Nkahm 10 - Uwumbɔr aagbaŋ

Tikunabr aakakaan tiib

¹ Uwumbɔr nan bui Moses ke,

² “Di baah di ligagaar gbaa tikunabr ti na ŋa kakaan tiib bilee, ki li joo pii yin maanib bi kuuni, ki fiini bi baah ka nin chee na mu.

³ N‑yoonn mu bi ti ŋun kakaan bilee ngbaan wii ni yunn na kan, binib ngbaan mɔmɔk kuun ni aa chee, Maabool aabisamɔb chee.

⁴ Bi yaa ŋun kakaan ngbaan ubaa wii kan, ntaŋaal aayidam ŋmeen kuun dan aa chee.

⁵ N‑yoonn mu bi ti ŋun kakaan wii kaa yunn na, linibol li ka liwipuul wɔb na le ga pue fii, ki li chuun.

⁶ N‑yoonn mu bi ki ŋun kakaan wii lelee, naa yunn na kan, linibol li ka ŋŋangii wɔb na mu le ga fii paan. Nima pu na, kakaan yaa wii kaa yunn kan, ni mɔk ke binib ngbaan fii baah ka nin chee na, ki li chuun.

⁷ Tɔ, bi yaa ŋun kakaan wii ki yunn kan, binib ngbaan mɔmɔk kuun ni.

⁸ Aaronn ni ujapɔtiib bi ye bitotoorb na le ga li pii kakaan tiib ngbaan. “Ni li joo ikaal i paa ni na n‑yoonn mɔmɔk.

⁹ N‑yoonn mu ni bi nimi aatiŋ ni, ki buen butɔb ni, ki ban ni gaa nibaa lii nimi aadim bi lir ni pu na kan, ni pii kakaan tiib ngbaan baah ban bi piin butɔb pu na, le min Nidindaan Uwumbɔr ga ter nimi, ki nyan nimi, nimi aadim aaŋaal ni.

¹⁰ Ni yaa ti ki ye nimi aapopiin aayoonn, mu ye Uŋmapɔɔn aajim, ni nimi aatoorkpaan aajim muken na kan, buyoonn ni ban ke ni toor kitork ki bi joo seer mmii ni na, ni kimɔbaan aatork tii mi na, ni pii kakaan tiib ngbaan, le m ga ter nimi. Min le ye Nidindaan Uwumbɔr.”

Israel yaab aah nan fii Sainai Aateersakpiin ni pu na

¹¹ Israel yaab aah nan nyan ni Ijipt aatiŋ ni aan ni saa ŋibin ŋilee, lelee aaŋmal aawiin moninko daal na, le ntaalangbam mu nan sunni ki nan biin Uwumbɔr Aabool pu na fii paacham.

¹² Le Israel yaab nan piin lisachuln Sainai Aateersakpiin ni. Ntaalangbam ngbaan nan ti sil Parann Aateersakpiin ni la.

¹³ Bi nan chuun dii, Uwumbɔr aah mɔk Moses pu na la.

¹⁴ Bi yaa nan chuun cha kan, bi nan paa tɔb pu kina la. Juda aanibol, ni ŋinibol ŋi kpee li pu ki bi baatuutaa taab na, le nan pue loln nsan, ŋigetek ŋigetek, le Aminadab aajapɔɔn Nasonn nan ye usaloln bi pu.

¹⁵ Suar aajapɔɔn Netanel le nan ye Isakar aanibol yaab aayidaan.

¹⁶ Le Helonn aajapɔɔn Eliab nan ye Sebulunn aanibol aayidaan.

¹⁷ Bi yaa nan ber Uwumbɔr Aabool ngbaan kan, Gesonn ni Merari aataŋaal ni yaab le ga tun tiwan ngbaan mɔmɔk le ki chuun.

¹⁸ Rubenn aanibol na, ni ŋinibol ŋi kpee li pu ki bi baatuutaa taab na, le nan yakr ŋigetek ŋigetek, ki paan, le Sedeur aajapɔɔn Elisur nan ye usaloln bi pu.

¹⁹ Surisadai aajapɔɔn Selumiel le nan ye Simeonn aanibol yaab aayidaan.

²⁰ Le Dewel aajapɔɔn Eliasaf nan ye Gad aanibol yaab aayidaan, ki loln bi pu nsan.

²¹ Liifai yaab bi ye Kohaf aataŋaal ni aanib na mu ga paan, ki tu Uwumbɔr aah ŋa tiwan ni chain na. N‑yoonn mu bima ti fuu nkakaa chee na mui bi ki gaa Uwumbɔr Aabool ngbaan a.

²² Bi paa na le nan ye Efraim aanibol, ni ŋinibol ŋi kpee li pu ki bi baatuutaa taab na, nan yakr ŋigetek ŋigetek, ki paan, le Amihud aajapɔɔn Elisama nan ye usaloln.

²³ Pedasur aajapɔɔn Gamaliel le nan ye Manase aanibol yaab aayidaan.

²⁴ Le Gideoni aajapɔɔn Abidann mu nan ye Benjaminn aanibol yaab aayidaan.

²⁵ Kookoo aanib le nan ye Dann aanibol, ni ŋinibol ŋi kpee li pu ki bi baatuutaa taab na, nan yakr ŋigetek ŋigetek ki paan, ki paa puwɔb, le Amisadai aajapɔɔn Ahieser le nan ye usaloln bi pu.

²⁶ Okrann aajapɔɔn Pagiel le nan ye Aser aanibol yaab aayidaan.

²⁷ Le Enann aajapɔɔn Ahira mu nan ye Naftali aanibol yaab aayidaan.

²⁸ Israel yaab yaa nan fii nibaa chee ki cha kan, bi nan paa tɔb pu ŋigetek ŋigetek kina, le ki chuun cha.

²⁹ Le Moses bui uchool Jetro, u nan ye Midiann aanii na, aajapɔɔn Hobab ke, “Ti ban ti piin ki buen nin chee Uwumbɔr bui ke u ga di tii timi na la. U puu ke u ga ŋa timi Israel yaab pu tinyoor, nima pu na, li dii timi, aan ti kpaan ji kina aanyoor.”

³⁰ Hobab nan giin bui ke, “Aayii, m gir cha ndo aatiŋ ni la.”

³¹ Moses nan ki bui u ke, “Dan, taa di timi lii. Aa nyi nin chee ti ga ti kal nteersakpiin ni na, aa ga ŋmaa mɔk timi nsan.

³² Aa yaa dii timi buen kan, ti ni si ga kpaan ji Uwumbɔr aah ga tii timi tinyoor ti na.”

Israel yaab aah nan siir buen pu na

³³ N‑yoonn mu Israel yaab nan nyan Uwumbɔr Aajool Sainai chee na, bi nan chuun iwiin itaa la. N‑yoonn mɔmɔk Uwumbɔr Aakaal Aadakaa le bi nan joo lolni nsan, le u mɔk bi baah ga kal nin chee na.

³⁴ Baah nan chuun cha ki ti kaa nimɔk na, Uwumbɔr aataalangbam le nan bii bi pu, nwiin pu.

³⁵ N‑yoonn mu bi ti piin ki joo Uwumbɔr Aakaal Aadakaa cha na, le Moses bui ke, “Uwumbɔr, fiin ki yaa saadim, ki jenn binib bi nan si na.”

³⁶ Le buyoonn mu Dakaa ngbaan ti sil na kan, le u len ke, “Uwumbɔr, gir ni Israel yaab aamaal mu ye ŋichur ŋichur na chee.”