maatutunn Moses chee tibɔr pu na, ni bi nibaa; min le nyan u ke u li lik maanib Israel yaab mɔmɔk.

⁸ Nima pu na, m sii u chee le ki len, naa ye ŋiyataŋak ponn ni, le u kan maah bi pu na. Ni ŋa kinye aan ni galni maatutunn Moses kina?”

⁹ Uwumbɔr nan gee bi pu liŋuul; nima pu na, waah nan siir buen

¹⁰ aan ntaalangbam mu fii Libool ngbaan pu na, le Miriam aawon mɔmɔk kpaan kpaln kikɔŋ ŋmeen ki piir chak chak. N‑yoonn mu Aaronn kan ke uwon kpaln kikɔŋ ŋmeen na,

¹¹ le u bui Moses ke, “Uninkpel, taa cha ti ji falaa, taah tun kijɔrk aatunwanbir ti na pu.

¹² Taa cha u li bi ke ubo u kpo una aaponn ni ki nyan ni aan lipepel libaa bur doo na.”

¹³ Nima pu na, Moses nan wii yin Uwumbɔr ke, “Uwumbɔr, cha u pɔɔk.”

¹⁴ Le Uwumbɔr giin bui u ke, “Miriam aate yaa ba tii timɔɔtan ŋa unimbil wɔb kan, u ba ga ji kina aanimɔɔn iwiin ilole la. Nima pu na, ni nyan u linampal likpaakool libaa, nee aapuwɔb na, ni ki giin ni u linampal.”

¹⁵ Miriam nan nyan linampal iwiin ilole la, le binib ngbaan aa nan ŋmaa fii nima chee le u ti nin gir ni.

¹⁶ Nee aapuwɔb le binib ngbaan fii Haserof Aateersakpiin ni, ki ti kal Parann Aateersakpiin ni.