Nkahm 11 - Uwumbɔr aagbaŋ

Nin chee bi yin ni ke Tabera na aabɔr

¹ Israel yaab nan ki piin ki ŋulni ke bi bi falaa ni, le Uwumbɔr ŋun baah ŋulni pu na, le liŋuul chuu u, le u cha mmii sunn ni bi pu. Mu nan wun baah ka nin chee na lipepel libaa wɔb, ki bii nima chee.

² Le binib ngbaan wii yin Moses ke u ter bi; u nan mee Uwumbɔr, le u cha mmii ngbaan junn.

³ Nima pu le bi nan yin nima chee ke Tabera; ba pu? Uwumbɔr nan cha mmii wun bi nima chee la.

Moses aah nan nyan bisalolm imonko itaa ni kipiik pu na

⁴ Biwɔwɔm bibaa nan bi Israel yaab chee, ki dii bi cha. Bi nan cha tinann aakpeek chuu bi ni pɔɔ pam, le Israel yaab mu nan piin ki len tibɔr ti kaa ŋan na ki bui ke, “Ti yaa ba kan tinann ki ŋman kan, ni ba ŋan.

⁵ Ti nan ŋmɔ ijan taah gee pu na, Ijipt aatiŋ ni la, taa nan daa. Naa teer taah nan ŋmɔ lipulaajil, ni gariba, ni tigaribafar pu na aa?

⁶ Le dandana wee, nibaa aa bi ti ji, le taa ki kpa mpɔɔn kpala. Nibaa aa bi ki ki kpee mana u ti ji idaa mɔmɔk na pu.”

⁷ Mana nan naahn mpuibim aah bi siisii pu na la, le ki piin ki man chaun.

^8-9 Kinyeek kan, le mana nan dii limaln, ki lir mann goln baah ka pu na. Le ni yaa woln kichakpiik ni kan, binib ngbaan fii ban mana ngbaan, bi yaa ban kan, bi ga nan ni, bee bi ga san ni le ni ŋa n‑yon, le bi ga ŋaan ni ki di ni ŋa maab papam. Le u mɔ ke baah di olif aakpan le ken u na.

¹⁰ Moses nan ŋun binib ngbaan aah kuun si ŋikpuk ŋikpuk linampal pu ki len tibɔr ti kaa ŋan na pu na. Usui nan bii pam, ba pu? Uwumbɔr nan gee liŋuul bi pu.

¹¹ Le u bui Uwumbɔr ke, “Ba ŋa aa ŋa mi kina? Ba ŋa aasui wu m pu? Ba ŋa aa di litukpaan lee tii mi ke m li lik binib bee?

¹² Maa naan bi, ki mu le aa cha bi ma bi. Ba ŋa aa cha m kpaln unii u joo bi ŋŋaal ni, ke ubiyoor aah yoo mbim pu na, ki joo ni bi kitiŋ ki aa nan puu ke aa ga di tii biyaajatiib na ni?

¹³ La chee m ga kan tinann aan ti ŋeer kinipaak kee? Bi bi len n‑yoonn mɔmɔk ke bi ban tinann la.

¹⁴ Min baanja aan ŋmaa lik binib bimina. Bi wiir nyaŋ mi a.

¹⁵ Ni yaa ye ke aa ga ŋa mi kina kan, tee san mi kinimbaak ki nyan maamɔfal, nima kan, m ga nya falaa sakpiin wee ni.”

¹⁶ Le Uwumbɔr bui Moses ke, “Kuun ni binib bi aa nyi Israel yaab ponn ni, aan bi ye biyidam na, ki li joo ni bi m chee, Maabool aabisamɔb chee, aan ki cha bi nan sil gbaŋ si.

¹⁷ M ga sunn ni ki nan len aa chee tibɔr nima, le ki di Maafuur Nyaan mu m di tii si na ngem, tii bi mu. Nima kan, bi ga ŋmaa ter si, aa joo binib ngbaan, le naan ki li ye si baanja le ga li joo bi.

¹⁸ Bui binib ngbaan ke, ‘Toor nibaa man ki kiir fen, ni ga fe kan tinann ki ŋmɔ. Uwumbɔr ŋun naah ŋulni ki bui ke ni ban tinann pu na, ki ki len ke naah nan bi Ijipt aatiŋ ni na, ni nan soor ki tii nimi. Dandana wee, Uwumbɔr ga tii nimi tinann, le ni ga ŋmɔ ti.

¹⁹ Naa ye ke ni ga ŋmɔ ti nwiin mbaa, bee ilee, bee iŋmu, bee kipiik, bee iwiin moninko baanja la,

²⁰ ni ga ŋmɔ ti uŋmal ubaa le ti nuŋ nimɔfal ni, le ti ga cha ni buŋ kina pu. Ni ga ŋa kina, ba pu? ni yii Uwumbɔr u bi ni chee na, ki ŋulni ke naa ba gee ke ni nya Ijipt aatiŋ ni.’”

²¹ Moses nan bui Uwumbɔr ke, “Min le loln binib ŋichur ikui iloob bimina pu nsan, le aa bui ke aa ga tii bi tinann ki ti saa uŋmal ubaa aa?

²² Inaa ni ipiih iŋa m ga kɔr i, aan tinann ngbaan ŋeer bi, aan bi ŋmɔ ki bab? Ijan imɔk bi nnyusakpem ni na ga ŋeer bi ii?”

²³ Le Uwumbɔr giin baa u ke, “Aa nyi maapɔɔn mɔk aa? Naan yunn le aa ga kan ke maah len pu na ga ŋa aan naan ŋa.”

²⁴ Kina pu na, Moses nan buen binib ngbaan chee, le ki ti tuk bi Uwumbɔr aah len pu na. U nan kuun bisalolm imonko itaa ni kipiik na, le ki cha bi sil mann goln Uwumbɔr Aabool.

²⁵ Nima chee le Uwumbɔr sunn ni, ntaalangbam ni, ki nan len tibɔr u chee. U nan di Nfuur Nyaan mu u di tii Moses na ngem, ki di tii bisalolm imonko itaa ni kipiik ngbaan mu. Buyoonn Nfuur Nyaan ngbaan sunn ni bi pu na, le bi piin ki len ke Uwumbɔr aabɔnabtiib na, le ni mu aa nan yunn.

²⁶ Bisalolm imonko itaa ni kipiik ngbaan ponn ni bilee bimina, Eldad ni Medad, nan bee linampal, kaa buen biken chee Uwumbɔr Aabool taab. Linampal, nima chee, le Nfuur Nyaan nan sunn ni bi mu pu, le bi piin ki len ke Uwumbɔr aabɔnabtiib na.

²⁷ Le unachipɔɔn ubaa san buen Moses chee ki ti tuk u Eldad ni Medad aah bi ŋani pu na.

²⁸ Le Nunn aajapɔɔn u bi yin u ke Josua na, waah nan laa ye unachipɔɔn na, uma le nan bi Moses chee ki ter u, le u bui Moses ke, “Uninkpel, cha bi ŋmin.”

²⁹ Moses nan giin bui u ke, “Ba ŋa aa cha maanyuŋ aabɔr muk si? M ba ga li gee ke Uwumbɔr di Waafuur Nyaan tii waanib ngbaan mɔmɔk, aan ki cha bi mɔmɔk li len ke bibɔnabr na.”

³⁰ Le Moses ni bisalolm imonko itaa ni kipiik ngbaan gir buen linampal.

Uwumbɔr aah cha ichakpee lir ni pu na

³¹ Naa yoor n‑yoonn, le Uwumbɔr cha libuln daa ki nyan ni ichakpee nnyusakpem ni, i nan fii dee, kaa daa kitiŋ. I nan fii nan lir linampal, ki mann goln ni kookoo, ki wiir pam.

³² Nima pu na, liyaadaal ngbaan, ni kinyeek wɔb, ki nab nwiin mu paan na nwimɔn, binib ngbaan nan chur inyoon ngbaan; bi mɔmɔk aah nan chur i wiir pu na aanyunyuun ga nan pii ndibim kuruwaa lichur. Bi nan toor i ki di den linampal, ni kookoo, ke i kuur.

³³ Tinann ngbaan aah nan gbii ni kookoo, aan bi beenin ŋmɔ na, le Uwumbɔr aaŋuul nan fii bi pu, le u cha iween dan bi pu.

³⁴ Bi nan yin nima chee ke, “Kikpeek Aacheek,” ba pu? nima chee le bi nan sub binib bi nan kpa tinann aakpeek ki kpo na.

³⁵ Baah fii nima chee na, le bi ti kal Haserof aateersakpiin ni.